Ka ku ya ka Bibele

Kana Batu ba ba Maswe ba ka ca Mwa Lihele?

GERTRUDE, mukutazi wa mwa keleke ya Pentecostal, naa lumela luli kuli lihele li teñi. Mi muhupulo feela wa kuli mwendi ha ku na sibaka se si cwalo ne u sa lumelelani ni kutwisiso ya hae ya se si lukile. Na talusize kuli haiba batu ba ba maswe ba sa ci mwa lihele, u zibe batu ba ba ezize lika ze maswe hahulu ha ba na ku fiwa koto. Gertrude naa zwezipili ku lumela kuli lihele li teñi. Na bulezi kuli: “Ni ikutwa kuli ha ni koni ku tabela ku lapela Mulimu haiba ha ku na lihele la ba ba maswe.”

Kana batu ba ba maswe ba ka ca mwa lihele, sina mo li lutela likeleke ze ñata? Haiba ba ba maswe ha ba na ku ca mwa lihele, ki koto mañi ye ba ka fiwa?

Mulimu fa Naa Otezi Batu ba ba sa Sepahali Lwa Pili

Bibele i talusa kuli, Mulimu naa bupile batu ba babeli ba pili baa li ba ba petehile. (Genese 1:27; Deuteronoma 32:4) A ba beya mwa simu ye li paradaisi mi a ba fa kolo ya ku pila ku ya ku ile. Kono batu ba pili ba, bo Adama ni Eva, ne ba hanisizwe ku eza nto i liñwi. Mulimu naa ba lemusize kuli: “Haili likota kaufela za simu, u ka li ca; kono kota ya ku ziba bunde ni bumaswe, yona u si ke wa i ca; kakuli nako yoo i ca, u ka shwa luli.”—Genese 2:16, 17.

Ka bumai, bashemi ba luna ba pili ne ba palezwi ku mamela yona taelo yeo, ye nee lika busepahali ni buipeyo bwa bona ku Mulimu. Nee li swanelo kuli Mubupi a ba atulele lifu. Mulimu naa ize: “U ka ca buhobe ka mifufuzo ya pata ya hao, mane u kutele mwa mubu wo u zwisizwe ku ona; kakuli u liluli, mi u ka kutela mwa liluli.”—Genese 3:19.

Kambe kuli bo Adama ni Eva ha ne ba si ke ba sepahala ne ba ka nepelwa mwa lihele, kikuli Mulimu naa si ke ba lemusa za koto yeo?  Taba ya niti kikuli naa si ka bulela ni se sikana ka za kuli batu ha ba shwa ba nyanda. Ha ba koni ku nyanda, kakuli ha ku na kalulo ya mubili wa bona ye nee ka zwelangapili ku pila hamulaho wa lifu. Bibele i talusa ka ku utwahala hande taba ye, i li: “[‘Moyo, NW’] o eza sibi, ki ona o ka shwa.”—Ezekiele 18:4. *

Ka ku ba Mufani wa bupilo, Mubupi wa luna wa ziba lika kaufela ka za bupilo ni lifu. Mwa Linzwi la hae u lu taluseza kuli “ba ba shwile ha ba na se ba ziba.” (Muekelesia 9:5) Kona libaka bo Adama ni Eva ha ne ba sa koni ku nyanda mwa lihele la mulilo ha se ba shwile. Ne ba kutezi feela kwa liluli mi ba fita fa ku sa ba teñi. Ne ku si na “se ba ziba.”

Kana Lwa Kona ku Nyanda ha se lu Shwile?

Kwa Maroma 5:12, Bibele i bulela kuli: “Sibi sina ha si keni mwa lifasi ka mutu a li muñwi, mi ka sibi ku keni lifu, kamukwaocwalo lifu li tile kwa batu kaufela.” Haiba Adama ya naa tahiselize batu kaufela lifu naa kutezi kwa liluli ha naa shwile, kana lwa swanela ku lumela kuli batu baa nyanda mwa lihele bakeñisa libi ze ne ba ezize?—1 Makorinte 15:22.

Kaufela luna lu mwatasaa mulao wa naa li ku ona Adama. “Mupuzo wa sibi ki lifu.” Hape, mutu a saa shwa feela, “u lukuluzwi kwa sibi.” (Maroma 6:7, 23) Kono haiba batu ba bande ni ba ba maswe baa shwa mi ha ku na ya nyanda ha saa shwile, cwale katulo ya Mulimu ye lukile i kai?

Mulimu Mwa Atulela ka ku Luka

Mulelo wa Mulimu ka za batu ba ba sepahala ha u si ka cinca ku zwa feela fa bupela batu ba babeli ba pili ni ku ba laela kuli ba be ni bana mi ba babalele lifasi. (Genese 1:28) Wo i saa li ona mulelo wa hae, sina ha naa bulezi hamulaho kuli: “Ba ba na ni niti ba ka yola sanda sa naha, ni ku yaha mwateñi ku ya ku ile.”—Samu 37:29.

Mu lemuhe kuli ba ba lukile ba ka pila ona fa lifasi fa. Ba ka pila bupilo bwa buikangulo bo bunde ni bwa tabo. Mulelo wa Mulimu wa kwa makalelo wa kuli lifasi li tale batu ba ba lukile kaniti u “ka sebeza.” Mulelo wo u ka petahala haa ka yolisa lifasi le li maswe le, ka lifasi le linca.—Isaya 55:11; Daniele 2:44; Sinulo 21:4.

Batu ba bañata-ñata ba ba shwile ba saa zibi za tokwa Mulimu kwa batu, ba ka zusiwa kwa bafu mi ba ka fiwa litaelo ka za bupilo mwa lifasi la Mulimu le linca. (Isaya 11:9; Joani 5:28, 29) Kono mutu kaufela ya ka hana ku pila ka ku lumelelana ni milao ya Mulimu u ka fiwa koto ka “lifu la bubeli.” Le ki lifu la ku shwa ku shwelela.—Sinulo 21:8; Jeremia 51:57.

Kaniti luli, ka ku ba Mulimu ya lilato, Jehova haa na ku tukufaza batu mwa lihele. (1 Joani 4:8) Mi haa na ku lumeleza bumaswe kuli bu be teñi ku ya ku ile. Ka swanelo, Samu 145:20 i lu kolwisa kuli “Muñaa Bupilo u babalela kamukana ba ba mu lata, kono u ka yundisa ba ba maswe kaufela.” Seo si bonisa kuli Mulimu u lilato mi u atulanga ka ku luka.

[Litaluso za kwatasi]

KANA MU KILE MWA IPUZA KULI:

▪ Kana lu na ni moyo o sa shwi?—Ezekiele 18:4.

▪ Ki ufi muinelo wa ba ba shwile?—Muekelesia 9:5.

▪ Mulimu u ka ota cwañi ba ba maswe?—Samu 145:20.

[Manzwi a fa likepe 27]

“Ba ba shwile ha ba na se ba ziba.” —Muekelesia 9:5.

[Manzwi a bañi ba siswaniso fa likepe 26]

Photo: www.comstock.com