Ka nako yenekunani ni linanga, Jehova abulelela Elia kuli: ‘Zamaya kwa Sarepta. Ukafumana kwateñi mbelwa yaka kufa lico.’ Elia abona mbelwa wa mubotana fa munyako wa muleneñi inze alwalela likota. Akupa musali yo mezi akunwa. Hanaaya kuyo muungela mezi, Elia ali ku yena: ‘Nakupa, nitiseze sinkwa.’ Kono mbelwa ali: ‘Hanina sinkwa sa kukufa. Ninani feela fulaulonyana ni olinyana ya kueza sico saka ni sa mwanaka.’ Elia amubulelela ali: ‘Jehova usepisize kuli haiba uniezeza sinkwa, fulaulo ni oli yahao halina kufela kufitela pula inela hape.’

Kacwalo, mbelwa yo aya kwandu ni kuyo ezeza mupolofita wa Jehova sinkwa. Sina feela mwanaasepiselize Jehova, mbelwa yo ni mwanaa hae wamushimani, nebanani lico za kuca ka nako yene kunani linanga. Linkwana zahae za fulaulo ni oli nelitezi.

Cwale kwaezahala nto yeñwi yemaswe. Mwanaa mbelwa wamushimani yo akula hahulu kuli mane atimela. Mbelwa  akupa Elia kuli amutuse. Mi Elia aanga mushimani mwa mazoho a mahe ni kumuisa mwa muzuzu wa fahalimwaa ndu ya mbelwa yo. Amulobaza fa mumbeta mi alapela ali: ‘Jehova, nakukupa zusa mwana yo.’ Kana mwaziba libaka taba yeo hane ikaba yetabisa ku Jehova kuieza? Sina feela moluzibela, hakuna mutu yakile azusiwa fateñi kwa bafu. Mi mbelwa yo ni mwanaa hae wamushimani nesi Maisilaele.

Kono mushimani yo azuha kwa bafu, mi akalisa kubuyela! Elia kihaa li ku mbelwa: ‘Bona! Mwanaa hao wapila.’ Natabile hahulu mi ali ku Elia: ‘Kaniti luli, u muuna wa Mulimu. Naziba cwalo bakeñisa kuli ubulela feela za kutaluseza Jehova kuli ubulele.’