Hona Cwale-Cwale Fa Bukebenga ‘Ha Bu Sa Na Ku Ba Teñi’

“Ku sa na ni nakonyana ye nyinyani, mi ya maswe h’a sa na ku ba teñi.”—SAMU 37:10.

MUBUPI wa luna Jehova Mulimu u lata hahulu batu ba bupile; ka ku fapahana ni mo ba nahanela batu ba bañwi, Jehova u na ni taba ni luna. (Samu 11:4, 5) Mi yena mane u bona bumaswe ni bukebenga kaufela bo bu eziwa, nihaiba bo ba sa koni ku bona batu. “Meto a [Muñ’a] Bupilo a mwa mabaka kaufela. Inz’a talima ba ba maswe ni ba bande.” (Liproverbia 15:3) Kacwalo mu zibe kuli ba ba maswe ba mwa “mabaka mo ku telela.”—Samu 73:12, 18.

Kono ba ba lukile, nihaikaba kuli mwendi ba shebile kamba ba hatelelwa, ba na ni sepo ya bupilo bo bunde kwapili. Walisamu Davida na ñozi kuli: “U lemuhe mutu wa niti, u talime ya lukile; kakuli mafelelezo a mutu yo, ki kozo.” (Samu 37:37) Manzwi ao a kona ku lu omba-omba luna ba ba pila kacenu, kakuli lu na ni sepo ya ku a bona ha ka talelezwa hona cwale-cwale fa.

Lu Pila mwa Mazazi a Maungulelo

Lilimo ze bat’o ba ze 2,000 kwamulaho k’o, balutiwa ba Jesu Kreste ne ba buzize puzo ye sa li ya butokwa nihaiba kacenu. Ne ba buzize Jesu kuli: “U lu bulelele . . . se si ka supa ku taha kwa hao, ni ku fela kwa lifasi.” (Mateu 24:3) Kalabo ya Jesu i fumaneha ka butungi mwa Bibele kwa Mateu kauhanyo 24, Mareka kauhanyo 13, ni kwa Luka kauhanyo 21. Likauhanyo ze talu zeo kaufela li bonisa kuli mwa mazazi a maungulelo a lifasi  la cwale ku ka ba ni lindwa, lukupwe, matuku ni lizikinyeho ze tuna mi hape bumaswe bu ka ekezeha hahulu.

Miinelo ye maswe ya na bulezi cimo Jesu ne i kalile ka 1914. Sina mwa n’a bulelezi Eric Hobsbawm, caziba wa litaba za kwaikale mwa buka ya hae ye bizwa Age of Extremes, lilimo za mwanda wa bu 20 “ku si na kakanyo li bile zona lilimo mo ku bulailwe batu ba bañata hahulu haisali.”

Ka ku ama ku ba ba maswe ba ba sweli ku ekezeha kacenu, Bibele i bulela kuli: “Ba ba na ni lunya, niha ba hula inge bucwañi, ni ba ba sebeza bumaswe, niha ba bonahala bunde inge lipalisa, ki fela kuli ba sinyehelele ku ya ku ile.” (Samu 92:7) Ki niti bupaki bwa iponahaza hande kuli bumaswe bo bu sweli ku ekezeha hahulu kacenu—sina lipalisa mo li hulelanga—ki sisupo se si bonisa kuli ba ba maswe hona cwale-cwale fa ba tuha ba timezwa! Kana yeo haki taba ye nde?—2 Pitrosi 3:7.

“Ba Ba Na ni Niti Ba Ka Yola Sanda sa Naha”

Samu 37:29 i bulela kuli: “Ba ba na ni niti ba ka yola sanda sa naha, ni ku yaha mwateñi ku ya ku ile.” Bukebenga ni bumaswe bwa mufuta kaufela ha bu sa na ku ba teñi. Kacwalo lika kaufela ze cwale ka milangu ya ku sabisa likelemi ni ku biza batu ka yona, lipakiso, likuta, licaziba za mulao, mapokola, ni litolongo, ha li sa na ku ba teñi. Bibele i lu sepisa kuli: “Za kale ha li sa na ku hupulwa, nihaiba ku kutela mwa minahano.”—Isaya 65:17.

Ki niti, mwa lifasi ku ka ba ni licinceho ze samba li be teñi haisali. (Isaya 11:9; 2 Pitrosi 3:13) Yeo ki yona sepo ye ba na ni yona Lipaki za Jehova, mi ba mi mema kuli ni mina mu itatubele ili mina kuli mu iponele kuli ki niti lika zeo li tuha li ezahala. Mu si libali kuli Mulimu ya tahisize Mañolo a Kenile ha “koni ku puma.”—Tite 1:2.

[Mbokisi/Siswaniso se si fa likepe 17]

KU TUSA MAPANTITI KU ITUTA ZA MULIMU

Mwa lilimo ze felile, Lipaki za Jehova mwa United States ba amuhezi mañolo a zwa kwa mapantiti ba ba mwa litolongo ni lipatela ze 4,169. Mapantiti ba bañwi ba ikupelanga lihatiso za Bibele; ba bañwi ba ikupelanga ku zamaisezwa lituto za Bibele ze sa lifelwi. Lipaki ba yo potelanga batu ba ba cwalo. Mane mwa lifasi kaufela Lipaki ba yanga mwa litolongo ku yo zamaisa lituto za Bibele kwa mapantiti ba banna ni ba basali ba ba ikupezi ku ituta za Mulimu. Ba bañwi ku bona ba ezize licinceho ze tuna, ba kolobelizwe sina Bakreste, mi ba zwelapili ku latelela milao ya naha.