Bupilo Bwa Buiketo Mwatas’a Puso Ya Mulimu

ONA cwale-cwale fa, ha lu sa na ku bilaela za lika ze ka ezahala kwapili, kakuli Mulimu u ka zamaisa lifasi ka mulonga wa hae, ona o bizwa Mubuso wa Mulimu. Jesu Kreste na hupula za taba yeo ha na lutile balateleli ba hae kuli ba lapelange kuli: “Ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.”—Mateu 6:9, 10.

Mubuso wa Mulimu ha u na ku sebelisana ni babusi ba lifasi kamba ku itusisa bona. Ona mane u ka felisa lipuso kaufela za batu, sina mo ku boniselizwe bwa bupolofita bwa Daniele bwa “mazazi a maungulelo,” ona mazazi e se lu pila ku ona cwale. (2 Timotea 3:1) Bupolofita b’o ne bu ize: “Mwa mazazi a malena ao, Mulimu wa mwa lihalimu u ka tahisa mubuso o si na ku sinyeha ku ya ku ile. . . . Mubuso wo, u ka ketula ni ku feza mibuso kaufela; kono ona u ka ba teñi kamita ni ku ya ku ile.” (Daniele 2:44) Manzwi ao h’a fi sepo ku ba ba sepile lipuso za batu, kono a fa sepo ye tiile ku ba ba bata kuli Mulimu a buse ka Mubuso wa hae.

Licinceho ze Nde za Kwapili!

Mubuso wa Mulimu ha u ka busa lifasi kaufela, batu ha ba na ku kauhanywa ki lipuso za linaha, mibala ya matalo a bona, bulapeli bwa bona, kamba ku kauhanywa ki miseto ya linaha. Kono ba ka ba sina lubasi lu lu luñwi lo lu swalisani ka bulapeli ni lilato sakata. (Joani 13:34, 35; 17:3, 17) Mwa Mubuso wa Mulimu, mutu “ya na ni niti u ka konda” mi “kozo i ka ya i ekezeha, ku fitela kweli ha i ka fela.”—Samu 72:7.

Kwand’a lika zeo, Mubuso wa Mulimu hape u ka tusa batu ba ba sepahala ku ba ni mibili ni minahano ye petehile, mi u ka felisa matuku ni manyando kaufela, mane ni lifu. (Sinulo 21:3, 4) Ki lifi ze ka zwa mwa ku eza cwalo? Lifasi kaufela li ka ba paradaisi, ili ku taleleza za na lelile Mulimu kwa makalelo mwa simu ya Edeni.—Genese 1:28.

Taba ye Nde I Liñwi Fela

Ha na bulela za sisupo se ne si ka supa “ku fela kwa lifasi,” Jesu na bulezi nto ye ñwi ye ipitezi. (Mateu 24:3-7) Na ize: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.”—Mateu 24:14.

Mi ka ku latelela tato ya Mulimu yeo, ka 2007 Lipaki za Jehova ba bat’o ba 7 milioni mwa linaha ze 236 ne ba kutalize taba ye nde ya Mubuso, mi ne ba itusisize nako ya bona ye fitelela lihora ze 1.4 bilioni ku eza musebezi wo. Ki kabakalañi Lipaki ha ba kolwa luli kuli lisepiso ze mwa Bibele li ka talelezwa? Kalabo i bunolo. Sina mo i ka boniseza taba ye tatama, Mulimu wa talelezanga za sepisize.—Maroma 3:4.

[Manzwi a fa likepe 16]

Bibele i bulela kuli “kozo i ka ya i ekezeha”