Ze Tusa Lubasi 1: Mu Ise Mamelelo Kwa Lika za Butokwa Mwa Bupilo

“Mu zibe ku lemuha linto za butokwa ku fita.”—Mafilipi 1:10, NW.

Se ku talusa. Mwa mabasi a mande, muuna ni musali ba iyakatwa pili za bo muunaa bona kamba za bo musalaa bona ku fita za bona beñi, tutu ya bona, balikani ba bona, mane ni bahabo bona ba bañwi. Muuna ni musali ba tandanga nako ye ñata hamoho mi hape ba tandanga nako ni bana ba bona. Sibeli sa bona ba itatela ku itombola ku tusa lubasi lwa bona.—Mafilipi 2:4.

Libaka ha ku li kwa butokwa. Bibele i talusa kuli lubasi ki lwa butokwa. Mane muapositola Paulusi naa ñozi kuli mutu ya sa babaleli lubasi lwa hae “u fitwa ki ya si ka lumela.” (1 Timotea 5:8) Kono hamulaho wa nako lika zaa nga mutu kuli ki za butokwa li kana za cinca. Ka mutala, muelezi yo muñwi wa lubasi naa lemuhile kuli buñata bwa batu ba ne ba fumanehile kwa mukopano wa naa lukisize ne ba bonahala ku iyakatwa hahulu musebezi ku fita lubasi. U talusa kuli ne ku bonahala inge kuli ne ba bata ku tatulula kapili-pili matata afi kamba afi a mwa mabasi a bona, ilikuli ba si ke ba nahana hape ni kamuta za ona kono ba ise feela pilu kwa misebezi ya bona. Lu ituta lika mañi? Lu ituta kuli, ku bunolo ku bulela kuli lu beya lubasi mwa sibaka sa pili kono ku taata ku bonisa cwalo.

Mu like muezezo wo. Mu tatube kuli lubasi ki lwa butokwa cwañi ku mina ka ku itusisa lipuzo ze latelela.

▪ Bakuluna kamba mwanaka ha bata ku bulela, kana naa teelezanga kapili-pili?

▪ Ha ni ikambotanga ni ba bañwi ka za lika ze ni ezanga, kana hañata na bulelanga lika ze ni ezanga ni lubasi lwa ka?

▪ Kana na kona ku hana misebezi ye miñwi (kwa mubeleko kamba ku sili) haiba ni tokwa ku tanda nako ni lubasi lwa ka?

Haiba kalabo ya mina kwa lipuzo zeo ki eni, mu kana mwa nahana kuli lika ze mu nga kuli ki za butokwa li lukile. Kono bakumina ni bana ba mina bona ba mi nga cwañi ka ku ya ka lipuzo zeo? Mo lu iponela ha ku talusi kuli kipeto lika ze lu nga kuli ki za butokwa li lukile. Mi sikuka se si swana se ki sa niti ni kwa litaba ze tusa ze ñwi ze ka nyakisiswa fa makepe a tatama.

Mu eze katulo ye tiile. Mu nahane ka za nzila i liñwi kamba ze peli za mo mu kona ku boniseza kuli mu beya lubasi lwa mina mwa sibaka sa pili. (Ka mutala: Mwa kona ku ikatulela ku kusufaza kwa lika ze ñwi ze mi celanga nako ye mu swanela ku tanda ni bakumina ni lubasi lwa mina.)

Kiñi ha mu sa talusezi lubasi lwa mina ka za katulo ya mina? Haiba mutu yo muñwi mwa lubasi a bonisa kuli wa tabela ku cinca, ni ba bañwi ba kana ba eza nto ye swana.

[Siswaniso se si fa likepe 3]

Mushemi ya kondisa u isa mamelelo ye tuna ku muhabo yena ni bana ba hae