Ku Swalelela Lizoho la Mulimu la Bulyo

▪ Jezreel wa kwa Mexico naa pepilwe inza na ni butuku bwa litalo bo ba sa kula-kulangi hahulu batu (congenital lamellar ichthyosis). Bakeñisa butuku bo, litalo la mubili wa hae la yebuhanga mi li tiile hahulu. Jezreel u li: “Butuku bo, bu tahisa kuli ni nyenyiwe ki ba bañwi kono ki butuku bo bu sa yambukeli.”

Ku zwa kwa bwanana bwa hae, Jezreel naa fiwanga likalafo mwa lipatela ze fitana-fitana. Ha naa na ni lilimo ze peli, naa beilwe a nosi mwa muzuzu wa sipatela kuli a si ke a kenelwa ki matuku a mañwi. Kono ha ku na mulyani o no cincize litalo la hae. Mafelelezo bocaziba ba ambola ni yena kuli ba mu tuse feela ku tiyela muinelo wa ku shengokiwa ki ba bañwi.

Batu ba ba nga kuli butuku bwa Jezreel bwa yambukela ha ba mu sutelelangi fakaufi. Taba yeo ne i mu katazanga hahulu ha naa sa li mwanana, ha naa batanga ku bapala ni banana ba bañwi. U sa hupula kuli: “Ne ba ni sehanga ni ku shendanga kuli ‘ni situpu’ ni kuli ‘ha ni mutu.’”

Kono butuku bwa Jezreel bu mu file kolo ya ku ambola ni ba bañwi ka za sepo ya hae ye tomile fa Bibele. Hañata batu ba mu atumelanga ni ku mu buza haiba naa kile a ca mulilo. Jezreel ha ba talusezanga kuli naa si ka ca mulilo, ba mu buzanga ze tahisize kuli a be ni ponahalo ye cwalo. U ba talusezanga za butuku bwa hae bwa litalo ni ku talusa kuli ka nako ya cwale butuku bwa hae ha bu na kalafo.

Jezreel u ekezanga ku bulela kuli: “Ni na ni sepo ye nde hahulu mwa lifasi bakeñisa kuli Jehova Mulimu u sepisize kuli ba ba utwa milao ya hae ba ka pila mwa lifasi le linca mo ku si ke kwa ba ni makulanu ni ze utwisa butuku.” (Sinulo 21:3, 4) Ku ambolanga za butuku bwa hae ka nzila yeo ku tusize Jezreel ku ituta Bibele ni batu, mi u bile ni tabo ya ku tusa ba bañwi ku bona ku ba balapeli ba Mulimu.

Jezreel u li: “Na itumela kuli ne ni pepezwi mwa lubasi lwa Bakreste, ni kuli ka ku ba yo muñwi wa Lipaki za Jehova, ni na ni balikani ba bande. Ha ku na ya ni shengoka bakeñisa ponahalo ya ka. Ne ni kolobelizwe inze ni na ni lilimo ze 17, mi mwa lilimo ze 14 ze fitile ku zwafo, ni bile ni matohonolo a mañata a ku sebeleza Mubupi wa luna.”

Jezreel u hupulanga manzwi a Jehova a omba-omba a fumaneha kwa liñolo la Isaya 41:10, 13, a li: “Si sabi kakuli ni na ni wena. . . . Ni ka ku tiisa ka lizoho la ka la bulyo la niti ya ka. Kakuli Na, Muñaa Bupilo Mulimu wa hao, ni ku sweli kwa lizoho la bulyo, mi ni ku bulelela, ni li: Si sabi, ni ka ku tusa.”

Ku swalelela lizoho la Jehova la bulyo ku tusize Jezreel ku tula muinelo wa hae wa ku ikutwa maswabi fapilaa ba bañwi ni ku tiyela matata a tahiswa ki butuku bwa hae. Yena hamoho ni ba bañwi ba ba eza bolule-lule ba libelela ku bona talelezo ya lisepiso ze nde za sepisize Mulimu.