Hamulaho wa nako, Belishazare aba mulena wa Babilona. Zazi leliñwi busihu, amema batu babañata babakutekeha mwa naha kwa mukiti. Alaela batanga bahae kutisa likomoki za gauda ili zanaashimbile Nebukadenezare mwa tempele ya Jehova. Belishazare ni baenyi bahae banwela mwa likomoki zeo ni kulumbeka milimu yabona. Ka sipundumukela, kwabonahala lizoho la mutu mi lakala kuñola manzwi anaasa utwisisehi fa limota la mwa licelo.

Belishazare naasabile hahulu. Abiza baana bahae ba mabibo mi abasepisa kuli: ‘Mutu ufi kamba ufi yaka nitaluseza taluso ya manzwi a, nika mueza kuba yena mutu wabulaalu kwa maata mwa Babilona.’ Balika kutalusa manzwi ao, kono hakuna wa ku bona yanaakonile kutalusa manzwi. Muoli kihaa kena mwahali mi ali: ‘Kunani muuna yabizwa Daniele yanaatalusezanga Nebukadenezare taluso ya lika. Wakona kukutaluseza taluso ya manzwi a.’

Daniele ataha ku mulena. Belishazare kihaa li ku yena: ‘Haiba ubala ni kunibulelela taluso ya manzwi a, nika kufa sifaha sa gauda mi ukaba wena wabulaalu kwa maata mwa Babilona.’ Daniele kihaa li: ‘Hanitokwi limpo zahao, kono nika kutaluseza zatalusa manzwi a. Ndataho Nebukadenezare naaikuhumusa, mi Jehova amukokobeza. Waziba lika kaufela zeneezahalile ku yena, kono hausika kuteka Jehova ka kunwela waine mwa likomoki za gauda za mwa tempele yahae. Kacwalo, Mulimu uñozi manzwi a: Mene, Mene, Tekeli, ni Parisini. Manzwi a, atalusa kuli Mamede ni Maperesia bakahapa Babilona, mi hausana kuba mulena hape.’

Nekubonahala inge kuli nekusina mutu yanaakona kuhapa Babilona. Muleneñi wo neusilelelizwe ki mamota  atiile ni nuka yetungile. Kono kabona busihu bo, Mamede ni Maperesia bataseza muleneñi wo. Mulena wa Peresia ili yena Sirusi ayepa mikokolombwa kuli mezi aye kusili ilikuli masole bahae bakone kufita kwa minyako ya muleneñi. Hane bafitile kwateñi, bafumana kuli minyako neisika kwaliwa! Mpi yakena mwahali, yahapa muleneñi, ni kubulaya mulena. Hasamulaho, Sirusi aba yena mubusi wa Babilona.

Ka silimo sapili sa puso yahae, Sirusi afa zibiso ya kuli: ‘Jehova unibulelezi kuli niyahe sinca tempele yahae mwa Jerusalema. Mutu ufi kamba ufi kwa batu bahae yabata kutusa wakona kuya.’ Sina feela mwanaasepiselize Jehova, Majuda babañata bakutela habobona lilimo ze 70 kuzwa foisinyezwa Jerusalema. Sirusi akutisa gauda ni likomoki za silivera ni liitusiso zanaashimbile Nebukadenezare mwa tempele. Kana mulemuhile mo Jehova naaitusiselize Sirusi kutusa batu bahae?