“Mu Zamaiswe Ki Moya Wa Mulimu”

Mukopano wa Sikiliti wa Lipaki za Jehova

▪ MIKOPANO ya sikiliti ya mazazi a malalu ye ne kalezi mwa United States ka la May 23-25, i ka eziwa mwa litolopo ze ñata za lifasi mwa likweli ze taha. Batu ba ba fitelela 12 milioni mwa silimo sa 2007 ne ba fumanehile kwa mikopano ya sikiliti ye 3,200 ye swana ni ye ka eziwa silimo se!

Silimo se mukopano wo u ka kalisanga ka 8:20 a. m. mwa libaka ze ñata, mi u ka kalisanga ka lipina. Toho ya taba ya la butanu ye zwa mwa liñolo la Joani 16:13, i li: “Moya . . . U Ka Mi Isa Mwa Niti Kaufela.” Kwa lingambolo za pili, ku na ni ye li: “Ki Kabakalañi ‘Ha Lu Swanela ku Zamaiswa ki Moya wa Mulimu?’” ni ye li “Moya o Kenile Ne U Itusiswa Lika Ha Ne Li Bupiwa.” Ngambolo ya ka ku tatamana ye li: “Batanga ba ba Sepahala ba Kwakale Ne Ba Zamaiswa ki Moya wa Mulimu” i ka ba ni likalulo ze li “Mwa Linako za Mushe” “Mwa Linako za Baatuli,” ni “Mwa Lilimo za Mwanda wa Pili.” Ngambolo ye tuna ye li: “Ze U Peta Moya o Kenile mwa Mulelo wa Jehova,” i ka ba yona ya mafelelezo kakusasana.

Ngambolo ya pili la Butanu musihali i li: “Ku Alaba Lipuzo ka za Moya o Kenile,” mi i ka latelelwa ki lingambolo ze li: “Moya U Batisisa Ze Tungile za Mulimu” ni “Mu Be Bautwi ni Baezi ba Linzwi la Mulimu.” Ngambolo ya ka ku tatamana ye li: “Ba Banca—Mu Zamaye ka Moya o Kenile!” i na ni likalulo ze li “Ha Mu Li kwa Sikolo,” “Ha Mu Li kwa Mubeleko,” “Mwa Lubasi,” “Mwa Puteho,” “Ha Mu Itabisa,” ni “Ha Mu Li Mu Nosi.” Ngambolo ya mafelelezo musihali ye li: “Ba Banca—Mu Bukeleze Bulikani bwa Mina ni Jehova,” i ka tusa mikulwani ku ziba mwa ku tiiseza silikani seo.

Toho ya taba ya la Mukibelo ili ‘Ku Calela Moya,’ i zwa mwa liñolo la Magalata 6:8. Kakusasana ku ka ba ni ngambolo ya ka ku tatamana ya likalulo ze talu, ye li: “Lu Zamaiswa ki Moya wa Mulimu mwa Bukombwa bwa Luna.” Ngambolo ya kolobezo ki yona ye ka ba ya mafelelezo kakusasana, mi kihona linumwana li ka yo kolobezwa.

Ngambolo ya pili la Mukibelo musihali i li: “Bañoli Ba Bibele—Ne ‘Ba Susumezwa ki Moya o Kenile,’” mi i ka latelelwa ki ngambolo ya ka ku tatamana ya likalulo ze ketalizoho, ye li: “Ku Tiiswa ki Moya o Kenile” “Kuli Mu Tiyele Miliko,” “Kuli Mu Tiyele Ku Katala ni ku Zwafa,” “Kuli Mu Tiyele Nyandiso,” “Kuli Mu Hane Ku Yembululwa ki Balikani Ba Ba Maswe,” ni “Kuli Mu Itiise Mwa Matata.” Ngambolo ye li: “Mu Tiiseze Mwa Lilato la Mulimu” ki yona ye ka ungula tukiso ya lizazi leo.

Lingambolo za la Sunda kakusasana li ka nyakisisa toho ya taba ye li: “Mu Zamaye ka Moya,” ye zwa mwa liñolo la Magalata 5:16. Ngambolo ya ka ku tatamana ye na ni likalulo ze 9, ye li: “Mu Beye ‘Muselo wa Moya ” i nyakisisa kalulo ni kalulo ya muselo wa moya ye bulezwi kwa Magalata 5:22, 23. Ngambolo ya nyangela ye li: “Mu Kutule Limbuyoti Ka Mulena ya Zamaiswa ki Moya wa Jehova!” i ka ungula tukiso ya kakusasana. Mi musihali ku ka ba ni drama ye tabisa ya batu ba ba apezi mikanjo, ye li: “Mu Si Tuheli ‘Lilato la Mina la Pili.’” I bonisa lika ze kulubelwa kuli kona ze ne ezahala kwa Bakreste ba mwa miteñi ya Baapositola. Mukopano wo u ka fela ka ngambolo ye li: “Ku Sebeza ka Busepahali Mwa Kopano ye Zamaiswa ki Moya wa Jehova.”

Mu kalise ku itukiseza kuli mu yo fumaneha teñi. Kuli mu zibe sibaka ko u ka ezezwa mukopano fakaufi ni mina, mu buze kwa Ndu ya Mubuso ya Lipaki za Jehova ye fakaufi ni mina kamba mu ñolele kwa bahatisi ba magazini ye.