Bupilo Bwa Kwapili Bo Mu Kona ku Sepa!

Mu nge kuli mu fitile fa manganandila mi mu fumana lisupo ze peli. Se siñwi si li, “mu sepe batu ni lisepiso za bona.” Mi se siñwi si li, “mu sepe Mulimu ni Mubuso wa hae.” Ki sifi sisupo se mu ka latelela?

KATULO ye nde ye mu kona ku eza ki ku sepa Mulimu. Mulimu u li: “Ya ni utwa u ka pila mwa kozo, u ka iketa a sa sabi kozi.” (Liproverbia 1:33) Lu utwa Mubupi wa luna ka ku mamela lituto ze mwa Bibele, ka sepo ya kuli lituto zeo za lu tusa. (2 Timotea 3:16) Kana sepo ye cwalo ki ya niti? Eni! Ka mutala, sina mo ne lu bonezi mwa taba ya buleli ya litaba ze, ki Bibele fela i nosi ye talusa ka ku utwahala hande libaka batu ha ba sa koni ku ipusa hande. Kana ha mu lumeli kuli ze i bulela Bibele ki zona luli ze ezahala?

Bupolofita bwa mwa Bibele ni bona bu nepahezi. Ka mutala, Bibele ne i bulezi cimo kuli mwa “mazazi a maungulelo” ku ka ba ni miinelo ye maswe hahulu. Miinelo yeo lu sweli lwa iponela yona luli. (Mateu 24:3-7; 2 Timotea 3:1-5) Bibele mane  ne i bulezi cimo kuli batu ba ka sinya lifasi. Sinulo 11:18 i bulela kuli: Mulimu u ka “yundisa ba ba shandaula lifasi.”

Manzwi ao ha na ñolwa ibata iba lilimo ze 2,000 kwamulaho k’o, lika ze cwale ka silafalo ya moya, liwate, ni lifasi hamohocwalo ni ku yundiswa kwa lifolofolo ni limela ne li siyo ni hanyinyani! Kono cwale lika zeo za ezahala! Kaniti, Mulimu ha pumi. Lika kaufela ze ñozwi mwa Linzwi la hae za talelezwanga ka ku tala. * (Tite 1:2; Maheberu 6:18) Mane Mulimu u konkanga ka libizo la hae.

Libizo le Mu Kona ku Sepa

Mutu ha saina libizo la hae kwa liñolo ku talusa kuli liñolo leo li zwa ku yena. Libizo la Mulimu la Jehova ni lona li tiisa taba ya kuli lisepiso kaufela ze ñozwi mwa Bibele li ka talelezwa. * Muñoli yo muñwi wa Bibele ya na iponezi hañata pabalelo ya Mulimu na ñozi kuli: “Lu sepile Libizo la [Mulimu] le li kenile.”—Samu 33:21; 34:4, 6.

Liñolo la Liproverbia 18:10 li bonisa kuli libizo la Mulimu li paka kuli Mulimu ki mushemi ya lu babalela, li li: “Libizo la [Muñ’a] Bupilo ki mapilelo a tiile, ya lukile u sabela ku ona, mi wa piliswa.” Ka nzila ye swana, Maroma 10:13 i bala kuli: “Mutu ni mutu ya biza Libizo la Mulena u ka piliswa.” Niti kikuli libizo la Mulimu haki nkau ye lu sileleza ku ze maswe. Kono Mulimu ka sibili ki yena ya pilisa, mi ba ba biza fa libizo la hae sina mo li boniseza liñolo, ba eza cwalo kakuli ba mu sepile, mi ze ba mu sepezi kikuli yena ha pumi. Samu 91:14 i bulela kuli: “Lilato la [Jehova] u li isize ku Na, kabakaleo ni ka mu lamulela; ni mu beye fo ku lumbile, kakuli u zibile Libizo la ka.”

Mu ipuze kuli: ‘Ni sepile mañi—Mulimu kamba batu?’ Lipaki za Jehova ba ikatulezi ku sepa Mulimu ni Mubuso wa hae, isi kabakala ku bata fela ku eza cwalo kamba kabakala ku lumela-lumela fela, kono kabakala kuli ba kozwi ka ku tala kuli ba swanela ku eza luli cwalo, ku likana ni zibo ye nepahezi ye ba ipumanezi mwa Bibele. (Maheberu 11:1; 1 Joani 4:1) Ka lona libaka leo, ha ba sabi ze ka ezahala kwapili kono ba ‘tabile ka sepo’ ye ba na ni yona. Ba mi mema kuli ni mina mu be ni sepo ye cwalo.—Maroma 12:12.

[Litaluso za kwatasi]

[Manzwi a fa likepe 18]

Mutu ha sainile libizo la hae kwa liñolo ku talusa kuli liñolo leo li zwa ku yena. Libizo la Mulimu ni lona li tiisa taba ya kuli lisepiso kaufela ze ñozwi mwa Bibele li ka talelezwa

[Mbokisi fa likepe 18]

KI LIBIZO MI HAPE KI TIISEZO

Libizo la Mulimu, la Jehova, haki libizo fela. * Bakeñisañi? Libizo leo li talusa “Ya Tahisa ku Ba Teñi.” Seo si talusa kuli Mulimu u na ni lilato, m’ata, ni butali ze tokwahala kuli a taleleze mulelo ni linzwi la hae. Ka mutala, wa kona ku ba Mupilisi wa ba ba sepahala, Mubulai wa ba ba maswe, Muutwi wa litapelo, kamba Ndate ya lilato—f’o kikuli, wa kona ku ikeza mwa latela.

Jehova u li: “Ki Na Mulimu, . . . nto i sa kala fela ku ba teñi ni se ni bulela ko i ka y’o felela; ni kale ni bulezi se si ka bonahala kwapili, ni li: Mulelo wa ka u ka tiya, ni ka eza se ni lata kaufela.” (Isaya 46:9, 10) Bakeñisa kuli Mulimu ha koni ku puma ni kuli libizo la hae li amilwe mwa lika za bulela, ze ñozwi mwa Linzwi la hae li ka talelezwa luli. “Mulimu haki mutu kuli a bulele buhata.”—Numere 23:19.

[Litaluso za kwatasi]