Pili Mukiti wa Paseka usika ezwa kale ka 32 C.E., baapositola bakuta kuzwa mwa musebezi wa kukutaza. Nebakatezi, kacwalo, Jesu abaisa kwa Betsaida ka sisepe ilikuli bayo pumula. Kono sisepe hane uli bukaufi ni likamba, Jesu alemuha kuli batu babañata neba balatelezi kwa sibaka seo. Nihaike kuli Jesu naabata kuba feela ni baapositola bahae, naaamuhezi batu bao ka sishemo. Naafolisize bane bakula mwahalaa bona mi akala kubaluta. Jesu naabalutile za Mubuso wa Mulimu lizazi kaufela. Manzibwana, baapositola bataha ku yena mi bali: ‘Kubonahala kuli batu ba bashwile tala. Haku balukulule kuli bayo ipatela za kuca.’

Jesu ali ku bona: ‘Habatokwi kuya. Mina mubafe za kuca.’ Baapositola bamubuza kuli: ‘Kana ubata kuli luye luyo balekela sinkwa?’ Filipi, yomuñwi wa baapositola, ali: ‘Niha nelukaba ni masheleñi amañata, nelusike lwakona kulekela sinkwa batu babañata ba.’

Jesu ababuza ali: ‘Lunani lico zekuma kai?’ Andreasi ali: ‘Lunani linkwa zeketalizoho ni tutapi totubeli. Ki zenyinyani hahulu.’ Jesu ali: ‘Hamu nitiseze zona.’ Alaela batu kuina fa bucwañi ka likwata za batu ba 50 ni 100. Jesu aanga linkwa ni litapi, atalima kwahalimu mi alapela. Cwale afa lico kwa baapositola mi baliabela batu. Baana ba 5,000, hamoho ni basali ni banana kaufelaa bona baca kufitela bakula. Hasamulaho, baapositola bakubukanya buemba-emba bone busiyezi ilikuli  kutokwe zekasinyiwa. Nekutezi lizuma ze 12! Kaniti luli, yeo neli makazo yekomokisa!

Batu nebatabile hahulu kuli mane nebabata kueza Jesu kuba mulenaa bona. Kono Jesu naaziba kuli nesi yona nako yanaatomile Jehova ya kuli abe mulena. Kacwalo, alukulula buñata ni kubulelela baapositola bahae kuli baye mwa buse bwa Liwate la Galilea. Bakena mwa sisepe sabona mi Jesu aikela kwa lilundu anosi. Ki kabakalañi? Kakuli naabata kufumana nako ya kulapela ku Ndatahe. Kusina taba ni kuli Jesu naapatehile hahulu, naafumananga nako ya kulapela.