Bafalisi nebatoile Jesu mi nebabata nzila ya kumufa mulatu kuli bamutame. Nebabulezi kuli naasaswaneli kufolisa batu fa lizazi la Sabata. Fa lizazi leliñwi la Sabata, Jesu afumana muuna yali sibofu inze akupelela mwa mukwakwa. Abulelela balutiwa bahae kuli: ‘Mukabona maata a Mulimu mwakatuseza muuna yo.’ Jesu akopanya mati ahae ni mubu kuli aeze sileze, mi kihona alamba sileze seo fa meeto a muuna yo. Jesu abulelela muuna yo kuli: ‘Zamaya uyo tapa kwa meeto mwa kasa ka Siloe.’ Muuna yo aeza zanaa mubulelezi Jesu, mi lwapili mwa bupilo bwahae, muuna yo akala kubona.

Batu nebakomokile hahulu. Kihaa bali: ‘Kana yo haki yena mutu yanaainanga inzaa kupelela, kamba ki mutu usili yaswana feela ni yena?’ Muuna yo ali: ‘Neli na yanaapepilwe nili sibofu!’ Batu bamubuza kuli: ‘Kutile cwañi kuli ukale kubona?’ Hanaa babulelezi zeneezahezi, bamuisa kwa Bafalisi.

Muuna yo abulelela Bafalisi kuli: ‘Jesu naanilambile sileze fa meeto mi anibulelela kuli niyo tapa kwa meeto. Naeza cwalo, mi cwale senibona.’ Bafalisi kihaa bali: ‘Haiba Jesu ufolisa fa lizazi la Sabata, maata ahae haazwi ku Mulimu.’ Kono batu babañwi bali: ‘Kambe maata aitusisa haazwi ku Mulimu, naasike akona kufolisa muuna yo.’

Bafalisi babiza bashemi ba muuna yo mi bababuza kuli: ‘Kutile cwañi kuli mwanaa mina akale kubona?’ Bashemi bahae  nebasaba bakeñisa kuli bafalisi nebabulezi kuli mutu kaufela yakabonisa tumelo ku Jesu ukalelekwa mwa sinagoge. Kacwalo, babulela kuli: ‘Haluzibi. Hamu ipuzeze yena.’ Bafalisi babuza muuna yo lipuzo zeñwi zeñata kufitela abulela kuli: ‘Nimibulelezi litaba kaufela zeniziba. Ki kabakalañi hamuzwelapili kunibuza?’ Bafalisi nebanyemile mi bamuyumbela kwande.

Jesu aya mi ayo fumana muuna yo, mi amubuza kuli: ‘Kana walumela ku Mesia?’ Muuna yo kihaa li: ‘Nenika lumela ku yena kambe namuziba.’ Jesu ali: ‘Ki na Mesia.’ Ka kubulela cwalo Jesu naabonisize sishemo luli! Naasika folisa feela muuna yo kono hape naamutusize kuba ni tumelo.