TUTO 37
Zeibulela Bibele ka za Musebezi ni Masheleñi
Kana mukile mwabilaela hahulu bakeñisa kutokwa musebezi kamba masheleñi? Haiba lu mwa muinelo wo, kwakona kulubela taata kufumana lika zelutokwa mwa bupilo, mi mane lwakona kupalelwa nihaiba kulapela hande Jehova. Mwa Bibele kunani litaba zekona kulutusa mwa muinelo ocwalo.
1. Bibele ibulelañi ka za musebezi?
Mulimu ubata kuli luikole kueza musebezi waluna. Bibele ibulela kuli “ku mutu, hakuna nto yende yefita . . . kuikola musebezi wahae waezize ka taata.” (Muekelesia 2:24) Jehova ki Mulimu yasebeza ka taata. Haiba lumulikanyisa ka kusebeza ka taata, luka mutabisa mi lukaba ni tabo.
Kusebeza ki nto ya butokwa. Kono kusebeza hakuswaneli kuba kwa butokwa hahulu kufita kulapela Jehova. (Joani 6:27) Jehova ulusepisa kuli haiba lubeya zahae mwa sibaka sapili, uka lutusa kufumana zelutokwa mwa bupilo.
2. Ki ufi mubonelo oswanela ka za masheleñi?
Nihaike kuli Bibele ibonisa kuli ‘masheleñi asileleza,’ hape ibulela kuli masheleñi anosi hakoni kutahiseza mutu tabo. (Muekelesia 7:12) Kacwalo, lususuezwa kuli lusike lwalata masheleñi kono ‘lukolwe ka zelunani zona cwale.’ (Mubale Maheberu 13:5.) Haiba luzwelapili kukolwa ka zelunani zona, haluna kukatazwanga ki lipilaelo zetiswa ki kubata kuba ni masheleñi amañata. Lukaambuka kuba ni likoloti zesatokwahali. (Liproverbia 22:7) Mi haluna kuziyezwa ki zemaswe zebakopananga ni zona batu babaezanga lipapali za likwinano kamba bababatanga linzila za kufuma kapili.
3. Lukona kuitusisa cwañi hande masheleñi?
Jehova ki Mulimu yanani bufani, mi lwakona kumulikanyisa haiba luba ni ‘bufani, ni kutabela kuikabela ni babañwi.’ (1 Timotea 6:18) Lwakona kuitusisa hande masheleñi aluna haiba lufa linubu mwa puteho ni kutusa batu babañwi, sihulu balapeli sina luna. Sesitabisa Jehova haki folikuma lika zelufa, kono ki mulelo olufela lika zeo. Haiba lubonisa moya wa bufani, lukaba ni tabo mi lukatabisa Jehova.—Mubale Likezo 20:35.
MUBATISISE
Munyakisise bunde bwa kuba ni mubonelo oswanela ka za musebezi ni kukolwa ka zelunani zona.
4. Mukuteke Jehova ka momuezeza musebezi wamina
Silikani selunani sona ni Jehova siswanela kulususueza kuba ni mubonelo omunde ka za musebezi. Mubuhe VIDIO, mi kihona mukanyakisisa lipuzo zelatelela.
-
Ki nto mañi yemitabisize ka za mubonelo ni likezo za bo Jason kwa musebezi wabona?
-
Ki lika mañi zene baezize kuli babe ni mubonelo oswanela ka za musebezi?
Mubale Makolose 3:23, 24, mi kihona mukanyakisisa puzo yelatelela:
-
Ki kabakalañi halutokwa kuba ni mubonelo omunde ka za musebezi?
Kusebeza ki nto ya butokwa. Kono kusebeza hakuswaneli kuba kwa butokwa hahulu kufita kulapela Jehova
5. Kukolwa ka zelunani zona kwatusa
Batu babañata balikanga mobakonela kaufela kuli baikubukanyeze masheleñi amañata. Kono Bibele hai lususuezi kueza cwalo. Mubale 1 Timotea 6:6-8, mi kihona mukanyakisisa puzo yelatelela:
-
Bibele ilususueza kuezañi?
Niha lunani lika zenyinyani feela, lwakona kuba ni tabo. Mubuhe VIDIO, mi kihona mukanyakisisa puzo yelatelela.
-
Nihaike kuli habana masheleñi amañata, ki nto mañi yetahiseza mabasi elubuhile kuba ni tabo?
Kono lukona kuezañi haiba kuli lunani masheleñi amañata kono lusabata kuekeza? Jesu naafile swanisezo yebonisa butata bobukona kutahiswa ki taba yeo. Mubale Luka 12:15-21, mi kihona mukanyakisisa puzo yelatelela:
-
Muitutileñi kwa swanisezo ya Jesu?—Mubone timana 15.
Mubale ni kubapanya ze kwa Liproverbia 10:22 ni 1 Timotea 6:10. Mi kihona mukanyakisisa lipuzo zelatelela:
-
Mubona kuli ki nto mañi ya butokwa? Kuba ni silikani sesinde ni Jehova kamba kuba ni masheleñi amañata? Ki kabakalañi hamubulela cwalo?
-
Ki butata mañi bobutahiswanga ki kubata kuba ni masheleñi amañata?
6. Jehova uka lufumanela zelutokwa
Mubonelo waluna ka za musebezi ni masheleñi wakona kutahisa kuli lube ni tumelo yetiile ku Jehova kamba kutokwa. Mubuhe VIDIO kuli mubone zemukona kueza mwa miinelo yeama musebezi ni masheleñi, mi kihona mukanyakisisa lipuzo zelatelela.
-
Muzwale yelubuhile naakopana ni matata mañi?
-
Ki lika mañi zanaaezize kuli atiyele matata ao?
Mubale Mateu 6:25-34, mi kihona mukanyakisisa puzo yelatelela:
-
Jehova usepisa kuezezañi batu bababeya zahae mwa sibaka sapili?
BABAÑWI BABULELANGA KULI: “Nitokwa kusebeza ka taata kuli nifumanele lubasi lwaka zelutokwa. Hanikoni kuyanga kwa mikopano ya puteho sunda ni sunda.”
-
Ki liñolo mañi leli mikolwisa kuli kuisa hahulu pilu kwa kulapela Jehova ki yona katulo yende hahulu kufita nto ifi kamba ifi?
LITABA KA BUKUSWANI
Kubeleka musebezi omuñwi ni kuba ni masheleñi ki kwa butokwa, kono lika zeo haliswaneli kulupalelwisa kusebeleza hande Jehova.
Mulundulule
-
Ki lika mañi zekona kumitusa kuba ni mubonelo oswanela ka za musebezi?
-
Kukolwa ka zemunani zona kukona kumitusa cwañi?
-
Mukona kubonisa cwañi kuli musepile kuli Jehova ukababalela batu bahae?
MUBONE LITABA ZEÑWI
Munyakisise haiba Bibele ibonisa kuli masheleñi amaswe.
“Kana Masheleñi ki Mubisi wa Bumaswe Kaufela?” (Taba ya fa webusaiti)
Muitute bufani bwatabela Mulimu.
Kana kunani zefosahalile kwa papali ya likwinano za masheleñi?
“Ka Kuya ka Bibele—Lipapali Za Kuwina Masheleñi” (Muzuhe!, March 2015)
Mubone zenetusize mutu yanaabapalanga lipapali za kuwina masheleñi ili yanaabanga lisholi kutuhela lipapali zeo
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
