Ze Tusa Lubasi 3: Mu Swalisane

“Ba babeli ba fita a li muñwi . . . Ha ku wa yo muñwi, wahabo wa mu zusa.”—Muekelesia 4:9, 10.

Se ku talusa. Muuna ni musali ba ba kondisa mwa linyalo la bona ba kuteka tukiso ya Mulimu ya butoho, sina mo i taluselizwe mwa Bibele. (Maefese 5:22-24) Mi bo muuna ni musali ba ba kondisa ba nga linyalo kuli ki swalisano. Ha ba ngi linyalo kuli ki tukiso ya batu ba babeli ba ba kona ku ikezeza lika mo ba latela. Ha ku na ni swalisano mwa linyalo, muuna ni musali ha ba sa ikunga kuli ki batu ba ba shutana. Ki “nama i li ñwi feela,” ili pulelo ya mwa Bibele ye bonisa kuli linyalo ki tukiso ye inelela ili ye tamahanya hamoho.—Genese 2:24.

Libaka ha ku li kwa butokwa. Haiba mu sa swalisani hamoho ni bakumina, lika ze nyinyani ze ezahala li kona ku fetuha butata bo butuna, mi sibeli sa mina mu ka talima fa bufokoli bwa yo muñwi ni yo muñwi ku fita ku tatulula butata. Kono haiba mina ni bakumina mu swalisana, mu ka ba sina mufufisi wa fulai ni mubakweli wa hae ba ba sebelisana hamoho kuli ba matise fulai ya bona. Ha mu na ku swana ni bafufisi ba fulai ba babeli ba ba mwa lifulai ze shutana ili ba ba fufisa lifulai ka nzila ye ka tahisa kuli lifulai zeo li natane. Ha mu shelana, ha mu na ku sinyeza nako ni maata a mina kwa ku nyazana ni ku tamelezana milatu, kono mu ka eza ka taata ku bata linzila ze nde za ku lumelelana ka zona.

Mu like muezezo wo. Mu tatube mo mu ngela swalisano ka ku itusisa lipuzo ze latelela.

▪ Kana ni nga mali e ni hola kuli ‘kaufela ki a ka,’ bakeñisa kuli ki na ni a belekezi?

▪ Kana ha ni tabeli bahabo bakuluna, ku si na taba ni kuli bakuluna ba utwana hahulu ni bona?

▪ Kuli ni lukuluhe hande, kana ni tokwa ku sa ba fakaufi ni bakuluna?

Mu eze katulo ye tiile. Mu nahane ka za nzila i li ñwi kamba ze peli za mo mu kona ku swalisanela hahulu ni bakumina.

Kiñi ha mu sa buzi bakumina ka za akalezo ya mo mu kona ku ezeza cwalo?

[Siswaniso se si fa likepe 5]

Ku swalisana ku talusa ku sebelisana hamoho mwa ku tatulula matata sina mufufisi wa fulai mwa swalisanela ni mubakweli wa hae ku fufisa fulai ya bona