Ba Banca ba Buza Kuli

Ni Kona ku Ezañi Kuli ni Lapelange Hande?

“Ha u na ni lika ze ñata za ku eza kwa sikolo, kwa mubeleko, kamba ni balikani ni mabasi, wa kona ku libala fokuñwi kuli Mulimu ki yena wa butokwa hahulu.” —Faviola, wa lilimo ze 15, wa kwa United States.

“MU LAPELE ka ku sa lisela.” (1 Matesalonika 5:17) “Mu tundamene mwa ku lapela.” (Maroma 12:12) “Mu zibise Mulimu se mu bata.” (Mafilipi 4:6) Haiba mu Bakreste, mañolo ao mwendi mu a ziba hande. Hape mwendi mwa izibela hande kuli tapelo ki nzila ye makaza ya ku bulela ka yona. Ha mu nahane fela—nako ifi kamba ifi mwahal’a lizazi kamba mwahal’a busihu, mwa kona ku bulela ku Mulimu Ya M’ata Ote! Mi Bibele i bulela kuli: ‘Wa lu utwanga.’ *—1 Joani 5:14.

Nihakulicwalo, ni mina mwa kona ku ikutwa kuli ku lapela ku t’ata, sina mukulwani ya bulezwi kwa makalelo a taba ye. Haiba kona mo mu ikutwela, mu kona ku ezañi ka za teñi? Taba ye i ka mi tusa (1) ku ziba butata, (2) ku itomela sikonkwani ka za tapelo, ni (3) ku ziba mwa ku tatululela butata bo ilikuli mu pete sikonkwani sa mina.

Pili ha lu zibeñi butata. Ki lika mañi ka za tapelo ze li ze t’ata hahulu ku mina? Mu ñole kalabo ya mina mwatasi.

․․․․․

Sa bubeli se mu swanela ku eza ki ku toma sikonkwani. Kwa likonkwani ze bonisizwe mwatasi, mu laitele si li siñwi se ne mu ka bata ku peta, kamba mu ñole sikonkwani hamulaho wa taba ye li, “Ze ñwi.”

□ Ni bata ku lapelanga hahulu.

□ Ni tabela kuli mwa litapelo za ka ni bulelange lika ze shutana-shutana.

□ Ni tabela kuli litapelo za ka li zwelelange kwa pilu.

□ Ze ñwi

Ku Tatulula Butata

Tapelo i swana sina sikwalo se mu kona ku kwalula nako ifi kamba ifi. Niteñi, mikulwani ba bañata ba kana ba bulela kuli ha ba lapelangi hahulu kamba kuli ha ba lukuluhangi hahulu ku lapela. Haiba ni mina mu ikutwa cwalo, mu si ke mwa tuhela! Ki kale mu lemuha butata mi mu tomile sikonkwani. Cwale mu tokwa fela ku ziba mwa ku  tatululela butata bo. Ha mu nyakisise matata o mu kona ku kopana ni ona, ni liakalezo za mwa ku a tatululela.

▪ Butata: KU SA ISEZA PILU KWATEÑI. “Linako ze ñwi kabakala ku ba ni ze ñata za ku eza, na keshebisanga ku lapela.”—Preeti, wa lilimo ze 20, wa kwa Britain.

Tatululo: “Mu tokomele mo mu zamaela, mu si ke mwa ba sina likuba, kono mu be sina ba ba butali. Mu yolise linako kakuli mazazi s’a li a maswe.”—Maefese 5:15, 16.

Akalezo: Mu ketelele cimo nako ye mu ka lapelanga zazi ni zazi ili ye mu bona kuli i lukile. Mane mwa kona ku i ñola fa pepa, sina fela mo mu ñolelanga lika ze ñwi ze mu lelanga ku peta kuli mu si ke mwa libala. Musizana yo muñwi wa lilimo ze 18 ya bizwa Yoshiko, ili wa kwa Japan, u li: “Ha ni sa itomelangi nako ya ku lapela, ni patehanga hahulu ku eza lika ze ñwi.”

▪ Butata: KU LYANGANISWA KI LIKA LI SILI. “Na palelwanga ku nahana fela za tapelo, mi ni lyanganiswanga ki ku nahana lika li sili ku fita lika ze ni bulela.”—Pamela, wa lilimo ze 17, wa kwa Mexico.

Tatululo: “Mulomo u buleliswa ki se si tezi mwa pilu.”—Mateu 12:34.

Akalezo: Haiba hañata mu nahananga za lika li sili ha mu lapela, mu like ku lapelanga litapelo ze kuswani—ku fitela mu ka kona ku lapela mu sa yembuluki. Akalezo ye ñwi ki ye: Mu lapele ka za litaba ze kwa pilu ya mina. Musizana wa lilimo ze 14 ya bizwa Marina, wa kwa Russia, u li: “Ha ne ni keni mwa lilimo za bwalyanjo, ne ni kalile ku nahanisisa taba ya kuli tapelo ki ku bulela luli ni Mulimu. Taba yeo ne i ni susuelize ku mu bulelela lika ze kwa pilu ya ka.”

▪ Butata: MULAPELELO O SWANA. “Ha ni lapelanga, ni lemuhanga kuli ni kuta-kutelanga ku bulela lika ze swana.”—Dupe, wa lilimo ze 17, wa kwa Benin.

Tatululo: “Ni ka hupula misebezi ya hao kaufela, ni bulele likezo za hao.”—Samu 77:12.

Akalezo: Haiba mu lapelanga fela mu si ka lela za ku bulela, zazi ni zazi mu ñolange nzila iliñwi ye mu fuyauzwi ka yona ki Mulimu mwa bupilo bwa mina. Cwale mu itumele ku Jehova ka mwa mi fuyaulezi. Mu eze cwalo ku fitela sunda i kwana, mi ka ku eza cwalo mu ka be mu lapezi litaba ze 7 ze shutana ku si na ku kutela ze mu bulezi kale. Mu eze cwalo ni ha ku taha kwa likezahalo za ka zazi. Mukulwani wa lilimo ze 21 ya bizwa Bruno, wa kwa Brazil, u li: “Ha ni lapelanga, ni lapelanga ka za lika ze ezahalile ona lizazi leo.” Musizana wa lilimo ze 18 ya bizwa Samantha, wa kwa United States, ni yena u ezanga honacwalo. U talusa kuli: “Ni likanga ku nahana za lika ze ezahezi mwa lizazi ili ze sa swani ni ze ne ezahezi mwa mazazi a mañwi, mi kona ni lapela ka za lika zeo. Ku eza cwalo ku ni tusanga ku sa kuta-kutela ku bulela lika ze swana.”

▪ Butata: KU TOKWA SEPO. “Ha ne ni lapelanga ka za matata kwa sikolo, na sa felangi. Mi mane hamulaho ne ni banga ni matata a mañata. Ne ni ipuzanga kuli: ‘Cwale tuso ya ku zwelapili ku lapela ki ifi? Haili fo Jehova yena ha ni utwi!’”—Minori, wa lilimo ze 15, wa kwa Japan.

Tatululo: “Hamoho ni muliko [Jehova Mulimu] u ka mi fa nzila ya ku zwa ku ona, kuli mu kone ku itiisa ku ona.”—1 Makorinte 10:13.

Akalezo: Taba ya niti kikuli: Jehova ki “Ya utwa milapelo.” (Samu 65:2) Kacwalo ha se mu felize ku lapela, mu like ku utwisisa muinelo kaufela. Ku fita ku libelela fela kalabo ye mu tokwa, mu like ku bona nzila ye ñwi mo i alabezwi tapelo ya mina. Bakeñisa kuli mu sa zwelapili ku itiisa mwa butata bo, inze mu sa li Bakreste, seo ki sisupo sa kuli Jehova mwendi na alabile tapelo ya mina—isi ka ku felisa butata kono ka ku mi fa m’ata a ku mi konisa ku tiyela butata bo.—Mafilipi 4:13.

▪ Butata: KU IKUTWA MASWABI. “Ha ni nahananga ze ba kona ku bulela bo ni kena ni bona sikolo haiba ba ni bona inze ni lapela, ni ikutwanga maswabi.”—Hikaru, wa lilimo ze 17, wa kwa Japan.

 Tatululo: “Nto ni nto i na ni nako ya yona.”—Muekelesia 3:1.

Akalezo: Nihaike kuli batu ba bañwi ba kana ba tabela ha ba mi bona inze mu lapela, ha mu swaneli ku lapela ka ku bata kuli mañi ni mañi a lemuhe kuli mwa lapela. Ka mutala, tapelo ye kuswani ya na lapezi munna ya sepahala Nehemia fapil’a Mulena Aritazerisi ku bonahala kuli ne li ya mwa pilu, mi ha ku na ze bonisa kuli mulena na lemuhile nihaiba hanyinyani kuli Nehemia na lapela. (Nehemia 2:1-5) Ni mina mwa kona ku lapelela mwa pilu ku Jehova mu sa lemuhiwi ki batu.—Mafilipi 4:5.

▪ Butata: KU IKUTWA KU SA SWANELA. “Jehova ni kale wa ziba za matata a ka. Mi haiba na ni a nyikwile, ni bona kuli ni yena mwendi u a nyikwile! Linako ze ñwi ni ikutwanga kuli ha ni swaneli ku bulela se siñwi ku yena.”—Elizabeth, wa lilimo ze 20, wa kwa Ireland.

Tatululo: “Mu nepele lipilaelo za mina kaufela fahalimw’a [Mulimu] . . . , kakuli wa mi tokomela.”—1 Pitrosi 5:7.

Akalezo: Ha mu nze mu ituta mu nosi, mu eze lipatisiso ni ku nahanisisa ka za mañolo a latelela: Luka 12:6, 7; Joani 6:44; Maheberu 4:16; 6:10; 2 Pitrosi 3:9. Litimana zeo li ka mi tusa ku lemuha kuli Jehova u bata ku utwa ze mu bulela ni kuli ha mu tokwi ku ba Mukreste ya ipitezi hahulu kuli a kone ku mi utwa. Walisamu Davida—ya na bile ni lipilaelo ni manyando mwa bupilo bwa hae—na bonisize kuli na kolwa kuli “[Muñ’a] Bupilo u fakaufi ni ba ba na ni pilu ye lobehile, mi u pilisa ba ba ikutwa ku swaba mwa moya wa bona.” *—Samu 34:18.

Se si bonisa kuli Jehova yena ka sibili wa mi iseza pilu ki taba ya kuli wa utwanga litapelo za mina. Musizana wa lilimo ze 17 ya bizwa Nicole, wa kwa Italy, u li: “Jehova ha si ka fa m’ata kwa mangeloi kuli a teelezange litapelo za luna. Kaniti, bakeñisa kuli wa teelezanga kwa litapelo za luna, u swanela ku li nga kuli ki za butokwa.”

Mwa kona ku ipalela litaba ze ñata za ba banca fa Intaneti ka keyala ya www.watchtower.org/ype

[Litaluso za kwatasi]

ZA KU NAHANISISA

▪ Ki lika mañi za butokwa ku Jehova ze mu kona ku lapela ka za teñi?

▪ Ki lika mañi ze lu kona ku lapela ku Jehova ka za ba bañwi?

[Mbokisi/Maswaniso a fa likepe 20]

ZE BA BULELA LITAKA ZA MINA

“Tapelo i swana inge buka ya ku ñolela likunutu, ye konwa ku fumanwa fela ki wena ni Jehova.”—Olayinka, wa kwa Nigeria.

“Mu nge kuli mu na ni mulikani yo mutuna mi mu mu file limpo ze ñata. Mi zazi le liñwi, mulikan’a mina yo u tuhela ku mi bulelisa. Honacwalo ki mona mwa swanela ku ikutwela Jehova haiba lu tuhela ku lapela ku yena.”—Chinta, wa kwa Australia.

“Kamita ne ni nahananga kuli ku fosahezi ku talusa maikuto a ka. Tapelo i ni tusize ku lemuha kuli ha ku si ka fosahala ku ba ni tabo ni maswabi kamba ku zingeha ni ku talusa maikuto ao ku Jehova. Nako ye, na ziba mo ni kona ku ezeza hande ka za maikuto o ni ba ni ona.”—Amber, wa kwa United States.

 [Siswaniso se si fa likepe 27]

Haiba sikwalo kwa tapelo si bonahala kuli si kiilwe, mu itusise likii ze mwa linzwi la Mulimu, yona tatululo ye mwa Bibele