Maisilaele nebahapelelizwe kusebeza ka taata sina batanga. Jehova aluma Mushe ni Aruni kuli baise lushango ku Faro lone lubulela kuli: ‘Lukulula batu baka kuli bayo nisebeleza mwa lihalaupa.’ Faro aalaba ka buikuhumuso ali: ‘Hanina taba ni zabulela Jehova, hanina kulukulula Maisilaele kuli baye.’ Kacwalo, Faro ahapeleza Maisilaele kubeleka ka taata nikufita. Jehova naaka luta Faro tuto yetuna. Kana mwaziba mwanaaezelize? Jehova naafile naha ya Egepita Likoto Zelishumi. Jehova kihaa li ku Mushe: ‘Faro halati kuniutwa. Kakusasana, ukaba kwa Nuka ya Nile. Muye ku yena mi mumutaluseze kuli bakeñisa kuli uhanile kulukulula batu baka kuli baye, mezi kaufela a mwa Nuka ya Nile akafetuha kuba mali.’ Mushe aeza zanaa mubulelezi Jehova mi aya ku Faro. Faro aiponela Aruni inze anata fa Nuka ya Nile ka mulamu wahae, ni mezi hacinca kuba mali. Nuka yakala kununka, litapi zashwa, mi nekusina mezi amande anaakona kunwiwa. Kusina taba ni zeo, Faro ahana kulukulula Maisilaele kuli baye.

 Hamulaho wa mazazi a 7, Jehova hape aluma Mushe kuya ku Faro, kuisa lushango lolubulela kuli: ‘Haiba uhana kulukulula batu baka, mwa Egepita kukatala limbotwe.’ Aruni ananulela mulamu wahae mwahalimu mi limbotwe zakala kutala mwa naha ya Egepita. Batu bafumana limbotwe mwa mandu abona, fa mimbeta, ni mwa mikeke. Limbotwe nelifumaneha kai ni kai! Faro akupa Mushe kuli Jehova afelise koto yeo. Faro asepisa kuli naaka lukulula Maisilaele kuli baye. Kacwalo, Jehova afelisa koto, mi Maegepita bakubukanya limbotwe zeshwile, ka mabunda amañata-ñata. Mi naha yakala kununka. Kono Faro ahana kulukulula batu kuli baye.

Cwale Jehova ali ku Mushe: ‘Aruni uswanela kunanulela mulamu wahae mwahalimu mi aunate fafasi, mi liluli likafetuha minañi kamba tukokwani totunyinyani totuluma.’ Honafo feela, kwaba ni minañi mwa naha kaufela ya Egepita. Batu babañwi ba Faro kiha bali ku yena: ‘Koto ye izwa ku Mulimu.’ Kono kusina taba ni zeo, Faro naasika lukulula Maisilaele kuli baye.