1, 2. Ki nto mañi yelukona kueza kuli luzwelepili kuba mwa lilato la Mulimu?

 KAUFELAA luna lubata kuba babatiile ni babaiketile. Ka mukwa ocwalo, lucanga lico zende, kueza lipapali zetiisa mubili, ni kubabalela mibili yaluna. Nihaike kuli kueza cwalo kutokwa kuikataza, zezwa mwateñi ki zende, ki lona libaka halusazwafi. Kono lutokwa kuba babatiile ni babaiketile ka nzila yeñwi hape.

² Nihaike kuli lubile ni makalelo amande ka kuziba Jehova, lutokwa kuzwelapili kutiisa silikani saluna ni yena. Juda hanaasusuelize Bakreste kuli, “muzwelepili kuba mwa lilato la Mulimu,” naatalusize mone bakona kuezeza cwalo. Naababulelezi kuli: “Muicahe fa mutomo wa tumelo yamina yekenile hahulu.” (Juda 20, 21) Ka mukwa ocwalo, lukona kutiisa cwañi tumelo yaluna?

3-5. (a) Satani ubata kuli muikutwe cwañi ka za likuka za Jehova? (b) Muikutwa cwañi ka za milao ni likuka za Jehova?

³ Ki kwa butokwa kuli muikolwise kuli linzila za Jehova ki zende hahulu. Satani ubata kuli munahane  kuli likuka za Mulimu litaata hahulu kulilatelela ni kuli mukaba ni tabo yetuna haiba muiketela zelukile ni zesika luka. Kuzwa feela mwa simu ya Edeni, Satani utahisize kuli batu balumele taba yeo. (Genese 3:1-6) Mi ni kacenu usaeza cwalo.

⁴ Kana Satani ubulela niti? Kana likuka za Jehova litaata hahulu? Batili. Ka mutala, munahane kuli muzamaya mwa sibaka sesinde sa kuikatuluseza. Mi mulemuha kuli kunani sibaka sesiñwi sesisilelelizwe ka limota lelitelele. Mwendi mukaipuza kuli, ‘Limota le libeezwiñi fa?’ Kono ka nako yeswana muutwa tau yebuluma kwa buse bwa limota leo. Mukaikutwa cwañi ka za limota leo hase muutwile mulumo wa tau? Mukataba bakeñisa kuli limota leo limisilelelize kuli musike mwaciwa ki tau! Likuka za Jehova liswana sina limota leo, mi Diabulosi uswana sina tau. Linzwi la Mulimu lilueleza kuli: “Mube ni kutwisiso, mutone! Sila samina, yena Diabulosi, uzamaya sina tau yebuluma, yebata yeika ca.”—1 Pitrosi 5:8.

⁵ Jehova ubata kuli lube ni bupilo bobunde. Haalati kuli lupumiwe ki Satani. Ki lona libaka haalufile milao ni likuka zelusileleza ni kulutahiseza tabo. (Maefese 6:11) Jakobo naañozi kuli: “Yatalimisisa mwa mulao opetehile wa tukuluho ni kuzwelapili ku ona . . . ukaba ni tabo hanzaa ueza.”—Jakobo 1:25.

6. Lukona kuba cwañi ni buikolwiso bwakuli linzila za Mulimu ki zende hahulu?

⁶ Haiba lulatelela ketelelo ya Jehova, lukaba ni bupilo bobunde mi silikani saluna ni yena sika tiya. Ka mutala, lwatusiwa haluamuhela kupo yahae yakuli  lulapele ku yena kamita. (Mateu 6:5-8; 1 Matesalonika 5:17) Lubanga ni tabo halulatelela ketelelo yahae ya kukopana hamoho kuli lumulapele ni kususuezana, ni haluabana mwa musebezi wa kukutaza ni kuluta babañwi. (Mateu 28:19, 20; Magalata 6:2; Maheberu 10:24, 25) Halunahana molutuselizwe ki likuka ze kuli luzwelepili kutiisa tumelo yaluna, luba ni buikolwiso bobutezi bwa kuli linzila za Jehova ki zende hahulu.

7, 8. Ki nto mañi yeka lutusa kusaikalelwa ka za miliko yekona kulutahela kwapili?

⁷ Mwendi lwakona kuikalelwa kuli kwapili tumelo yaluna ikalikiwa hahulu. Haiba muikutwa cwalo, muhupule manzwi a Jehova ali: “Na Jehova, ki na Mulimu wahao, yakuluta kuli ufumane tuso, yakuzamaisa  mwa nzila yeuswanela kuzamaya ku yona. Umamele milao yaka! Haueza cwalo, kozo yahao ikaswana sina nuka mi kuluka kwahao kukaswana sina mandinda a mwa liwate.”—Isaya 48:17, 18.

⁸ Haluutwa Jehova, kozo yaluna ikaswana sina nuka yesakalangi, mi kuluka kwa luna kukaswana sina mandinda a mwa liwate azwelapili kunata fa munanga wa liwate. Lwakona kusepahala kusina taba ni zeezahala mwa bupilo bwaluna. Bibele isepisa kuli: “Unepele mushimbo wahao ku Jehova, mi uka kutiisa. Haana kulumeleza yalukile kuli awe.”—Samu 55:22.

9, 10. Kuhula kwa moya kutalusañi?

⁹ Hamunze mutiisa silikani samina ni Jehova, mukafita fa “buhulu bwa kwa moya.” (Maheberu 6:1) Kuhula kwa moya kutalusañi?

¹⁰ Halukoni kufita fa buhulu bwa kwa moya bakeñisa buhulu bwa lilimo za kupepwa. Kuli lufite fa buhulu bwa kwa moya, luswanela kuba Mulikanaa Jehova yomutuna ni kuikataza kuunga lika mwalingela. (Joani 4:23) Paulusi naañozi kuli: “Babapila ka nama baisa munahano ku za nama, kono babapila ka moya, baisa munahano ku za moya.” (Maroma 8:5) Mutu yahulile kwa moya haisi pilu kwa minyaka kamba sifumu. Kono uisa pilu kwa kusebeleza Jehova ni kueza likatulo zende mwa bupilo. (Liproverbia 27:11; mubale Jakobo 1:2, 3.) Haakukuezwi kueza lika zemaswe. Mutu yahulile kwa moya waziba zelukile mi uikatulezi kulieza.

11, 12. (a) Paulusi naabuleziñi ka za ‘maata a Bakreste a kulemuha’? (b) Zatokwa kueza Mukreste kuli afite fa kuhula kwa moya liswana cwañi ni zaatokwa kueza mutu kuli abe mumati?

 ¹¹ Kuli mutu ahule kwa moya, utokwa kuikataza. Muapositola Paulusi naañozi kuli: “Lico zetiile ki za batu babahulile, ili babatwaelize maata abona a kulemuha, ilikuli bataluhanye zelukile ku zesika luka.” (Maheberu 5:14) Pulelo ya kuli “babatwaelize” itahisa kuli lunahane za mumati.

¹² Halubona mumati yacuukile inzaa mata, lwaziba kuli naatandile nako yeñata kuitwaeza kumata ilikuli abe ni buikoneli bwanani bona. Naasika pepwa inze ali mumati. Mbututu haapepiwa haazibangi luli mwakuitusiseza mazoho ni mahutu ahae. Kono hamulaho wa nako, uitutanga kuswala lika ni kuzamaya. Haiba aitwaeza, wakona kuba mumati. Ka nzila yeswana, lutokwa nako ni kuitwaeza kuli lube Mukreste yahulile kwa moya.

13. Ki lika mañi zeka lutusa kunahana mwanahanela Jehova?

¹³ Mwa buka ye, lunyakisisize ka za kunahana mwanahanela Jehova ni kuunga lika ka mwalingela. Luitutile kuitebuha ni kulata likuka za Jehova. Halueza likatulo, luswanela kuipuzanga kuli: ‘Ki ifi milao kamba likuka za mwa Bibele zesebeza mwa muinelo wo? Nikona kuitusisa cwañi zona? Jehova ubata kuli niezeñi?’—Mubale Liproverbia 3:5, 6; Jakobo 1:5.

14. Ki lika mañi zelutokwa kueza kuli lutiise tumelo yaluna?

¹⁴ Halutuheli kutiisa tumelo yaluna ku Jehova. Sina feela kuca sico sesinde hakukona kulutusa kuba ni mubili otiile, kuituta ka za Jehova kulutusa kutiisa tumelo yaluna. Hane lukalile kuituta Bibele, neluitutile litaba za makalelo ka za Jehova ni linzila zahae. Kono  nako hainze iya, lutokwa kuutwisisa lika zetungile. Ki zona zanaatalusa Paulusi hanaabulezi kuli: “Lico zetiile ki za batu babahulile.” Halusebelisa lika zeluituta, lukaba ni butali. Bibele ilubulelela kuli: “Butali ki bwa butokwa hahulu.”—Liproverbia 4:5-7; 1 Pitrosi 2:2.

15. Ki kabakalañi kulata Jehova ni mizwale ni likaizeli baluna hakuli kwa butokwa?

¹⁵ Mutu wakona kuba yatiile ni yaiketile, kono kuli azwelepili kuba cwalo, waziba kuli utokwa kuzwelapili kuipabalela. Ka nzila yeswana, mutu yahulile kwa moya waziba kuli utokwa kubeleka ka taata kuli azwelepili kutiisa silikani sahae ni Jehova. Paulusi naaluhupulisize kuli: “Muzwelepili kuitekula kuli mubone haiba musali mwa tumelo; muzwelepili kubonisa semuli sona luli.” (2 Makorinte 13:5) Nihakulicwalo, lutokwa kueza zeñata kufita kuba feela ni tumelo yetiile. Lilato laluna ku Jehova ni kwa mizwale ni likaizeli baluna liswanela kuzwelapili kuhula. Paulusi naabulezi kuli: “Haiba ninani . . . zibo ya lika kaufela, mi haiba ninani tumelo yetuna kuli mane nishimbulula ni malundu, kono hanina lilato, hani sesiñwi.”—1 Makorinte 13:1-3.

16. Satani ubata kuli luikutwe cwañi?

¹⁶ Satani ubata kulutahiseza kuikutwa kuli halukoni kutabisa Jehova. Ubata kuli luikutwe kuzwafa ni kunahana kuli matata aluna haakoni kutatululwa. Haalati kuli lusepe Bakreste ka luna, mi haalati kuli lube ni tabo. (Maefese 2:2) Satani waziba kuli kuba ni maikuto amaswe kwakona kulutahiseza kozi ni kusinya silikani saluna ni Mulimu. Kono  Jehova ulufile nto yekona kulutusa kulwanisa maikuto amaswe. Ulufile sepo.

17. Kuba ni sepo ki kwa butokwa cwañi?

¹⁷ Kwa liñolo la 1 Matesalonika 5:8, Bibele ibapanya sepo yaluna kwa kuwani yesileleza toho ya lisole leli mwa ndwa, ka kubiza kuwani yeo kuli ki “sepo ya puluso.” Kuba ni sepo mwa lika zalusepisize Jehova kwakona kusileleza minahano yaluna ni kulutusa kuhanyeza maikuto amaswe.

18, 19. Jesu naatiisizwe cwañi ki sepo?

¹⁸ Sepo yanaanani yona Jesu neimutiisize. Fa busihu bwa mafelelezo a bupilo bwahae fa lifasi, Jesu naatalimani ni miinelo yetaata ka kutatamana. Naabetekilwe ki mulikanaa hae yomutuna. Yomuñwi naalatuzi kuli haamuzibi. Babañwi neba muyubekile ni kubaleha. Batu banaapila ni bona neba mulwanisize ni kukupa kataata kuli abulaiwe ka kutukufazwa. Ki  nto mañi yene mutusize kuitiisa kwa lika zeutwisa butuku zeo? Bibele ibulela kuli: “Kabakala tabo yenebeilwe fapilaa hae atiyela kota ya linyando, asaisi pilu kwa lishubu, mi uinzi ku la bulyo la lubona lwa Mulimu.”—Maheberu 12:2.

¹⁹ Jesu naaziba kuli hanaaka sepahala, naakafa tumbo ku Ndatahe, ni kubonisa kuli Satani ki lihata. Sepo yeo nei mutahiselize tabo yetuna. Hape naaziba kuli naatuha aswalisana ni Ndatahe ya kwa lihalimu. Sepo yeo nei mutusize kuitiisa. Ka kuswana ni Jesu ni luna luswanela kuisa pilu kwa sepo yaluna. Ika lutusa kuitiisa kusina taba ni zekona kuezahala.

20. Ki nto mañi yekona kumitusa kuba ni maikuto amande?

²⁰ Jehova wabona tumelo ni buitiiso bwamina. (Isaya 30:18; mubale Malaki 3:10.) Usepisa kuli ‘uka mifa zeilakaza pilu yamina.’ (Samu 37:4) Kabakaleo, munahane hahulu za sepo yamina. Satani ubata kuli  mulatehelwe ki sepo yamina ni kuli muikutwe kuli lisepiso za Jehova halina kutalelezwa. Kono hamukoni kuhapiwa ki maikuto amaswe! Haiba mulemuha kuli sepo yamina isweli yafokola, mukupe Jehova kuli amituse. Muhupule manzwi a kwa Mafilipi 4:6, 7 ali: “Musike mwabilaezwa ki sesiñwi, kono mwa lika kaufela muzibise Mulimu zemukupa ka tapelo ni ka kupo hamoho ni buitumelo; mi kozo ya Mulimu yefita kutwisiso kaufela ikasileleza lipilu zamina ni maata amina a kunahana ka Kreste Jesu.”

21, 22. (a) Ki ufi mulelo wa Mulimu ka za lifasi? (b) Muikatulezi kuezañi

²¹ Kamita mubange ni nako ya kunahana ka za lika zende za kwapili. Hona cwale-cwale fa, batu kaufela babapila bakalapela Jehova. (Sinulo 7:9, 14) Munahane feela mobukabela bupilo mwa lifasi lelinca. Bukaba bobunde hahulu ni kufita! Satani, badimona bahae, ni lika zemaswe kaufela likafeliswa. Hamuna kukula, mi hamuna kushwa. Kono zazi ni zazi mukazuha inge munani maata, mi mukaba ni tabo bakeñisa kuli mwapila. Batu kaufela bakabeleka hamoho kuli bafetule lifasi kuba paradaisi. Kaufela bakaba ni lico zende ni libaka zende zakupila ku zona. Batu habana kuba ni situhu kamba mifilifili kono bakaezana ka musa. Nako hainze iya, batu kaufela mwa lifasi baka ikola “tukuluho yemakaza ya bana ba Mulimu.”—Maroma 8:21.

²² Jehova ubata kuli mube mulikanaa hae yomutuna. Ka mukwa ocwalo, mueze momukonela kaufela kuutwa Jehova ni kusutelela ku yena zazi ni zazi. Haike kaufelaa luna luzwelepili kuba mwa lilato la Mulimu kuya kuile!—Juda 21.