KALULO 4
Mwa ku Itusiseza Hande Masheleñi
“Milelo i tiiswa ki ku elezana.”—Liproverbia 20:18
Kaufelaa luna lu tokwa masheleñi kuli lu kone ku fumanela batu ba mwa lubasi lwa luna ze ba tokwa. (Liproverbia 30:8) Kakuli mane masheleñi a kona ku ‘sileleza’ mutu. (Muekelesia 7:12) Ka ku ba batu ba ba nyalani, ku kona ku ba taata kuli mu ambolisane za masheleñi, kono mu si ke mwa tuhelela masheleñi ku tisa matata mwa linyalo la mina. (Maefese 4:32) Batu ba ba nyalani ba swanela ku sepana ni ku sebeza hamoho ha ba eza likatulo za mwa ku itusiseza masheleñi.
1 MU LELE LIKA KA TOKOMELO
ZE I BULELA BIBELE: “Ki mañi ku mina ya bata ku yaha tawala ya si ke a ina fafasi pili ni ku bala lisinyehelo kuli a bone haiba u na ni masheleñi a ku i feza?” (Luka 14:28) Ki kwa butokwa kuli mu lelange ni bakumina mo mu ka itusiseza masheleñi. (Amosi 3:3) Mu nyakisise kuli ki lika mañi ze mu tokwa ku leka ni kuli ki masheleñi a kuma kai e mu kona ku itusisa. (Liproverbia 31:16) Ku ba ni masheleñi a mi konisa ku leka nto ye ñwi ha ku talusi kuli mu swanela ku leka nto yeo. Mu ambuke likoloti. Mu itusisange feela masheleñi e mu na ni ona.—Liproverbia 21:5; 22:7.
ZE MU KONA KU EZA:
-
Haiba ku ka ba ni masheleñi a ka siyala kwa mafelelezo a kweli, mu eze katulo hamoho ya mo mu ka itusiseza masheleñi ao
-
Haiba kuli masheleñi e mu na ni ona ki a manyinyani kono mu bata ku leka lika ze ñata, mu kusufaze kwa lika ze mu bata ku leka. Ka mutala, mwa kona ku itatehelanga lico za mina ku fita ku yo lekanga lico ze apehilwe kale
2 MU LUKULUHE NI KU BA NI MUBONELO O SWANELA
ZE I BULELA BIBELE: Mu swanela ku “eza lika kaufela ka ku sepahala, isi feela mwa meeto a Jehova, kono ni mwa meeto a batu.” (2 Makorinte 8:21) Mu sepahale ku bakumina ka za masheleñi e mu fumananga ni ka za masheleñi e mu itusisanga.
Mu buzange bakumina ka nako kaufela ha mu eza likatulo ze tuna ze ama masheleñi. (Liproverbia 13:10) Ku ambolisananga za masheleñi ku ka tahisa kuli mwa linyalo la mina ku be ni kozo. Mu si ke mwa nga masheleñi e mu fumananga kuli ki a mina mu nosi, kono mu a nge kuli ki a lubasi.—1 Timotea 5:8.
ZE MU KONA KU EZA:
-
Mu lumelelane kuli mañi ni mañi u kona ku itusisanga bukai ku si na ku buza yo muñwi
-
Mu si ke mwa libelela kuli ku be ni butata pili kona mu ka ambolisana za masheleñi
Hape Mwendi Mwakona Kutabela Litaba Ze
MUZUHE!
Mwa ku Itusiseza Hande Masheleñi
Mu si libeleli kuli konji ha se mu felezwi ki masheleñi, kihona mu ka nahana za mo mu itusisezanga masheleñi. Mu itute mo mu kona ku itusiseza hande masheleñi, mu si ka sinyehelwa kale ki masheleñi kabakala ku sa itusisa ona hande.
TAWALA YA MULIBELELI
Kana na Swanela ku Kolota Masheleñi?
Litaba ze mwa Bibele za kona ku mi tusa ku eza katulo.
