1, 2. Ki kabakalañi hamulata Jehova Mulimu?

 KANA mwalata Mulimu? Mwendi mumulata hahulu, mi ki lona libaka hamuineezi ku yena. Mwendi muikutwa kuli ki Mulikanaa mina yomutuna. Kono Jehova naamilatile nihaiba pili musika mulata kale. Mwa Bibele lubala kuli: “Lubonisa lilato, kakuli naalulatile pili.”—1 Joani 4:19.

² Munahane linzila zeo Jehova alubonisize ka zona lilato. Ulufile lifasi, lona lihae laluna lelinde, ni lika zeñwi kaufela zelutokwa kuli luikole bupilo. (Mateu 5:43-48; Sinulo 4:11) Ubata kuli lube ni silikani sesinde ni yena mi ulukonisize kuituta ka zahae. Halubala Bibele, luteeleza ku Jehova. Mi halulapela, wateeleza ku luna. (Samu 65:2) Waluetelela ni kulutiisa ka moya wahae okenile. (Luka 11:13) Mane naalumile Mwanaa hae yalata hahulu kuli alulukulule kwa sibi ni lifu.—Mubale Joani 3:16; Maroma 5:8.

3. Lutokwa kuezañi kuli luzwisezepili silikani saluna ni Jehova?

³ Munahane feela hanyinyani ka za mulikanaa  mina yomutuna ili yemubile ni yena mwa linako zende ni zemaswe. Mutokwa kuikataza kuli muzwisezepili silikani samina. Kona molutokwa kuezeza nihaiba kwa silikani saluna ni Jehova, yena Mulikanaa luna yomutuna ka kufitisisa. Silikani saluna ni yena saakona kuina kuya kuile. Ka mukwa ocwalo, Bibele ilubulelela kuli: “Muzwelepili kuba mwa lilato la Mulimu.” (Juda 21) Lukona kueza cwañi cwalo? Bibele ialaba kuli: “Se ki sona sekutalusa kulata Mulimu, kuli lumamele milao yahae; mi niteñi milao yahae haiimezi.”—1 Joani 5:3.

4, 5. Nemukalile cwañi kulata Jehova?

⁴ Bibele italusañi haibulela kuli, “kulata Mulimu”? Italusa maikuto elunani ona ku Mulimu. Kana mwahupula fone mukalezi kulata Jehova?

⁵ Muhupule mone muikutwezi hane muitutile lwapili kuli Jehova ubata kuli mupile kuya kuile mwa lifasi lelinca. Nemuitutile ka za lika kaufela zaezize, kuli mukone kupila kuya kuile, mi nemulemuhile butokwa bwa mpo yanaa lufile Jehova ka kuluma Mwanaa hae fa lifasi. (Mateu 20:28; Joani 8:29; Maroma 5:12, 18) Hase muzibile mwamilatela Jehova, nemususuelizwe, mi ni mina nemukalile kumulata.—Mubale 1 Joani 4:9, 10.

6. Kulata mutu kuamañi? Lilato lamina ku Mulimu litahisize kuli muezeñi?

⁶ Lilato lene munani lona ku Mulimu leo neeli makalelo feela. Ka mutala, haiba lwalata mutu yomuñwi, haluna kubulela feela kuli “nakulata.”  Lilato litahisa kuli lueze lika zekatabisa mutu yo. Ka mukwa oswana, lilato lamina ku Jehova nelitahisize kuli mupile ka nzila yemutabisa. Lilato lamina hase lihulile, mwendi nemuineezi ku yena ni kukolobezwa. Ka kueza cwalo, nemusepisize kuli mukasebeleza Jehova kuya kuile. (Mubale Maroma 14:7, 8.) Mukona kutaleleza cwañi sepiso yeo?

7. Haiba lwalata Jehova, ki lika mañi zeluka eza? Ki lifi zeñwi za litaelo zahae?

⁷ Bakeñisa kuli lwalata Jehova, ‘lumamela milao yahae.’ Lueza cwañi cwalo? Lwa muutwa. Mwa Bibele luituta ka za mupilelo walata Jehova. Ka mutala, ulubulelela kuli hatabeli bucakolwa, busholi kamba buhata, kueza somano ni mutu yelusika nyalana ni yena, kamba kulapela mutu kamba nto yeñwi kwandaa kulapela Jehova.—1 Makorinte 5:11; 6:18; 10:14; Maefese 4:28; Makolose 3:9.

8, 9. Lukona kuziba cwañi lika zetabisa Jehova niha luipumana mwa muinelo molusika tomelwa mulao onongile wa mwa Bibele? Mufe mutala.

⁸ Kuli lutabise Jehova, halutokwi feela kumamela milao yahae. Jehova haasika lufa mukoloko wa milao yebonisa moluswanela kuezeza mwa muinelo ni muinelo olukopana ni ona. Ka mukwa ocwalo, fokuñwi haluna kufumananga mulao mwa Bibele olutaluseza zeluswanela kueza. Lukona kueza cwañi likatulo zende? (Maefese 5:17) Mwa Bibele kunani likuka, zona litaba zaniti zebonisa mo Jehova aangela lika. Halunze lubala Bibele, lukaziba hande  mwainezi Jehova. Luka ituta mwanahanela, kukopanyeleza cwalo ni lika zalata ni zatoile.—Mubale Samu 97:10; Liproverbia 6:16-19; mubone Litaluso za Kwa Mafelelezo 1.

⁹ Ka mutala, lukona kuketa cwañi zelubuha fa TV kamba zelubona fa Intaneti? Jehova halubulelelangi luli zelutokwa kueza. Kono likuka zalufa, lika lutusa kueza likatulo zende. Buñata bwa lika zakuitabisa ka zona kacenu, ki za lindwa ni buhule. Mwa Bibele, Jehova ulubulelela kuli utoile “mutu kaufela yalata lindwa” ni kuli “ukaatula batu ba muzamao wa buhule.” (Samu 11:5; Maheberu 13:4) Likuka ze, likona kulutusa cwañi kueza likatulo zende? Halulemuha kuli Jehova utoile nto yeñwi kamba uiinga kuba yemaswe, luswanela kuiambuka.

10, 11. Ki kabakalañi haluutwa Jehova?

¹⁰ Ki kabakalañi haluutwa Jehova? Haki ka libaka feela la kuambuka likoto kamba butata bobukona kutaha halueza likatulo zemaswe. (Magalata 6:7) Luutwa Jehova ka libaka lakuli lwamulata. Sina bana bababata kutabisa ndataa bona, lubata kutabisa Ndataa luna ya kwa lihalimu. Hakuna nto yende yefita kuziba kuli lutabisa Jehova!—Samu 5:12; Liproverbia 12:2; mubone Litaluso za Kwa Mafelelezo 2.

¹¹ Haluswaneli kuutwa Jehova ka libaka feela la kuli ku bunolo kueza cwalo kamba ka libaka la kuli haluna molukona kuezeza. Mi haluswaneli kuketa milao kamba likuka zelutokwa kulatelela kamba kusa latelela. (Deuteronoma 12:32) Kono luswanela  kuutwa Mulimu ka kuitatela sina muñoli wa samu yanaaize: “Nitabela milao yahao, ki cwalo, nailata.” (Samu 119:47; Maroma 6:17) Lubata kuba sina Nuwe yanaabonisize lilato ka kueza lika kaufela zanaa mulaezi Jehova. Bibele ili, Nuwe “aeza honacwalo feela.” (Genese 6:22). Kana mubata kuli Jehova abulele cwalo ka zamina?

12. Lukona kutabisa cwañi Jehova?

¹² Jehova uikutwa cwañi halu muutwa? Lutabisa ‘pilu yahae.’ (Liproverbia 11:20; 27:11) Munahane feela ka za taba yeo! Lutabisa Mubupi wa pupo kaufela halu muutwa. Kono haaluhapelezi kueza cwalo. Ulufile tukuluho ya kuiketela kumuutwa kamba kusamuutwa. Fo kutalusa kuli lunani tukuluho ya kuiketela kueza zelukile kamba zesika luka. Jehova ubata kuli lilato laluna ku yena lilususueze kueza likatulo zende zekatahisa kuli bupilo bwaluna bube bobunde.—Deuteronoma 30:15, 16, 19, 20; mubone Litaluso za Kwa Mafelelezo 3.

13, 14. Luziba cwañi kuli milao ya Mulimu haki yetaata kuimamela? Mufe mutala.

¹³ Kucwañi haiba lunahana kuli milao ya Jehova itaata hahulu kuimamela kamba kuli ika luamuha tukuluho yelunani yona? Bibele ibulela ka kuutwahala hande kuli: “Milao yahae haiimezi.” (1 Joani 5:3) Linzwi la Sigerike lelitolokilwe kuli ‘kuimeza’ litalusa “bukiti.” Mwa mañolo amañwi, linzwi leo liitusiswanga kutalusa milao yetaata kamba batu bababata kuzamaisa kamba kuutwisa babañwi butuku.  (Mateu 23:4; Likezo 20:29, 30) Bibele yebizwa New English Translation ibulela kuli: “Milao yahae hailuimezi.” Milao ya Jehova haina “bukiti,” ili kutalusa kuli haki yetaata kuimamela. Zatokwa kuli lueze kaufela haki zetaata.

¹⁴ Ka mutala, munahane kuli mutusa mulikanaa mina kututela mwa ndu yenca. Ubeile lika zahae kaufela mwa mambokisi. Zeñwi libubebe mi libunolo kwa kulishimba, kono zeñwi zona libukiti mi likona kunanulwa ki batu bababeli. Kana mulikanaa mina wakona kumikupa kuli mushimbe mbokisi yebukiti munosi? Batili! Ki kabakalañi? Kakuli haalati kuli muholofale. Ka kuswana ni mulikani yo, Jehova haalukupi kueza lika zetaata hahulu. (Deuteronoma 30:11-14) Jehova waziba moluinezi. “Waziba hande molubupezwi, inzaa hupula kuli lu liluli.”—Samu 103:14.

15. Ki kabakalañi halukona kukolwa kuli milao ya Jehova ilelezwi kulutusa?

¹⁵ Mushe naabulelezi sicaba sa Isilaele kuli milao ya Jehova neibatusa ‘kukondisa kamita’ mi kuutwa kwabona nekuka batusa ‘kuzwelapili kupila.’ (Deuteronoma 5:28-33; 6:24) Ki nto yeswana ni kacenu. Nto kaufela yalukupa Jehova kuli luieze ikalutusa kuba ni bupilo bobunde. (Mubale Isaya 48:17.) Ndataa luna, yena Jehova, waziba zelutokwa luli. (Maroma 11:33) Bibele ilubulelela kuli: “Mulimu ki lilato.” (1 Joani 4:8) Taba ye italusa kuli lika kaufela zabulela ni zaeza Jehova, ulibulela ni kulieza ka lilato.

16. Luziba cwañi kuli lwakona kuutwa Mulimu kusina taba kuli halusika petahala ni kuli lupila mwa lifasi lelimaswe?

 ¹⁶ Haki nto yebunolo kamita kuutwa Mulimu. Lupila mwa lifasi lelimaswe lelibusiwa ki Diabulosi. Ukukuezanga batu kueza lika zemaswe. (1 Joani 5:19) Hape lutokwa kulwanisa mihupulo ni maikuto aluna asika petahala, bakeñisa kuli lika zeo zakona kulutahiseza kusautwa Mulimu. (Maroma 7:21-25) Kono lilato laluna ku Jehova lilutusa kueza zelukile. Wabona buikatazo bwaluna bwa kumuutwa, mi walutusa ka kulufa moya wahae okenile. (1 Samuele 15:22, 23; Likezo 5:32) Moya okenile ulutusa kuba ni tulemeno totulukonisa kuutwa Jehova.—Magalata 5:22, 23.

17, 18. (a) Lukaitutañi mwa buka ye? (b) Lukanyakisisañi mwa kauhanyo yetatama?

¹⁷ Mwa buka ye, luka ituta molukona kupilela ka nzila yetabisa Jehova. Lukaituta mwa kusebeliseza milao ni likuka zahae za muzamao mwa bupilo bwaluna. Muhupule kuli Jehova haluhapelezangi kumuutwa. Haluketa kumuutwa, bupilo bwaluna bukacinca, mi lukaba ni bupilo bobunde kwapili. Mi sabutokwa ni kufita kikuli kuipeya kuutwa kukabonisa Mulimu kuli lwamulata.—Mubone Litaluso za Kwa Mafelelezo 4.

¹⁸ Jehova ulufile lizwalo kuli lilutuse kuziba lika zelukile ni zesika luka. Haiba luluta lizwalo laluna, lika lutusa kuli “lumamele milao yahae.” Kono lizwalo laluna ki nto mañi, mi lukona kuliluta cwañi? Haluboneñi.