Mushe hanaali fa Lilundu la Sinai, Jehova amubulelela kuyaha tende yeipitezi, yebizwa tabernakele kuli Maisilaele bakopanelange mwateñi kulapela Mulimu. Nebaka lwalanga tabernakele hane bakazwanga mwa sibaka sesiñwi kuya ku sesiñwi.

Jehova kihaa li: ‘Bulelela batu kuli bazwise zebakona kuli kuyahiwe tabernakele.’ Maisilaele bafa gauda, silivera, kopa, macwe a butokwa, ni likabisa. Hape bafa bwanda, line, matalo a lifolofolo, ni lika zeñwi zeñata. Nebazwisize lika zeñata kuli mane Mushe ababulelela kuli: ‘Lunani lika zeñata! Musike mwatisa lika zeñwi hape.’

Baana ni basali bane bali likwala nebatusize mwa musebezi wa kuyaha tabernakele. Jehova naabafile butali kuli bapete hande musebezi. Babañwi nebaota bwanda, kulukisa masila, kamba kuakabisa hande. Babañwi balukisa macwe, kulukisa hande gauda, kamba kubeta mabala.

Batu bayaha tabernakele sina feela mwanaa babulelezi Jehova. Baeza lisila lelinde kuli likauhanye tabernakele mwa likalulo zepeli, Sibaka Sesikenile ni Sibaka Sesikenile Hahulu. Mwa Sibaka Sesikenile Hahulu nekufumaneha aleka ya tumelelano, ili yeneezizwe fa kota ya akesha ni gauda. Mwa Sibaka Sesikenile nekufumaneha matomelo a lilambi a gauda, tafule, ni aletare fa kuciseza. Mwa lapa nekufumaneha mukeke wa kopa ni aletare yetuna. Aleka ya tumelelano neihupulisize Maisilaele ka za sepiso yabona ya kuutwa Jehova. Kana mwaziba zeitalusa tumelelano? Ki sepiso yeipitezi.

 Jehova naaketile Aruni ni bana bahae kuli bayo sebeleza kwa tabernakele sina baprisita. Nebatokwa kubabalela tabernakele yeo ni kufa matabelo ku Jehova. Neli feela Aruni, muprisita yapahami, yanaalumelelizwe kukena mwa Sibaka Sesikenile Hahulu. Naaezanga cwalo hañwi ka silimo ili kufa matabelo a libi zahae, a lubasi lwahae, mane ni libi za sicaba kaufela sa Isilaele.

Maisilaele nebafelize kulukisa tabernakele hamulaho wa silimo silisiñwi kuzwa fobazwela mwa Egepita. Cwale nese banani sibaka sa kulapelela Jehova.

Jehova naatalize tabernakele ka kanya yahae mi nekubonahezi lilu fahalimwaa yona. Lilu hane libanga fahalimwaa tabernakele, Maisilaele nebazwelangapili kuba mwa sibaka seo. Kono lilu hane linanuhanga fahalimwaa tabernakele nebazibanga kuli neli nako ya kuli bafunduke. Nebalwalanga tabernakele ni kulatelela lilu.