1, 2. Lutokwa kuutwisisañi ka za Satani ni badimona bahae?

 BUPILO bukaba bobunde hahulu mwa lifasi lelinca la Jehova. Lukapila sina mwanaabatela Mulimu kuli lupilele. Kono ka nako yacwale, lupila mwa lifasi lelizamaiswa ki Satani ni badimona bahae. (2 Makorinte 4:4) Satani ni badimona bahae bateñi, mi banani maata amatuna hahulu nihaike kuli halukoni kubabona.

² Mwa kauhanyo ye, lukanyakisisa molukona kusutelela ku Jehova ni molukona kuisileleza ku Satani. Jehova usepisa kuli uka lutusa. Kono lutokwa kuziba mikwa yaitusisa Satani ni badimona kulupuma ni kuluswasa ka yona.

3. Diabulosi ubata kulueza cwañi?

³ Satani upihelezi kubulela kuli batu basebeleza Jehova ka mulelo wakuli bafumane sesiñwi ni kuli bakona kutuhela kusebeleza Mulimu haiba batahelwa ki butata. (Mubale Jobo 2:4, 5.) Mutu habonisa kuli ubata kuituta ka za Jehova, Satani ni badimona bahae balemuhanga taba yeo mi balikanga kumutuhelisa. Banyemanga haiba mutu aineela ku Jehova ni kukolobezwa. Bibele ibapanya Diabulosi kwa “tau yebuluma, yebata yeika  ca.” (1 Pitrosi 5:8) Satani ubata kusinya silikani saluna ni Jehova.—Samu 7:1, 2; 2 Timotea 3:12.

4, 5. (a) Ki lika mañi zasakoni kueza Satani? (b) ‘Kuhanyeza Diabulosi’ kutalusañi?

⁴ Kono haluswaneli kusaba Satani ni badimona bahae. Jehova hasika bafa maata amatuna hahulu. Jehova usepisa kuli “buñata bobutuna” bwa Bakreste baniti bukapunyuha “ñalelwa yetuna.” (Sinulo 7:9, 14) Hakuna zakona kueza Diabulosi kuli apalelwise batu kupunyuha ñalelwa yetuna, bakeñisa kuli Jehova wasileleza batu bahae.

 ⁵ Satani hakoni kusinya silikani saluna ni Jehova, haiba lusutelela ku Mulimu. Linzwi la Mulimu lilusepisa kuli: “Jehova ukaba ni mina ibile feela muzwelapili kuba ni yena.” (2 Makolonika 15:2; mubale 1 Makorinte 10:13.) Buñata bwa baana ni basali babasepahala ba kwaikale, babacwale ka Abele, Enoke, Nuwe, Sara, ni Mushe, nebahanyelize Diabulosi ka kusutelela ku Jehova. (Maheberu 11:4-40) Ni luna lwakona kueza cwalo. Linzwi la Mulimu lisepisa kuli: “Muhanyeze Diabulosi, mi ukasaba ku mina.”—Jakobo 4:7.

6. Satani ululwanisa cwañi?

⁶ Nihaike kuli Satani waziba kuli Jehova haasika mufa maata a kuluyundisa, usalika kueza nto ifi kamba ifi kuli afokolise silikani saluna ni Mulimu. Satani kacenu ulwanisa batu ka linzila zeñata hahulu mi uitusisa mikwa yasaaitusisize ka lilimo zeñata-ñata. Ki mikwa ifi ona yeo?

7. Ki kabakalañi Satani halwanisa batu ba Jehova?

⁷ Muapositola Joani naañozi kuli: “Lifasi kaufela li mwa maata a yamaswe.” (1 Joani 5:19) Satani ki yena yazamaisa lifasi lelimaswe le, mi ubata kuzamaisa ni batu ba Jehova. (Mika 4:1; Joani 15:19; Sinulo 12:12, 17) Diabulosi waziba kuli usiyalezwi ki nako yenyinyani hahulu, kabakaleo, ululwanisa hahulu kuli lusike lwa sepahala ku Mulimu. Ka linako zeñwi, Diabulosi ululwanisanga ka linzila zebonahala, kono fokuñwi ululwanisanga ka linzila zesalemusehi.

8. Mukreste kaufela uswanela kulemuhañi?

⁸ Kwa liñolo la Maefese 6:12, lubala kuli: “Lunani ndwa . . . ni mioya yemaswe ye mwa mahalimu.” Mukreste kaufela ulwana ni Diabulosi ni badimona.  Luswanela kulemuha kuli lubile batu kaufela babaineela ku Jehova ba mwa ndwa yeo. Mwa liñolo lahae lanaañolezi Bakreste ba kwa Efese, muapositola Paulusi naabaelelize halaalu kuli “muyeme ka kutiya.”—Maefese 6:11, 13, 14.

9. Satani ni badimona balika kulueza cwañi?

⁹ Satani ni badimona balika kulupuma ka linzila ze shutana-shutana. Haluswaneli kunahana kuli haluna kutahelwa ki muliko omuñwi ka libaka feela la kuli lutuzi muliko ulimuñwi wa Satani. Diabulosi ubatisisanga bufokoli bwaluna ilikuli alutahiseze muliko wakona kuluswasa ka ona ka bunolo. Kono haluswaneli kuswasiwa ki Diabulosi bakeñisa kuli Bibele yaluluta ka za liteiso zaitusisa. (2 Makorinte 2:11; mubone Litaluso za Kwa Mafelelezo 31.) Siteiso sesiñwi saitusisa ki tumelo ya mioya.

10. (a) Tumelo ya mioya ki nto mañi? (b) Jehova uunga cwañi tumelo ya mioya?

¹⁰ Tumelo ya mioya ikopanyeleza kulumela mwa lika za mioya ili zetahisezanga batu kuswalisana ni badimona zecwale ka bulauli, buloi, kuposa liposo, kamba kulika kuambola ni babashwile. Bibele ilubulelela kuli tumelo ya mioya “yanyenyisa” mi halukoni kuswalisana ni badimona ka nako yeswana inge lulapela Jehova. (Deuteronoma 18:10-12; Sinulo 21:8) Bakreste baswanela kuambuka mifuta kaufela ya litumelo za mioya.—Maroma 12:9.

11. Kutabela kuziba ka za lika za mioya kukona kutahisa kuli luezeñi?

¹¹ Satani waziba kuli haiba lwatabela kuziba ka za lika za mioya, kuka mubela hahulu bunolo kulutahiseza  kuli lube ni tumelo ya mioya. Mufuta kaufela wa tumelo ya mioya wakona kusinya silikani saluna ni Jehova.

12. Satani ukona kulyanganisa cwañi molunahanela?

¹² Satani ulikanga kulyanganisa mobanahanela batu. Utahisanga kuli batu bakakanye lika hanyinyani-hanyinyani kufitela bakalisa kunahana kuli “bunde ki bumaswe ni kuli bumaswe ki bunde.” (Isaya 5:20) Diabulosi ususueza batu kunahana kuli kelezo ye mwa Bibele haitusi, ni kuli lwakona kuba ni tabo halukeshebisa likuka za Mulimu.

13. Satani ulikile cwañi kutahiseza batu kuli bakakanye?

¹³ Kukakanya ki sesiñwi sa liteiso zemaata zaitusisa Satani. Saitusisize siteiso seo ka nako yetelele. Mwa simu ya Edeni, naabata kutahisa kuli Eva akakanye ka kumubuza kuli: “Kana luli Mulimu naaize musike mwaca kwa likota kaufela za mwa simu?” (Genese 3:1) Hasamulaho, ili mwa linako za Jobo, Satani naabuzize Jehova fapilaa mangeloi kuli: “Kana Jobo usaba feela Mulimu asafumani sesiñwi?” (Jobo 1:9) Jesu hasaakolobelizwe, Satani naamulwanisize ka kubulela kuli: “Haiba u mwanaa Mulimu, bulelela macwe a kuli afetuhe linkwa.”—Mateu 4:3.

14. Satani utahisanga cwañi kuli batu basike balumela kuli tumelo ya mioya ilubeta?

¹⁴ Diabulosi usalika kutahisa kuli batu bakakanye. Ulika kutahiseza batu kuipuza ka za haiba tumelo ya mioya imaswe luli ka kutahisa kuli likalulo zeñwi za tumelo yeo libonahale inge zesina lubeta. Mane nihaiba Bakreste babañwi habasika lemuha kuli tumelo  ya mioya ilubeta. (2 Makorinte 11:3) Ka mukwa ocwalo, lukona kueza cwañi kuli luisileleze? Lukona kueza cwañi kuli lusike lwapumiwa ki makilikicani a Satani? Halunyakisiseñi miinelo yemibeli mo lukona kupumiwa: Kuitabisa ni likalafo.

15. Lukona kuswalisana cwañi ni badimona ka lika zeluitabisa ka zona?

¹⁵ Kacenu, mafilimu amañata, mavidio, liprogilamu za fa TV, lipapali za fa kompyuta, ni mawebusaiti libonisanga za tumelo ya mioya, mabibo, ni lika za mioya. Batu babañata baanga kuli lika zeo halina butata mi habalemuhangi kozi yekona kutahiswa ki kutuhelela badimona ku zamaisa bupilo bwabona. Mutu hape wakona kuba ni tumelo ya mioya ka kulika kunuhanga zeezahala mwa bupilo bwa batu ka kuitusisa mufuta ufi kamba ufi wa bunuhi. Diabulosi habonisangi kuli lika zeo limaswe mi zakona kutahisa kozi, kono ulibonahalisanga inge zetabisa. Mutu ukona kunahana kuli hakusika fosahala kubuha lika za tumelo ya mioya kamba lika za mioya ibile feela kuli haezi lika zeo. Ki kabakalañi mubonelo wo hauli olubeta?—1 Makorinte 10:12.

16. Ki kabakalañi haluswanela kuambuka lika za kuitabisa ka zona zeswalisana ni badimona?

¹⁶ Satani ni badimona habakoni kuziba zelunahana. Kono bakona kuziba litakazo zaluna ni molunahanela ka kubona liketo zelueza ni kuezeza mabasi aluna, hamohocwalo ni lika zeluketa kuitabisa ka zona. Haiba luketa mafilimu, lipina, kamba libuka za tumelo ya mioya, za liposo, za batu babakenwi ki badimona, za buloi, za libupiwa za moya, ni zebulela za litaba zeñwi ka za  mioya, Satani ni badimona bakaziba kuli lutabela kuziba zeñata ka za bona. Mi bakalika kulukenya hahulu mwa litumelo za mioya.—Mubale Magalata 6:7.

17. Satani ukona kululika cwañi ka kuitusisa takazo yaluna ya kubata kuba ni mubili oiketile?

¹⁷ Satani hape wakona kululika ka kuitusisa takazo yaluna ya kubata kuba ni mubili oiketile. Batu babañata kacenu bakatazwa ki matuku. Mwendi mutu ulikile likalafo zeshutana-shutana kono hasika fola. (Mareka 5:25, 26) Mwendi waakona kuziyeleha hahulu mi waakona kuitakaleza kulika mialafelo kaufela. Kono ka kuba Bakreste, lutokwa kutokomela kuli lusike lwaketa  mialafelo ye swalisana ni “misebezi ya mabibo.”—Isaya 1:13.

18. Ki mualafelo ocwañi waaswanela kuambuka Mukreste?

¹⁸ Mwa Isilaele wa kwaikale, nekunani batu babañwi bane baezanga “misebezi ya mabibo.” Jehova naababulelezi kuli: “Hamuotolola mazoho amina, niitima kwa meeto kuli nisike namibona. Niha mukalapela litapelo zeñata, hanina kuliutwa.” (Isaya 1:15) Munahane taba ye: Jehova naasike ateeleza kwa litapelo zabona! Halulati kueza nto ifi kamba ifi yekasinya silikani saluna ni Jehova ni kutahisa kuli asike alutusa, sihulu halukula. (Samu 41:3) Ka mukwa ocwalo, luswanela kunyakisisa haiba mualafelo olubata kualafiwa ka ona uswalisana ni tumelo ya mioya kamba lika za mioya. (Mateu 6:13) Haiba lulemuha kuli mualafelo wo uswalisana ni tumelo ya mioya, luswanela kuuambuka!—Mubone Litaluso za Kwa Mafelelezo 32.

19. Diabulosi utahisize cwañi kuli batu babañata babe ni sabo?

¹⁹ Batu babañwi nihabanahana kuli Diabulosi ni badimona ki lika feela za kuikupulela, babañwi baziba kuli bateñi luli bakeñisa lika zebaiponezi. Batu babañata basaba hahulu mioya yemaswe mi baikezize batanga ka kulatelela lizo za mioya. Babañwi batahisa kuli batu basabe badimona ka kubabulelela makande a lika zemaswe zebaezanga badimona kwa batu. Hañata, batu batabelanga makande acwalo mi banyolelwanga kuataluseza babañwi. Makande ao hañata atahisanga kuli batu basabe Diabulosi.

20. Lukona kuhasanya cwañi litaba za buhata za Satani?

²⁰ Munahane taba ye: Satani ubata kuli batu bamusabe.  (2 Matesalonika 2:9, 10) Ki lihata, mi waziba mwa kupumela batu babasebeleza badimona, ni kutahisa kuli balumele lika za buhata. Batu bao bakana babulela makande a lika zebahupula kuli baliboni ni kuikutwela zona. Batu bao habanze babulela makande ebautwile ku babañwi, bazwelapili kushangela litaba kwa makande ao. Halulati kutusa Satani kusabisa batu ka kubulela makande acwalo.—Joani 8:44; 2 Timotea 2:16.

21. Luswanela kubulelelañi batu, mwasibaka sa kubakandekela ka za badimona?

²¹ Haiba yomuñwi wa batu ba Jehova naakatalizwe ki badimona, haana kutabisa batu babañwi ka kubabulelela mwanaa mukatalelize. Batu ba Jehova habatokwi kusabiswa ki zakona kueza Satani ni badimona bahae. Kono lutokwa kuitinga ku Jesu ni kwa maata afilwe ki Jehova. (Maheberu 12:2) Jesu naasatabisangi balutiwa bahae ka kubakandekela ka za badimona. Naabatalusezanga za Mubuso wa Mulimu ni lika “zetuna za Mulimu.”—Likezo 2:11; Luka 8:1; Maroma 1:11, 12.

22. Muikatulezi kuezañi?

²² Luhupule kuli mulelo wa Satani ki wa kusinya silikani saluna ni Jehova. Ukalika mwakonela kaufela kuli ataleleze mulelo wahae. Kono lwaziba mikwa yaitusisa Diabulosi mi luikatulezi kuhana nto ifi kamba ifi ya tumelo ya mioya. Haluna “kufa Diabulosi kolo” yakuli afokolise cisehelo yaluna. (Mubale Maefese 4:27.) Kaniti, haiba luhanyeza Diabulosi, haluna kuswasiwa mwa siteo sahae mi lukaba mwa pabalelo ya Jehova.—Maefese 6:11.