Kwa batu kaufela babalata Jehova Mulimu ni Linzwi la hae, yona Bibele:

Jesu naabulezi kuli: “Mukaziba niti, mi niti ika milukulula.” (Joani 8:32) Munahane feela mone muikutwezi hane muitutile Bibele lwapili! Nemutabezi hahulu hane muzibile kuli mwakona kuituta niti mwa lifasi mokunani batu bababulelanga buhata.—2 Timotea 3:1.

Jehova Mulimu ubata kuli luzibe niti. Mi bakeñisa kuli lwalata batu, lubata kuli bazibe taba yeo. Kono kunani zeñata zelutokwa kueza kuli lusebeleze Mulimu. Bakeñisa kuli lukuteka hahulu likuka za Jehova, luswanela kueza molukonela kaufela kuli lupile sina Bakreste. Jesu naatalusize nzila ya butokwa yelukona kubonisa Mulimu ka yona kuli lwamulata. Naabulezi kuli: “Haiba mumamela milao yaka, mukazwelapili mwa lilato laka, sina na hanimamezi milao ya Ndate ni kuzwelapili mwa lilato lahae.”—Joani 15:10.

Jesu ulata hahulu Ndatahe mi uezanga lika kaufela zamubulelela Ndatahe kuli aeze. Haiba lulikanyisa Jesu ka molupilela, Jehova uka lulata mi lukaba ni tabo. Sina feela mwanaabulelezi Jesu, “hamuziba lika ze, mukaba ni tabo hamu lieza.”—Joani 13:17.

Lunani buikolwiso bwa kuli buka ye ika mitusa kuituta mwakupilela ka niti ya mwa Bibele ni kuba balikani ba Mulimu. Lulapela kuli lilato lamina ku Mulimu lizwelepili ni kuzwelapili kuba “mwa lilato la Mulimu . . . kuli mufumane bupilo bobusa feli.”—Juda 21.