Ze Tusa Lubasi 4: Mu Kutekane

Haike “komano, ni matapa, ni lunya kaufela li zwiswe ku mina.”—Maefese 4:31.

Se ku talusa. Mabasi aa na ni matata ni mabasi a kondisa lika, kaufela ona ha lumelelanangi mwa lika ze ñwi. Kono mabasi a kondisa lika a ikambotanga litaba ku si na ku itusisa mashendekela, matapa, ni lipulelo ze ñwi ze maswe. Ba ba mwa mabasi ao ba kuteka ba bañwi sina ni bona ha ne ba ka bata kuli ba kutekwe cwalo.—Mateu 7:12.

Libaka ha ku li kwa butokwa. Lipulelo ze lu bulela kwa batu za kona ku ba holofaza sina inge mo li holofaleza lilwaniso. Lishitanguti le liñwi la mwa Bibele li bulela kuli: “Bunde ki ku ikahela mwa lihalaupa, isi ku ina ni musali ya omana, ya na ni linonge.” (Liproverbia 21:19) Mane ku konwa ku bulelwa cwalo nihaiba ka za muuna ya omana ni ya na ni linonge. Bibele ha i bulela ka za ku uta bana, i li: “Mu si ke mwa halifisa bana ba mina, kuli ba si ke ba fela pilu.” (Makolose 3:21) Bana ba ba nyaza-nyaziwa kamita ba kana ba ikutwa kuli ha ba koni ku tabisa bashemi ba bona. Mane ba kana ba zwafa feela.

Mu like muezezo wo. Mu tatube kuli mu bone kuli mu kuteka lubasi lwa mina ha kuma kai, ka ku alaba lipuzo ze latelela.

▪ Mwa lubasi lwa ka, ha lu ikambota bakeñisa kuli ne lu shelani, kana hañata puhisano i felanga ka mutu yo muñwi ha zwela kwande inge a nyemile?

▪ Ha ni ambola ku bakuluna kamba kwa bana ba ka, kana ni itusisanga matapa, a cwale ka “u sikuba,” “u sitoto,” kamba manzwi a mañwi a ku tapaula?

▪ Kana ne ni huliselizwe mwahalaa batu ba ne ba tabela hahulu ku lwaha?

Mu eze katulo ye tiile. Mu nahane ka za sikonkwani si li siñwi kamba ze peli ze mu kona ku itomela kuli mu bonise likute ka lipulelo za mina. (Ki ye akalezo: Mu ikatulele ku itusisa pulelo ya kuli “ni” ku fita ku itusisanga pulelo ya kuli “mina.” Ka mutala, mu kana mwa bulela kuli, “Ni utwanga butuku ha mu . . . ,” ku fita ku bulela kuli, “Mina kamita mu . . . ”)

Mwa kona ku taluseza bakumina ka za sikonkwani kamba likonkwani ze mu itomezi. Hamulaho wa likweli ze talu, mu buze bakumina ka za zwelopili ye se mu ezize.

Mu nahane ka za likaniso ze ñwi ze mu kona ku itomela ilikuli mu si ke mwa itusisanga matapa ha mu ambola ni bana ba mina.

Kiñi ha mu sa kupi swalelo kwa bana ba mina kabakala linako ze mu kile mwa ba hanyaukela kamba ku ba shendekela?

[Siswaniso se si fa likepe 6]

Sina feela mandinda a liwate haa kona ku ululula licwe, ku itusisa lipulelo ze butuku kamita ku kona ku ponganisa lubasi