Ze Tusa Lubasi 6: Mu Swalelane

“Mu ezane hande, mi . . . mu swalelane.”—Makolose 3:13.

Se ku talusa. Muuna ni musali ba ba eza hande ba itutanga ku ze ba ezize kwamulaho; kono ha ba bulukangi mafosisa a kwamulaho mi kihona ba itusisa lipulelo ze cwale ka, “Wena u wa ku liyehanga kamita,” kamba “Wena wa li ku ba u teeleze.” Bo muuna ni musali ba lumela kuli, ‘ku swalela bufosi, kwa bubanisa.’—Liproverbia 19:11.

Libaka ha ku li kwa butokwa. Mulimu “wa lata ku swalela,” kono batu kamita ha ba yo cwalo. (Samu 86:5) Haiba mafosisa a kwamulaho a sa tatululwi, a kona ku ata kuli mane mu kana mwa nga kuli ha mu sa kona ku swalelana. Muuna ni musali ba kana ba ikatulela ku sa taluseza bakubona mo ba ikutwela. Sibeli sa bona ba kana ba ikutwa kuli ba mwa linyalo le li si na lilato.

Mu like muezezo wo. Mu buhe maswaniso a kale fo mu inzi ni bakumina ili e ne mu ngisize kwa makalo a linyalo la mina kamba ha ne mu li mwa libato. Mu like ku zusulusa lilato le ne mu latana ka lona pili mu si ka ambekwa kale ki matata ni ku cinca mo mu ngelana. Kihona mu ka nahana ka za tulemeno to tunde to ne mu tabezi hahulu ku bakumina.

▪ Ki tulemeno mañi twa bakumina to mu tabela hahulu ka nako ye?

▪ Mu nahane lituto ze ba ka ituta bana ba mina haiba mu zibahala sina mutu ya swalela ba bañwi.

Mu eze katulo ye tiile. Mu nahane ka za nzila i liñwi kamba ze peli ze ka mi tusa kuli mu si ke mwa bulelanga ka za mafosisa a kwamulaho ha mu ikambota ni bakumina ka za matata a cwale.

Ki kabakalañi ha mu sa lumbaeti bakumina bakeñisa tulemeno twa bona to mu tabela?—Liproverbia 31:28, 29.

Mu nahane ka za linzila ze mu kona ku bonisa ka zona kuli mwa swalela bana ba mina.

Kiñi ha mu sa ikamboti ni bana ba mina ka za ku swalela ni ka za mo ku swalelana ku kona ku tuseza mañi ni mañi mwa lubasi?

[Siswaniso se si fa likepe 8]

Ha mu swalela mutu, ku swana inge kuli mutu yo u lifile sikoloti. Ha mu na ku lika ku lifisa mutu yo sikoloti seo kwapili