Nuwe ni lubasi lwahae hamohocwalo ni lifolofolo bakena mwa aleka. Jehova akwala munyako mi pula yakala kunela. Yanela hahulu kuli mane aleka yakala kucimbauka fahalimwaa mezi. Hasamulaho, lifasi kaufela latala mezi. Batu kaufela babamaswe bane basiyo mwa aleka bashwa. Kono Nuwe ni lubasi lwahae nebasilelelizwe mwa aleka mone bainzi. Munahane feela tabo yene babile ni yona kabakala kuutwa Jehova!

Pula yanela ka mazazi a 40 ni masihu a 40, mi hasamulaho yatuhela kunela. Mezi akala kufukuzeha hanyinyani-hanyinyani. Hamulaho wa nako, aleka yayo fueka fahalimwaa malundu. Kono nekusanani mezi amañata mwa lifasi kaufela, kacwalo Nuwe ni lubasi lwahae nebasa koni kuzwa mwa aleka honafo feela.

Mezi akala kuoma hanyinyani-hanyinyani. Nuwe ni lubasi lwahae nebainzi mwa aleka ka nako yefitelela silimo silisiñwi. Mi Jehova ababulela kuli bazwe mwa aleka ni kuya mwa lifasi lene libonahala kuba lelinca. Nebaitumezi ku Jehova kakuli naabapilisize, mi nebabonisize buitumelo ka kuezeza Jehova sitabelo.

Jehova naatabisizwe ki sitabelo sene bafile. Naasepisize kuli naasike ayundisa hape lika kaufela ze fa lifasi ka muunda. Aeza nambwamutalati wapili mwa lihalimu, ili kuyemela sepiso yahae yeo. Kana mukile mwabona fateñi nambwamutalati?

Hasamulaho, Jehova ataluseza Nuwe ni lubasi lwahae kuba ni bana kuli bataze lifasi.