Muutwele Babañwi Butuku
Butata
Haiba luisa hahulu pilu kwa shutano yemwahalaa luna ni batu babañwi, lwakona kunahana kuli batu babañwi bamaswe kamba kuli banani butu bobumaswe. Lukaanga batu bao kuli haki ba butokwa. Haluba ni mubonelo ocwalo ka za batu babañwi, haluna kubautwela butuku. Mi kupalelwa kuutwela babañwi butuku kukabonisa kuli lunani moya wa ketululo.
Sikuka sa Mwa Bibele
“Mutabe ni babatabile; mulile ni babalila.” —MAROMA 12:15.
Timana ye ilulutañi? Sikuka sesi mwa timana ye sikona kutaluswa ka bukuswani kuli, muutwele babañwi butuku. Kuutwela mutu butuku ki kuipeya mwa sibaka sahae ni kuikutwa mwaikutwela mutu yo.
Bunde Bwa Kuutwela Babañwi Butuku
Haluutwela mutu yomuñwi butuku, lukalemuha kuli lwaswana ni mutu yo. Lukaziba kuli mutu yo wakona kuikutwa moluikutwelanga mi wakona kueza lika ka nzila yeswana ni moluezezanga. Kuutwela babañwi butuku kulutusa kulemuha kuli batu kaufela baswana kusina taba ni kobasimuluha. Halunze lulemuha kuli batu kaufela baswana ni luna, haluna kukenelwa ki moya wa kubaketulula.
Kuutwela babañwi butuku kuka lutusa kubakuteka. Bo Anne-Marie, ba kwa Senegal, nebanyazisezanga batu bane baangiwa kuli nebazwa mwa sikwata sa batu ba mayemo a kwatasi. Bo Anne-Marie babulela cwana ka za mobatuselizwe ki kuutwela babañwi butuku: “Hane niboni mone banyandela batu bane bazwa mwa sikwata seo, neniipuzize mone nikaikutwela kambe ki na yanaanyanda cwalo. Kunyakisisa taba yeo nekutahisize kuli nilemuhe kuli mayemo aka ene niinga kuli apahami, naasatahisi kuli nibe wa butokwa kubafita.” Haiba luikataza kuutwisisa miinelo yetaata yebakopana ni yona babañwi, luka bautwela butuku kufita kubanyaza.
Zemukona Kueza
Munyakisise lika zeswana mwahalaa mina ni batu bemuunga kuli bamaswe. Ka mutala, munyakisise mobaikutwelanga batu bao
Kuutwela babañwi butuku kulutusa kulemuha kuli batu kaufela baswana
habaca sico ni lubasi lwabona
habakotoka kuzwa kwa musebezi
habatanda nako ni balikani babona
habateeleza kwa lipina zebalata
Hamulaho, mulike kuipeya mwa sibaka sabona. Muipuze kuli:
‘Nikona kuikutwa cwañi haiba mutu anibonisa kuli hani wabutokwa?’
‘Nikona kuikutwa cwañi haiba batu babañwi baniatula inze basa nizibi?’
‘Kambe ni na, ni mwa sikwata sebatoile batu, nenika tabela kuli batu bapilisane cwañi ni na?’
Hape Mwendi Mwakona Kutabela Litaba Ze
TAWALA YA MULIBELELI
Kana Mulimu Unani Mukekecima?
Bibele ilukolwisa kuli Mulimu waluziba ni kuluutwisisa mi waluutwela butuku.
MUZUHE!
Kupila Bupilo Bobunde—Kuikola Bupilo Mwa Lubasi ni Kuba ni Balikani Babande
Kuli mube balikani babande, mutokwa kuba ni moya wa kufana kufita kulibelelanga feela kufiwa.
