Ki Mañi Ya Swanela Ku Lu Taluseza Bulapeli bwa Niti?

JESU na bonisize hande kuli mifuta ye miñwi ya bulapeli ha i tabisi Mulimu. Na bulezi ka za “bapolofita ba buhata,” ni ku talusa kuli ba swana sina kota ye beya miselo ye maswe, ye ‘lemiwa ni ku latelwa mwa mulilo.’ Hape na bulezi kuli: “Hasi batu kaufela ba ba li ku na: Mulena, Mulena, ba ba ka kena mwa mubuso wa kwa lihalimu.”—Mateu 7:15-22.

Ka za batu ba ba ipapata ku ba balateleli ba hae, Jesu na bulezi kuli: “Ni ka ba bulelela patalaza, ni li: Ha ni si ka mi ziba haisali; mu zwe ku na, mina ba ba sebezanga ze maswe.” (Mateu 7:23) Ku tuha fo, Jesu na bonisize kuli za na bulezi Mulimu kwa Maisilaele ba baipanguli ne li ama ni ba bahulu ba bulapeli ba mwa miteñi ya hae. Na bulelezi ba bahulu ba bulapeli bao kuli: “Ba ni kubamela ku si na tuso, kakuli tuto ye ba luta, ki milao ya batu.”—Mareka 7:6, 7.

Kacwalo kwa iponahaza hande kuli haki bulapeli kaufela bo bu tabisa Mulimu kamba Mwan’a hae. Mi seo si bonisa kuli haki bulapeli kaufela bo bu li bwa niti. Kana fo ki ku talusa kuli ki bulapeli bu li buñwi fela bo bu luta niti? Esi mwendi Mulimu u tabela likeleke ze ñwi mi u toile ze ñwi? Kamba esi mwendi Mulimu u tabela mutu kaufela ya mu lapela ka swanelo ku si na taba kuli keleke ya hae i luta lituto ze cwañi?

Ka tuso ya moya o kenile, muapositola Paulusi na ñozi kuli: “Na mi lapela banabahesu, ka Libizo la Mulen’a luna, Jesu Kreste, kuli kaufel’a mina mu bulele taba i liñwi, mi likauhano li be siyo ku mina; kono mu kopane hande ka maikuto a li mañwi, ni ka muhupulo u li muñwi.” (1 Makorinte 1:10) Ku zwa fo, Bibele i eleza Bakreste kuli ba be “ni muhupulo u li muñwi, ni lilato li li liñwi, ni moya u li muñwi, ni ku ikutwa kulikuñwi.”—Mafilipi 2:2.

Ha ku ba ni swalisano ye cwalo, ni bulapeli i ka ba bu li buñwi. Kamukwaocwalo, Bibele i bulela kuli “Mulena ki a li muñwi, tumelo ki i liñwi, kolobezo ki i liñwi.”—Maefese 4:4, 5.

Bupaki bwa mwa Bibele

Sina mo se ku taluselizwe, bupaki bwa mwa Bibele bu bonisa hande kuli bulapeli bwa niti ki bu li buñwi. Ha mu  ka batisisa bupaki bo, mu ka lemuha kuli Mulimu na etelela batu ba hae ka ku itusisa bulapeli bu li buñwi fela. Kwa simuluho, Mulimu na itusisize bashemi ba masika kuli ba be bona bayemeli ba hae. Ba ne ba tumile hahulu mwahal’a bashemi ba masika ki ba ba cwale ka Nuwe, Abrame (Abrahama), Isaka, ni Jakobo.—Genese 8:18-20; 12:1-3; 26:1-4; 28:10-15.

Batu ba ne ba simuluha ku Jakobo ne ba til’o ba batanga mwa Egepita. Ha ne ba li mwa Egepita, ne ba nyandisizwe hahulu, niteñi ba ata hahulu. Mulimu na ba lukuluzi mwa butanga ni ku ba silisa Liwate Le Li Fubelu ka makazo. Hamulaho a ba añula sina batu ba hae mi a ba fa milao ka ku itusisa Mushe, muyemeli wa hae. Batu bao ba fita fa ku ba sicaba sa Mulimu sa Isilaele wa kwaikale.—Exoda 14:21-28; 19:1-6; 20:1-17.

Taba ye lu sa swaneli ku libala ki ya kuli Mulimu na si ka tabela linzila ze ne ba lapela ka zona batu ba ne ba potolohile sicaba sa Isilaele. Mane na fanga batu ba hae likoto ha ne ba keluhanga milao ya hae ni ku kala ku lapela sina mo ne ba lapelela batu bao.—Livitike 18:21-30; Deuteronoma 18:9-12.

Ki lika mañi ze ne ba swanela ku eza batu ba macaba a sili ha ne ba bata ku lapela Mulimu wa niti? Ne ba tokwa ku zwa mwa bulapeli bwa buhata kihona ha ne ba ka kalisa ku lapela Jehova Mulimu hamoho ni Isilaele. Buñata bwa bona ne ba tabezwi ki Mulimu mi ne ba fitile fa ku ba batanga ba hae ba ba sepahala. Ba bañwi ba batu bao ne li Rahaba musali wa Mukanana ni Ruti musali wa Mumoabi, Uria munna wa Muhiti ni Ebedi-Meleki munna wa Muetopia; ni likwata za batu ze cwale ka Magibioni. Salumoni Mulena wa Isilaele na lapelezi batu kaufela ba ne ba til’o swalisana ni balapeli ba Mulimu ba niti sina mo ne ba ezelize batu bao. *—2 Makolonika 6:32, 33.

Jesu Ha Sa Tile fa Lifasi

Hamulaho, Jesu ha na lumilwe fa lifasi, lituto za hae ne li bonisize mwa ku lapelela mi milelo ya Mulimu ne i zibahalizwe ka nzila ye ne ikutwahalela hande. Hamulaho wa nako, balapeli ba niti ba kala ku bizwa “Bakreste.” (Likezo 11:26) Kacwalo, Majuda ba ne ba bata ku lapela Mulimu ne ba na ni ku zwa mwa bulapeli bwa bona bwa kale. Ne ba si ka keta ku ya kwa bulapeli bu sili kamba ku itapelela ba nosi. Sina mo se lu bonezi mwa Linzwi la Mulimu, balapeli ba niti ne ba swalisani ka ‘tumelo i liñwi.’—Maefese 4:4, 5.

Kacenu taba ya kuli Mulimu u itusisa fela bulapeli bu li buñwi i kona ku sa tabisa batu ba bañwi. Kono kona mo i boniseza Bibele. Kwamulaho, batu ba bañwi ba ne ba lapelanga ka mo ne ba batela ne ba fitile fa ku lemuha taba yeo. Ne ba kalile ku swalisana ni balapeli ba Jehova ba niti, mi ku si na taba kuli mwendi ne ba kakanya kwa makalelo, ne ba kutuzi limbuyoti ze ñata mi ne ba bile ni tabo ye tuna hamulaho. Ka mutala, Bibele i bulela kuli munna wa Muetopia yo muñwi ha sa amuhezi Bukreste ni ku kolobezwa, “a zwelapili mwa nzila ya hae, a tabile.”—Likezo 8:39.

Kacenu, mutu kaufela ya amuhela bulapeli bwa niti ni ku bu latelela, ni yena u ka amuhela limbuyoti ze ñata. Kono bakeñisa kuli ku na ni bulapeli bo buñata-ñata, mu kona ku ziba cwañi bulapeli bu li buñwi fela bwa niti?

[Litaluso za kwatasi]

[Siswaniso se si fa likepe 27]

Ki sika mañi se si ka ezahala kwa bulapeli bo bu beya miselo ye maswe?