Mazazi A Maungulelo—A Talusañi?

LIPULELO za kuli “mazazi a maungulelo” ni “nako ya maungulo” ne li bulezwi kale-kale k’o mwa Bibele. (2 Timotea 3:1; Daniele 12:4) Lilimo ze fitelela 2,500 kwamulaho, mupolofita Daniele na boni lipono ze ne bonisa mibuso ya lifasi ni lindwa ze ne ka ba teñi mwahal’a mibuso yeo ku isa mane mwa “nako ya maungulo.” Daniele na bulelezwi kuli taluso ya lipono zeo ne i ka zibahala mwa linako za maungulo. (Daniele 8:17, 19; 11:35, 40; 12:9) Daniele hape na ñozi kuli: “Mwa mazazi a malena ao, Mulimu wa mwa lihalimu u ka tahisa mubuso o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela; kono ona u ka ba teñi kamita ni ku ya ku ile.”—Daniele 2:44.

Jesu Kreste ha na alaba puzo ya ‘se ne si ka supa ku taha kwa hae, ni ku fela kwa lifasi,’ na bulezi ka za “mafelelezo.” (Mateu 24:3-42) Ku bonahala kuli Daniele ni Jesu ne ba talusa za maungulo a lika, a ka ama batu kaufela ba ba pilile fa lifasi ni ba ba sa pila. Daniele na ñozi za ku fela kwa mibuso kaufela ya lifasi. Jesu na bulezi za “ku fela kwa lifasi.”

Kana lwa swanela ku isa pilu kwa taba yeo? Eni. Batu kaufela ba swanela ku isa pilu kwa taba yeo, kakuli i ama mañi ni mañi. Niteñi, batu ba bañata ba keshebisa taba yeo. Bibele ne i polofitile kuli: “Mwa mazazi a maungulelo, ku ka taha basheununi ba ba tezi busomi, ba ba zamaya ka litakazo za bona luli; ba ka sheununa, ba li: I kai sepiso ya ku taha kwa hae? Kakuli isamba ba shwa bokuku ba kale, linto kamukana li nze li itulezi mo ne li inezi kwa makalelo ha li eziwa.” (2 Pitrosi 3:3, 4) Kaniti, ba bañwi kacenu ba nga kuli lika ze sweli ku ezahala kacenu ne li ezahalanga ni kwamulaho mi li ka zwelapili hona cwana ku ya ku ile.

Kana ku na ni bupaki bo bu bonisa luli kuli lu pila mwa mazazi a maungulelo a bulezwi mwa Bibele? Ha lu boneñi haiba bu teñi.