‘Kabati ye Kona ku Kwalululwa Feela ki Jehova’

▪ Mwa 2007, Erika wa lilimo ze silezi ni Mattia wa lilimo zee ne, ba shwelwa ki bo ndataa bona. Kono butuku bo ne ba utwa banana ba, bu kuyuzwi ki sepo ya zuho.—Likezo 24:15.

Erika u tabela ku taluseza ba bañwi za sepo ya hae ye tomile fa Bibele, sihulu u ezanga cwalo kwa sikolo saa kena ku sona mwa Sicily. Ka mutala, mulikanaa hae Beatrice ha naa bulezi kuli bo ndatahe Erika ne ba li kwa lihalimu cwale, Erika ka maseme a alaba kuli Bibele ha i bonisi kuli ba ile kwa lihalimu. Beatrice a buza kuli: “Cwale ba kai he?”

Erika a alaba kuli: “Ba mwa libita.” Cwale Beatrice naa bata ku ziba kuli libita nee li nto mañi.

Erika a talusa kuli: “Li swana inge kabati ye kwaluluha ni ku kwala. Kono kabati yeo ha se i kwalilwe, ha u koni ku i kwalulula. Ki Jehova feela ya kona ku i kwalulula, lifasi le linca ha li ka taha.”

Erika cwale a taluseza mulikanaa hae kuli Jehova ki lona libizo la Mulimu, mi u ka tisa paradaisi fa lifasi, ni kuli ha ku na ku ba ni matuku hape, mi ni kuli bafu ba ka zusezwa kwa bupilo. Cwale Erika a taluseza Beatrice kuli a yo buza bo mahe haiba ba ka mu lumeleza kuli a fiwe buka ye talusa ona litaba ze kaufela.

Ha saa taluselizwe kuli bo mahe Beatrice ba mu lumelelize kuli wa kona ku fiwa buka yeo, Erika a fa mulikanaa hae yo buka ya Itute ku Muluti Yo Mutuna. Erika u zwelapili ku taluseza ba bañwi ka za lika za sweli ku ituta mwa Bibele mi mane u file ni bo muluti ba hae buka yeo ye bulezwi fahalimu.

Ki niti kuli, Erika ni munyanaa hae baa swabanga ha ba hupula lifu la bo ndataa bona. Kono sepo ya zuho i ba tusanga ku ikutwa kwateñi hande. Banana ba, ka ku swana ni ba bañwi ba bañata mwa lifasi kamukana, ba lumbeka Jehova, yena Mulimu ya tiisa pilu luli.—Mateu 21:16; 2 Makorinte 1:3, 4.

Mwa kona ku ikupela kopi ya buka ye ya makepe a 256, ye na ni maswaniso a buheha, ili ye na ni makepe a likana ni makepe a magazini ye kwa butuna. Mu taleleze kalulo ye bonisizwe kwatasi ni ku i lumela kwa keyala ye bonisizwe, kamba kwa keyala ye swanela ye bonisizwe fa likepe 5 la magazini ye.

□ Ni kupa kuli mu ni lumele buka ye bonisizwe ye, ku si na tifo.

□ Ni kupa mutu ya ka to itutanga ni na Bibele.