Jehova kihaa li ku Mushe: ‘Kambamela ku na fa lilundu. Nikañola milao yaka fa matapa a macwe mi nika kufa ona.’ Mushe akambama fa lilundu mi ayo ina kwateñi mazazi a 40 ni masihu a 40. Hanaali kwateñi, Jehova añola Milao Yelishumi fa matapa a macwe amabeli mi kihona afa Mushe.

Hamulaho wa nako, Maisilaele bakala kunahana kuli mwendi Mushe naabasiile. Kihaa bali ku Aruni: ‘Lubata mutu yaka luetelela. Hakuluezeze mulimu!’ Aruni kihaa li: ‘Hamunife gauda yamina.’ Ashengununa gauda yeo mi aeza siswaniso sa namani. Batu kihaa bali: ‘Namani ye ki yona Mulimu waluna yaluetelezi kuzwa mwa Egepita!’ Bakala kulapela namani yeo ya gauda mi baba ni mukiti. Kana nebafosize hane baezize cwalo? Eni, kakuli batu nebasepisize kulapela feela Jehova. Kono nebasika taleleza sepiso yabona.

 Jehova naabona zeneezahala, mi kihaa li ku Mushe: ‘Zamaya, ushetumuke uyo bona zebaeza batu. Habasika niutwa mi balapela mulimu wa buhata.’ Mushe ashetumuka kuzwa fa lilundu inze ashimbile matapa amabeli.

Mushe hasaa sutelezi bukaufi ni mafulo, autwa batu babaopela. Mi ababona inze babina ni kukubamela namani. Mushe naahalifile hahulu. Alatela fafasi matapa amabeli mi atubakeha kuba buemba emba. Honafo feela, Mushe asinya siswaniso sa namani. Cwale abuza Aruni kuli: ‘Batu ba bakukolwisize cwañi kuli ueze nto yemaswe cwana?’ Aruni kihaa li: ‘Usike wahalifa. Waziba hande mobainezi batu ba. Nebabata kuba ni mulimu, kacwalo kiha ninepela gauda yabona mwa mulilo mi naeza fateñi namani ye!’ Aruni naasaswaneli kueza cwalo. Mushe kihaa kutela hape kwa lilundu kuyo kupa Jehova kuli aswalele batu.

Jehova aswalela batu bane balata kumuutwa. Kana mwalemuha libaka Maisilaele hane baswanela kulatelela ketelelo ya Mushe?