Ze Tusa Lubasi 7: Mu Yahe fa Mutomo O Tiile

Se ku talusa. Mabasi a tamahani hamoho ha itahelangi feela, sina feela ndu ha i sa koni ku tiya i nosi ka lilimo na lilimo. Ndu ye tiile i tokwa ku ba ni mutomo o tiile, mi ku cwalo ni ka za mabasi a tiile. Mabasi a kondisa hande lika a yahilwe fa mutomo o fa ketelelo ye nde.

Libaka ha ku li kwa butokwa. Libuka ze ñata, limagazini, ni ze buhiswa fa TV li na ni likelezo ze ñata ka za mabasi. Baelezi ba bañwi ba manyalo ba kana ba susueza muuna ni musali ba ba nyalani kuli ba zwelepili ku ina hamoho, kono baelezi ba bañwi bona ba kona ku susueza muuna ni musali ba ba swana bao kuli ba kauhane. Mane bocaziba ba bañwi ba cincanga mihupulo ya bona fa litaba ze cwalo. Ka mutala, ka 1994 caziba ya naa tumile hahulu ili ya naa itutile litaba za bana ba ba sa nonoboka naa ñozi kuli kwa makalo a musebezi wa hae, naa ikutwile kuli “bana ba kona ku pila hande ni mushemi wa likwasha ya tabile, ku fita ku pila ni bashemi ba ba nyalani ba ba si na tabo. Ne ni nahana kuli telekano ki keto ye nde ku fita ku zwelapili ku ina mwa linyalo la mingalato.” Kono hamulaho wa lilimo ze 20 za ku ba ni yeloseli, a cinca muhupulo wa hae. U talusa kuli: “Telekano i holofaza banana ba bañata.”

Mibonelo ya batu ya kona ku cinca, kono kelezo ye nde kamita i ka lumelelana ka linzila ze ñwi ni likuka ze fumaneha mwa Linzwi la Mulimu, yona Bibele. Ha ne mu nze mu bala zona litaba za ka ku tatamana ze, mwendi mu lemuhile kuli fahalimu a makepe 3 ku isa 8 ku beilwe sikuka sa mwa Bibele. Likuka ze cwalo li tusize mabasi a mañata ku kondisa. Ka ku swana ni mabasi kaufela, mabasi ao ni ona aa kopana ni matata. Kono shutano ki ya kuli Bibele i bile mutomo o tiile fa tomile manyalo ni bupilo bwa lubasi. Lwa swanela luli ku lumela kuli Bibele ki mutomo o tiile wa mabasi, kakuli Musimululi wa yona, yena Jehova Mulimu, ki yena Mutateki wa lubasi.—2 Timotea 3:16, 17.

Mu like muezezo wo. Mu kolohanye mañolo a bonisizwe fahalimu a likepe la bulalu ku isa ku la bu-8. Mu ekeze teñi mañolo a mwa Bibele a mañwi a mi tusize. Mu shimbange mukoloko wo, mi mu no nangelanga ku ona hañata.

Mu eze katulo ye tiile. Mu ikatulele ku sebelisa Bibele mwa lubasi lwa mina.

 [Siswaniso se si fa likepe 8, 9]

Lubasi lwa mina ha lu toma fa mutomo o tiile wa Mañolo, lu ka tiyela liñungwa le li bata ku lu shandaula