Mu Kona ku fumana Kai likalabo?

MULELO wo muñwi wa bulapeli ki ku luta batu za mulelo wa bupilo. Nihakulicwalo, batu ba bañata ba lemuhile kuli takazo ya bona ya ku bata ku lapela ha i si ka kolwiswa ki lituto za bulapeli bwa bona. Musali ya bizwa Denise, ya na huliselizwe mwa keleke ya Katolika, ha iheta u li: “Katekisema ka kwa Baltimore ne ka kopanyeleza puzo ye li, ‘ki kabakalañi Mulimu ha na lu bupile?’ mi ne ka na ni kalabo ye li, ‘Mulimu na lu bupile kuli a bonise bunde bwa hae ni kuli a ikole ni luna tabo ye sa feli kwa lihalimu.”

Bo Denise ba zwelapili kuli: “Kalabo yeo ne i si ka talusa hande libaka le ni pilela. Haiba ni libelela fela ku ya kwa lihalimu, ni swanela ku ezañi fa lifasi ha ni nze ni libelela?” Batu ba bañata ba na ni maikuto a swana ni a bo Denise. Patisiso ye ne ezizwe ne i patuluzi kuli buñata bwa batu ba ne ba ambotilwe ba lumela kuli likeleke ni lisinagoge ze ñata ha li tusi batu ku ziba mulelo o ba pilela.

Kabakaleo, batu ba bañata ba bata likalabo ku sili—kwa sayansi kamba kwa lituto ze shutana-shutana za mihupulo ya batu, kwa lituto ze bonisa kuli bupilo ha bu na tuso, ni kwa lituto ze bonisa kuli mulelo wa bupilo u itingile ku mañi ni mañi ka mwa bata ku pilela. Ki kabakalañi batu ha ba zwelapili ku bata ku ziba libaka le ba pilela, nihaike kuli ki ba sikai fela ba ba bonahala ku fumana kalabo?

Lu Bupilwe ni Takazo ya ku Bata ku Lapela

Caziba ya bizwa Dr. Kevin S. Seybold u talusa takazo yeo kuli “ki mukwa o bonahala ku ba wa batu kaufela wa ku bata ku lapela nto ye ñwi.” Mwa lilimo za cwanoñu fa, ba sayansi ba sikai  ba fitile fa ku lumela kuli batu ba pepilwe ni takazo ya ku bata ku ziba mulelo luli wa bupilo. Mane ba sayansi ba bañwi ba lumela kuli mibili ya batu mo i bupezwi i bonisa kuli ka sipepo ba tokwa ku ba ni swalisano ni m’ata a pahami hahulu.

Nihaike kuli bocaziba ba kakanya ka za haiba batu ba na ni butokwi bwa ku lapela, buñata bwa batu ha ba tokwi ku talusezwa ki bocaziba kuli ba lumele kuli ba na ni takazo ya ku lapela Mulimu. Takazo ya ku bata ku lapela, ili ye mwa pilu ya luna, ki yona ye tahisanga kuli lu buze lipuzo ze ngiwa ki batu ba bañwi kuli ki za butokwa hahulu, sina lipuzo za kuli: Lu pilelañi? Lu lukela ku itusisa cwañi bupilo bwa luna? Kana lu ka ikalabela ku Mubupi ya m’ata ote ka ku ya ka likezo za luna?

Haiba mu talimisisa ka tokomelo lika za ka taho ze mwa lifasi, mu ka fumana likalabo ze ñwi kwa lipuzo ze. Ka mutala, mu nyakisise lika za ka taho ze komokisa, ku kala ka mifuta ya libupiwa ze na ni fela selusi iliñwi ku isa kwa likutu za linaleli ze bizwa galactic clusters, ze kwahule hahulu ni lifasi la luna. Kana lika zeo ha li lu bonisi kuli ku na ni Muezi ya na ni zibo ye tuna hahulu, kamba Mubupi? Bibele i bulela kuli: “Kakuli za Mulimu ze sa bonwi, ona mata a hae a kamita ni bumulimu bwa hae, ki ze bonahala hande haisamba lifasi li ezwa, inze li lemuhiwa mwa misebezi ya hae. Hakulicwalo ha ba na mo ba ka itatulela.”—Maroma 1:20.

Mu Kolwise Takazo ya Mina ya ku Lapela

Bibele ha i talusa Mulimu mwa na bupezi batu, i li: “Mane u beile mwa pilu ya mutu zibo ya linako ze sa feli.” (Muekelesia 3:11) Lu bupilwe ni takazo ya ku pila, isiñi ya ku shwa. Takazo ya luna ya ka sipepo ki ku bata ku ziba mulelo wa bupilo, ku fumana likalabo kwa lipuzo za luna.

Mane ku bata likalabo, ki mukwa wa batu. Hamulaho wa ku ñola ze ba petile batu ku za sayansi ni ku za bumapangapanga, muñoli wa koranta ye bizwa The Wall Street Journal na ñozi kuli: “Lu sa siyalezwi ki lipuzo ze cwale ka za kuli, ki luna bomañi, lu pilelañi mi lu libile kai”? Ka butali, lu ka bata likalabo kwa simbule se sinde hahulu. Ha i talusa ka za Simbule seo, Bibele i bulela kuli: “Mulimu ki yena ya lu bupile, ha si luna beñi lu ibupile.”—Samu 100:3, NW.

Kuli lu kone ku kolwisa takazo ya luna ya ku lapela, kana ha si nto ye swanela ku bata likalabo ku Yena ya tahisize limakazo zeo za pupo? Jesu Kreste na susuelize kuli lu eze fela honacwalo. Na lemuhile kuli Musimululi wa bupilo—yena Mubupi wa luna—ki yena fela ya kona ku kolwisa takazo ye lu na ni yona mwa pilu, ili ya ku bata ku lapela Mulimu.—Samu 36:5, 9; Mateu 5:3, 6, NW.

Kaniti luli, kuli lu kolwise takazo ye mwa lipilu za luna ya ku bata ku lapela Mulimu, lu tokwa hahulu ku fumana kalabo kwa puzo ye, ye li: Lu pilelañi? Shangwe mu nyakisise maikuto a Mubupi wa luna a wetulusa ka za taba ye.