Hamulaho Wa Mazazi A Maungulelo Ku Ka Ezahalañi?

BATU ba bañwi ba ikalelwa ha ba nahana za “mazazi a maungulelo.” (2 Timotea 3:1) Batu bao ha ba hupula za mazazi a maungulelo, ba nahana fela kuli a ka ba mazazi a t’ata. Kono ki kabakalañi batu ba bañata ha ba nyolezwi nako yeo ku zwa fela kwa makalelo? Kabakala kuli mazazi a maungulelo hape a bonisa kuli lika li ka ba hande kwapili.

Ka mutala, Sir Isaac Newton na lumela kuli hamulaho wa mazazi a maungulelo, lifasi ne li ka ba mwa kozo ni buiketo mwatas’a Puso ya Lilimo ze Sikiti ya Mubuso wa Mulimu. Na bulezi kuli bupolofita bo bu kwa Mika 4:3 ni bo bu kwa Isaya 2:4, ne bu ka talelezwa hamulaho wa mazazi a maungulelo. Bupolofita bo, bu li: “Ka mikwale ya bona ba ka tula mihuma, mi ka malumo a bona ba ka tula licekesi; sicaba se siñwi ha si sa na ku lwanisa se siñwi ka lilumo, mi ha ba sa na ku ituta ndwa.”

Jesu ha na bulezi za mazazi a maungulelo, na susuelize balateleli ba hae kuli ba si ke ba felelwa ki sepo. Hamulaho wa ku ba bulelela za manyando, za matata, ni za sabo ye ne ka ba teñi ka nako ya ñalelwa ye tuna, na ize: “Zeo ha li ka kala ku taha, mu talimise meto kwahalimu, mi mu inuke; kakuli ku liululwa kwa mina ku se ku li fakaufi.” (Luka 21:28) Ne ba ka liululwa kwa lika mañi?

Za Sepisize Mulimu

Lindwa, bukebenga, mifilifili, ni tala ki ze ñwi za lika ze nyandisa batu kacenu ni ze tahisa kuli batu ba bañata ba pile mwa sabo. Kana ni mina mwa nyandiswa ki ze ñwi za lika zeo? Haiba ki cwalo, ha mu bone za sepisize Mulimu:

“Ku sa na ni nakonyana ye nyinyani, mi ya maswe h’a sa na ku ba teñi . . . Ba ba ishuwa ba ka luwa naha, ba ka ikola kozo ye tuna.”—Samu 37:10, 11.

“Sicaba sa ka si ka yaha mwa naha ya kozo, si pile mwa mandu a tiile, mwa mabaka fo ku kuzize, fo ku iketilwe.”—Isaya 32:18.

“[Jehova] ki Yena ya yemisize lindwa mane ni kwa mafelelezo a lifasi; u lobile buta, u pumile lilumo fahali, u cisize makoloi ka mulilo.”—Samu 46:9.

“Kono ba ka ina, mutu ni mutu mwa kota ya hae ya veine ni mwa kota ya hae ya feiga, ku si na ya ba sabisa.”—Mika 4:4.

 “Buloto bu ka ba bo buñata mwa naha, mane ni fahalimu a malundu.”—Samu 72:16.

“Kono ya ni utwa u ka pila mwa kozo, u ka iketa a sa sabi kozi.”—Liproverbia 1:33.

Ku si na taba kuli bupilo mwa sibaka se lu pila ku sona mwendi ki bo bunde hanyinyani, kaufela luna lu tahelwa ki matuku ni lifu. Matuku ni mafu ha na ku ba teñi mwa lifasi le li nca la Mulimu. Kacwalo lu na ni sepo ya ku bona hape bahabo luna ni balikani ba luna ba ba shwile. Ha mu bone lisepiso ze latelela:

“Ha ku na mutu ya . . . ka ipulela kuli: Na kula.”—Isaya 33:24.

“[Mulimu] u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.”—Sinulo 21:4.

“Sila sa maungulelo s’a ka felisa [Mulimu] ki lifu.”—1 Makorinte 15:26.

“Nako ya ta, mo ba ba li mwa mabita kaufela, ba ka utwa linzwi la [Jesu], mi ba zwe.”—Joani 5:28, 29.

Muapositola Pitrosi na talusize lika zeo kaufela ka bukuswani kuli: “Ka sepiso ya hae, lu talimezi lihalimu le linca, ni lifasi le linca, mo ku yahile Ku Luka.” (2 Pitrosi 3:13) Kuli ku luka ku be teñi fa lifasi kaufela, ba ba maswe kaufela ba na ni ku zwisiwa fateñi. Ni macaba a li teñi a tisa mifilifili ni lipulayano kacenu bakeñisa buitati ni ona a swanela ku zwisiwa fa lifasi. Mibuso kaufela ye fa lifasi i ka yolwa ki Mubuso wa Mulimu o mwatas’a Kreste. Ka za puso yeo, lu sepisizwe kuli: “U ka hulisa mubuso, ni ku tiisa kozo ye sa feli mwa lubona lwa Davida ni mwa mubuso wa hae; u ka u zamaisa ni ku u tiisa ka likatulo ni ka mulao, cwale, ni ku ya ku ile. Ki sona s’a tukufalezwi ku eza [Muñ’a] Bupilo wa limpi.”—Isaya 9:7.

Mwa kona ku ikola limbuyoti zeo, kakuli Bibele i lu sepisa kuli: ‘Mulimu u lata kuli batu kamukana ba piliswe, mi ba fite fa zibo ya ku ziba niti.’ (1 Timotea 2:4) Mu si ke mwa zina-zina. Mu itute zibo ye libisa kwa bupilo bo bu sa feli. (Joani 17:3) Mwa kona ku eza cwalo ka ku ñolela bahatisi ba magazini ye ni ku ba kupa kuli ba mi tuse ku ituta Bibele.

[Maswaniso a fa likepe 24, 25]

Mwa kona ku ba ni sepo ya ku pila ku ya ku ile ka kozo inze mu na ni buikangulo bo bunde mwa Paradaisi fa lifasi fa