Ze Tusa Lubasi 2: Mu be ni Buitamo

“Mulimu sa kopanyize hamoho, mutu a si ke a si kauhanya.”—Mateu 19:6.

Se ku talusa. Muuna ni musali ba ba eza hande mwa linyalo ba nga linyalo kuli ki tamo ye inelela. Muta ku ba ni butata, ba likanga ka taata ku bu tatulula ku fita ku bu nga kuli ki kolo ya ku feza ka yona linyalo. Haiba muuna ni musali ba ba nyalani ba swalisana hahulu, ba ka ikutwa ku ba mwa silelezo. Yo muñwi ni yo muñwi wa ku bona u ka sepa kuli muhabo yena u ka zwelapili ku nga ka butokwa linyalo la bona.

Libaka ha ku li kwa butokwa. Mwa linzila ze ñata, buitamo kona mutomo luli o tiisa linyalo. Kono mikwangalakanyi ye sa feli i kona ku tahisa kuli buitamo bu bonahale inge mushimbo o buima. Mane manzwi a buitamo a kuli, ‘lu ka pilisana hamoho ku fitela lifu,’ a kona ku fetuha feela sipangano, ili se ne ba ka lakaza kuli kambe ne si fa kolo ya ku si feza. Ba kana ba sa fezi linyalo luli, kono ba kona ku feza linyalo ka likezo za bona. Ka mutala, ba kana ba sa ambolisani ha ku zuha litaba ze tuna ze tokwa kuli ba ikambote.

Mu like muezezo wo. Mu tatube kuli buitamo bwa mina ki bo butuna cwañi ka ku itusisa lipuzo ze latelela.

▪ Ha lu shelana, kana ni ikutwanga kuli kambe ne ni si ka nyala kamba ku nyalwa ku bakuluna?

▪ Kana hañata na ikumbutanga ka za ku nyala kamba ku nyalwa ku mutu u sili ku fita bakuluna?

▪ Kana fokuñwi ni bulelelanga bakuluna kuli, “Ni ka mi siya” kamba “Ni ka nyala kamba ku nyalwa ku mutu u sili ya ka ni tabela”?

Mu eze katulo ye tiile. Mu nahane ka za muhato u li muñwi kamba ye mibeli ye mu swanela ku nga kuli mu tiise buitamo bwa mina. (Liakalezo ze ñwi ki ze: Ka linako ze ñwi, mu ñolele bakumina kañolo, kwa sibaka sa mubeleko mu tanteke maswaniso a bakumina, kamba mu lizeze bakumina luwaile ka zazi ni zazi ha mu li kwa musebezi, ili ku ikambota feela ni bona.)

Mwa kona ku hupula liakalezo za lika ze mu kona ku ezeza bakumina, kihona mu ka ba buza kuli kwa liakalezo zeo ki ifi ye ba fita hahulu kwa pilu.

[Siswaniso se si fa likepe 4]

Buitamo bu sileleza linyalo sina lukwakwa lwa kwa mukwakwa ha lu sileleza limota kuli li si ke za fapuha mwa mukwakwa

[Manzwi a bañi ba siswaniso]

© Corbis/age fotostock