“Kuli Luli Ki Yena Mwan’a Ka Yo?”

Bo Scott ni bo Sandra * ne ba komokile hahulu mwan’a bona wa lilimo ze 15 wa musizana ha kena mwa ndu. Milili ya hae ye ne li ye misweu, cwale ne se li ye mifubelu! Mi nto ye ne komokisize hahulu ki mwa na bulelela.

“Kana ne lu ku lumelelize ku pilula milili ya hao?”

“Batili, kono ne mu si ka ni hanisa.”

“Kiñi ha ne u si ka lu buza?”

“Kakuli ne ni ziba kuli ne mu ka ni hanisa!”

BO Scott ni bo Sandra ba kona ku lumelelana ni mina kuli, mwana ha nonoboka u tahelwanga ki licinceho ze tuna mwa bupilo, ze ama ni bashemi ba hae. Kaniti, ha ku na mushemi ya ziba licinceho ze tuna ze ka ezahala ku mwan’a hae ha nz’a hula. Me yo muñwi kwa naha ya Canada ya bizwa Barbara na ize: “Ne lu si ka lemuha kuli mwan’a luna u sweli wa cinca. Ne ni komokile, mi se ni ipuza kuli: ‘Kuli luli ki yena mwan’a ka yo?’ Mane ne ni ikutwa inge kuli mwendi ha ne lu lobezi ku na ni ba ne ba til’o nga mwan’a luna ni ku lu siyela u sili!”

Bo Barbara, haki bona fela ba ba kile ba ikutwa cwalo. Ha mu utwe ze ba bulezi bashemi ba mwa linaha ze ñwi za lifasi kwa bañoli ba hatiso ya Mu Zuhe!

“Mwan’a luna wa mushimani ha na nonoboka, ka sipundumukela a kala ku ba hahulu ni muñañatoho ni ku sa lu kolwa.”—Bo Lia, ba kwa Britain.

“Bana ba luna ba basizana ne ba kalile ku iseza hahulu pilu kwa ponahalo ya bona.”—Bo John, ba kwa Ghana.

“Mwan’a ka wa mushimani na bata ku ikezezanga likatulo. Na sa lati ku bulelelwa za ku eza.”—Bo Celine, ba kwa Brazil.

“Mwan’a luna wa musizana na sa tabeli kuli lu mu tubete kamba ku mu kumbata.”—Bo Andrew, ba kwa Canada.

“Bana ba luna ba bashimani ba kala ku ba ba mifilifili. Ku fita ku amuhela likatulo za luna, ba kala ku li kakanyanga ni ku li lwanisa.”—Bo Steve, ba kwa Australia.

“Mwan’a ka wa musizana na sa talusangi maikuto a hae. Na kuzanga fela mi ha ne ni batanga ku ziba libaka, na nyemanga.”—Bo Joanne, ba kwa Mexico.

“Bana ba luna ne ba patanga ze ne ba eza mi ne ba sa lati kuli lu li zibe. Mi hañata ne ba tabela fela ku ba ni balikani ba bona ku fita ku ba ni luna.”—Bo Daniel, ba kwa Philippines.

Haiba mu bashemi ba ba na ni bana ba ba sa nonoboka, ze ba bulezi bashemi ba bañwi fahalimu mwendi li swana ni ze mu ipulelelanga. Haiba ku cwalo, mu kolwe kuli mwa kona ku utwisisa libaka mwan’a mina ha bonahala ku cinca. Bibele ya kona ku mi tusa. Ka nzila ifi?

Butali ni Kutwisiso

Lishitanguti la mwa Bibele li bulela kuli: “U ipatele butali, u ipatele [kutwisiso, NW].” (Liproverbia 4:5) Butali ni kutwisiso ki za butokwa kuli mu lute mwana ya sa nonoboka. Mu tokwa ku ba ni kutwisiso kuli mu kone ku lemuha mupilelo wa mwan’a  mina ni za ipumana ku zona. Hape mu tokwa ku ba ni butali kuli mu kone ku ziba ze mu swanela ku eza kuli mu tuse mwan’a mina ku ba mutu yo munde.

Mu si nahani kuli mwan’a mina ha mi tokwi kabakala kuli ha mu sa swalisana hahulu ni yena. Niti kikuli, bana ba ba sa nonoboka ba tokwa tuso ya bashemi ba bona ka nako ye t’ata yeo ya bupilo bwa bona. Kutwisiso ni butali li kona ku mi tusa cwañi ku ziba mwa ku ba tuseza?

[Litaluso za kwatasi]