Ka ku ya ka Bibele

 Kana Mutu wa Kona ku Lata Lila za Hae?

Jesu Kreste naa ize: “Na mi bulelela, ni li: Mu late be ili lila ku mina, . . . mi mu lapelele ba ba mi eza maswe, ba ba mi nyandisa; kuli mu be bana ba Ndataa mina ya kwa lihalimu; kakuli Yena u pazuliseza ba ba maswe ni ba bande lizazi la hae, mi u neliseza ba ba lukile ni ba ba maswe lipula za hae.”—Mateu 5:44, 45.

MU NGA cwañi bulapeli? Kana mu nga kuli bulapeli bu tahisa lilato ni kozo kamba mu nga kuli bu tahisa sitoyo ni mifilifili? Kacenu, ba bañata ba nga kuli bulapeli bu tahisa sitoyo ni mifilifili, sihulu haiba bu zwakani ni lipuso za naha, bu yemela mishobo ye miñwi, kamba ku susueza moya wa ku lata hahulu naha ya habo mutu. Kono sina mo a boniseza manzwi a Jesu, ‘bana ba Mulimu’ luli bona ba likanyisa Mulimu ka ku lata ba bañwi—nihaiba be ili lila za bona.

Mutanga wa Mulimu yo muñwi naa ize: “Ya ku toile ha lapile, u mu fe lico; ha shwile linyolwa u mu nwise . . . U si ke wa tulwa ki bumaswe, kono u tule bumaswe ka bunde.” (Maroma 12:20, 21) Kono kana lilato le li cwalo la kona ku boniswa luli mwa lifasi le li aluhani le? Lipaki za Jehova ha ba kakanyi ni hanyinyani kuli lilato le li cwalo la kona ku boniswa. Ha lu nyakisiseñi mutala wa naa tomile Jesu ni balateleli ba hae ba kwa makalelo.

Ne ba Latile Lila za Bona

Jesu naa lutile batu litaba za niti ka za Mulimu, mi ba bañata ne ba ikozi ku mu teeleza. Kono ba bañwi ne ba mu lwanisize, mi ba bañwi ne ba ezize cwalo ka ku pumiwa ki ba bañwi. (Joani 7:12, 13; Likezo 2:36-38; 3:15, 17) Niteñi, Jesu naa zwezipili ku kutaza litaba ze pilisa kwa batu kaufela, nihaiba kwa balwanisi. (Mareka 12:13-34) Kabakalañi? Kakuli naa ziba kuli ba bañwi ku bona ne ba ka cinca mikwa ya bona, ku lumela kuli ki yena Mesiya, ni ku mamela litaba ze mwa Linzwi la Mulimu.—Joani 7:1, 37-46; 17:17.

Nihaiba fa busihu bwani bwa naa tamilwe ka mafosisa ki balwanisi ba hae ba ne ba lwezi lilwaniso, Jesu naa bonisize lilato kwa lila za hae. Mane, naa folisize yo muñwi wa batu ba ne ba mu tamile, ili ya naa tabilwe mukwale ki Pitrosi. Ka yona nako yani, Jesu naa bulezi taba ya butokwa ye ba swanela ku mamela balateleli ba hae ba niti ni kacenu le. Naa ize: “Kaufela ba ba swala mukwale, ba ka bulaiwa ka mukwale.” (Mateu 26:48-52; Joani 18:10, 11) Hamulaho wa lilimo ze bato ba ze 30, Pitrosi naa ñozi kuli: “Kreste . . . u utwile butuku bakeñisa mina, a mi siyela mutala, kuli mu hate mwa naa hatile. . . . Niha naa utwiswa butuku naa sa fumbeli; kono naa sepa [Mulimu].” (1 Pitrosi 2:21, 23) Taba yeo i bonisa hande fo ku sweu kuli Pitrosi naa fitile fa ku ituta kuli balateleli ba Kreste ba niti ba swanela ku ba ni lilato isi ku kutisa misuha.—Mateu 5:9.

Batu kaufela ba ba ‘hata mwa naa hatile Jesu’ ba likanyisa Jesu ka ku pilisana ni ba bañwi ka lilato ni musa. Liñolo la 2 Timotea 2:24 li bulela kuli: “Mutanga wa Mulena ha lukeli ku lwana; kono u lukela ku ba ya na ni musa kwa batu kaufela, . . . ya na ni pilu.” Mukreste u swanela ku ba ni lilato ni musa mi u swanela ku pilisana ka kozo ni ba bañwi ni ku kutisana lipilu ni bona.

“Mandumeleti A Kreste” A Kozo

Muapositola Paulusi naa ñolezi balumeli ba bañwi kuli: “Kihona ha lu li mandumeleti a Kreste. . . . Lwa mi lapela bakeñisa Kreste, lu li: Mu kutisane ni Mulimu.” (2 Makorinte 5:20) Mandumeleti ha ba ikenyanga mwa litaba za lipuso ni za limpi za linaha ze ba sebeleza ku zona. Kono mandumeleti ba ikambusanga kwa litaba zeo. Musebezi wa bona ki ku yemela ni ku pakela linaha za bona.

Mandumeleti ni linumwana za Kreste ni zona li cwalo. Ba nga Jesu sina Mulena mi ba yemela Mubuso wa hae wa kwa lihalimu ka ku shaela taba ye nde ka kozo. (Mateu 24:14; Joani 18:36) Kona libaka Paulusi ha naa ñolezi Bakreste ba  mwa miteñi ya hae kuli: “Ha lu lwani ka butu. Kakuli lilwaniso za ndwa ya luna hasi za butu; kono li na ni mata, ka Mulimu, a ku wisa milelo, ni ze pahami kaufela, ze pahamela ku lwanisa zibo ya Mulimu.”—2 Makorinte 10:3-5; Maefese 6:13-20.

Paulusi ha naa ñozi manzwi ao, Bakreste ne ba nyandiswa mwa linaha ze ñata. Bakreste bao ne ba kona ku kutisa misuha. Kono ku fita ku eza cwalo, ne ba zwezipili ku lata lila za bona ni ku kutaza litaba za kozo ku mañi ni mañi ya naa teeleza. Hatiso ye bizwa Encyclopedia of Religion and War i bulela kuli: “Balateleli ba Jesu ba kwa makalelo ne ba sa ikenyangi mwa lindwa ni mwa limpi” kakuli ne ba nga kuli likezo ze cwalo “ha li lumelelani ni likezo ze lilato za Jesu hamohocwalo ni taelo ya hae ya ku lata be ili lila ku bona.” *

Sina Bakreste ba kwa makalelo, Lipaki za Jehova ni bona ba nga Jesu sina Mulenaa bona. Hape ba mu nga kuli ki Mulena wa Mubuso wa Mulimu—ili mulonga wa kwa lihalimu o tuha u tahisa kozo ni buiketo bo bu sa feli fa lifasi. (Daniele 2:44; Mateu 6:9, 10) Kacwalo, ka ku swana sina mandumeleti ni linumwana, Lipaki za Jehova ba shaela litaba ze nde ka za Mubuso wo. Ka nako ye swana, ba lika ka taata ku ba batu ba bande mwa linaha ze ba pila ku zona—ba lifa mitelo ni ku latelela milao ye sa lwanisani ni milao ya Mulimu.—Likezo 5:29; Maroma 13:1, 7.

Kono ka bumai, sina Bakreste ba kwa makalelo, Lipaki fokuñwi ha ba utwisiswi, ba sinyiwa mabizo, ni ku nyandiswa. Niteñi bona ha ba kutisi misuha. Kono ba lika ka taata ku ‘pilisana mwa kozo ni batu kaufela’ inze ba na ni sepo ya kuli ba bañwi kwa balwanisi ba ka ‘kutisana ni Mulimu’ ni ku ba ni sepo ya bupilo bo bu sa feli. * —Maroma 12:18; Joani 17:3.

[Litaluso za kwatasi]

KANA MU KILE MWA IPUZA KULI

▪ Bakreste ba swanela ku nga cwañi lila za bona?—Mateu 5:43-45; Maroma 12:20, 21.

▪ Jesu ha naa nyandisizwe, naa ezizeñi?—1 Pitrosi 2:21, 23.

▪ Ki kabakalañi Bakreste ba kwa makalelo ha ne ba hanile ku ikenya mwa lindwa?—2 Makorinte 5:20; 10:3-5.