Luikutwanga bumaswe halubona batu babande habanyanda. Batu babañwi babulelanga kuli hakuna tuso ya kuba mutu yomunde kakuli babande ni babamaswe kaufelaa bona bakopana ni manyando.

Batu babañwi balumela kuli batu habashwa bapepwangwa sinca. Batu bao balumela kuli bane baezize zende pili basika shwa kale, bakapepwa sinca ni kupila bupilo bobunde, kono bane baezize zemaswe pili basika shwa kale, bona habashwa, bakapepwa sinca ni kupila bupilo bwa manyando. Batu bao hape balumela kuli nihaiba batu babande bakona kukopana ni manyando kabakala lika zemaswe zene bakile baeza pili basika shwa kale. Kono . . .

• Ki kabakalañi mutu yomunde yaangiwa kuli upepilwe sinca hakopana ni manyando, hailifo mwendi hasa hupula zanaaezize pili asika shwa kale ni kupepwa sinca?

• Ki kabakalañi halusebezanga ka taata kuli lube ni buikangulo bobunde ni kuambuka likozi haiba bupilo bwaluna buitingile fa lika zene luezize kwamulaho?

  MUITUTE ZEÑATA

  Mubuhe vidio yeli, Ki Kabakalañi Mulimu Hatuhelezi Manyando? yefumaneha fa webusaiti ya jw.org/loz.

Kunyanda kwa batu haki koto yezwa ku Mulimu.

Mulimu haki yena yalutahiseza manyando, kono mane fokuñwi batu bakopananga ni manyando kabakala kuba mwa sibaka sesimaswe ka nako yemaswe.

“Babalubilo haki kamita bawina mwa siyano, mi babamaata haki kamita batula mwa ndwa, mi bababutali haki kamita baba ni lico, mi babanani ngana haki kamita baba ni sifumu, mi babanani zibo haki kamita bakondisa, kakuli nako ni likezahalo zesika libelelwa zabatahelanga kaufelaa bona.”—MUEKELESIA 9:11.

Sibi seluhozize silutahiseza manyando.

Hañata batu baitusisanga linzwi la “sibi” hababulela za nto yemaswe yaezize mutu yomuñwi. Kono Bibele yona iitusisanga linzwi leo haitalusa za nto yebahozize batu kaufela, ibe kuli baeza lika zende kamba zemaswe.

“Nipepilwe inze ninani mulatu, mi nibile ni sibi kuzwa feela faitwalela na me.”—SAMU 51:5, Litaluso ze kwatasi.

Sibi sitahisize kuli batu kaufela babe mwa muinelo omaswe hahulu.

Sibi sisinyize silikani saluna ni Mubupi waluna ni kutahisa kuli lupalelwe kupila ka kozo ni libupiwa zeñwi kaufela. Nto yeo itahisize kuli batu kaufela bakopane hahulu ni manyando amañata.

“Hanilakaza kueza sesilukile, sesimaswe ki sona sesili teñi ku na.”—MAROMA 7:21.

“Zebupilwe kaufela lizwelapili kutonga hamoho ni kuutwa butuku hamoho.”—MAROMA 8:22.