Kana ku na ni mutu ya kile a ku bulelela fateñi kunutu?— * Bibele i bulela za kunutu ye ipitezi ye bizwa kuli ki “kunutu ye kenile.” Kunutu yeo i kenile kakuli i zwa ku Mulimu. Mi i bizwa kuli ki kunutu kakuli batu ne ba sa i zibi. Mane nihaiba mangeloi naa bata ku ziba ze ñata ka za kunutu yeo. Kana wa tabela ku ziba kunutu yeo?—

Kale-kale ko, Mulimu naa bupile muuna ni musali ba pili. Mabizo a batu bao ne li Adama ni Eva. Mulimu naa ba file lihae le linde le li bizwa simu ya Edeni. Kambe Adama ni Eva ne ba utwile Mulimu, bona ni bana ba bona ne ba ka fetula lifasi kaufela ku ba Paradaisi sina mo ne i inezi simu ya Edeni. Mi ne ba ka pila mwa Paradaisi ku ya ku ile. Kono kana wa hupula ze ne ba ezize bo Adama ni Eva?—

Adama ni Eva ne ba si ka utwa Mulimu, mi kona libaka ha lu sa pili mwa Paradaisi kacenu. Kono Mulimu naa bulezi kuli naa ka tahisa kuli lifasi kaufela li be le linde, ni kuli batu kaufela ne ba ka pila ku ya ku ile ni ku ba ni tabo. Mulimu naa ka eza cwañi cwalo? Ne ku ngile nako ye telele kuli batu ba zibe mwa naa ka ezeza cwalo Mulimu. Taba yeo ne li kunutu.

Jesu ha naa tile fa lifasi, naa lutile batu litaba ze ñata ka za kunutu yeo. Naa bulezi kuli kunutu yeo ne i ama Mubuso wa Mulimu. Jesu naa bulelezi batu kuli ba lapele kuli Mubuso wo u tahe. Mubuso wo u ka tahisa kuli lifasi li be Paradaisi ye nde.

Kana u tabile kuli ki kale u ziba kunutu yeo?— U hupule kuli ki batu feela ba ba utwa Jehova ba ba ka pila mwa Paradaisi. Bibele i lu bulelela litaba ze ñata ka za baana ni basali ba ne ba utwile Jehova. Kana wa tabela ku ituta ka za batu bao?— Ha lu nyakisise ba bañwi kwa batu bao kuli ki bo mañi mi lu bone mo lu kona ku ba likanyiseza.