Mu Pile Bupilo bo bu Bunolo ni bo bu Itikanelezi

KU PILA bupilo bo bu bunolo ni bo bu itikanelezi ku tusa hahulu luli. Kono ku eza cwalo ku ama lika mañi? Sapili, mu tokwa ku nahana lika ze mu nga ku ba za butokwa. Mu kona ku eza cwañi cwalo?

Mu ipuze kuli: ‘Ki lika mañi ze se ni petile? Ki lifi ze sa tokwa ku petwa?’ Mu kolohanye likonkwani za mina za butokwa kwatasi:

1. ․․․․․

2. ․․․․․

3. ․․․․․

Kacenu batu ba bañata ba ndongwami hahulu sifumu se si ina fela nakonyana. Ku swana inge kuli ba bulela kuli: “A lu ceñi, a lu nweñi, kakuli kamuso lu ka shwa.” (1 Makorinte 15:32) Ba lumela kuli bupilo bwa kacenu bwa ku inela fela ku beleka ilikuli mutu a leke lika ze ñata ki bwa butokwa hahulu. Kono Bibele ya hanyeza muhupulo wo.

Ku ye ñwi ya linguli za hae, Jesu na bulezi za muuna ya na ikubukanyelize bufumu, ili ya na shwile a si ka ikola kale tutu yeo. Na ize: “Ya ikubukanyeza bufumu, a sa bu fumeli ku Mulimu, ki mwa inezi.” (Luka 12:16-21) Kana muuna yo na fosize ka ku ipelekela ka taata kuli a fumane sa ku ipilisa ka sona? Kutokwa. Butata ne li bwa mwa na ngela sifumu. Na si ka hupula Mulimu mwa milelo ya hae. Ka lona libaka leo, sifumu sa hae kaufela—ili lika zote za na belekezi—ne li si ka mu tusa kwa mafelelezo. Bo ne li bumai luli!—Muekelesia 2:17-21; Mateu 16:26.

Kono Jesu u lu mema kuli lu sebeleze mupuzo o sa feli. U lu susueza kuli: “Mu sebeze ku fumana, isi sico se si fela, kono se si ina, se si isa kwa bupilo bo bu sa feli.” (Joani 6:27) Kwa makalelo na bulezi kuli: “Mulimu u latile lifasi hahulu, mane u li file Mwanaa hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Wo ki mupuzo o munde luli!

Mu Kona ku Felisa Cwañi Lipilaelo?

Jesu na ziba kuli batu ba na ni mukwa wa ku bilaela ka za lika za kwa mubili. Kacwalo, na susuelize balutiwa ba hae, a li: “Cwale mu si ke mwa bata se mu ka ca, ni se mu ka nwa, mi mu tokwe pilaelo mwa pilu. Kakuli zeo kaufela ki ze batwa ki macaba a lifasi; mi Ndataa mina u ziba kuli mwa li tokwa. Kono mu bate mubuso wa Mulimu pili; mi linto zeo kamukana mu ka li ekelezwa kwateñi.”—Luka 12:29-31.

 Manzwi a omba-omba ao a susuelize Bakreste ba bañata-ñata kuli ba nolofaze mupilelo wa bona. Bo Juliet, ba ba pila kwa Malaysia, ba kandeka kuli: “Musebezi o ne ni beleka ne u ni bombisanga ni ku ni zwafisa. Kacwalo na, ni bo muunaa ka lwa lapela ku Jehova kuli a lu tuse ku nolofaza mupilelo wa luna. Jehova na alabile tapelo ya luna kapili-pili. Kweli i si ka fela kale, na fiwa musebezi wa ku lutanga banana ba lihole fa mazazi a mañwi.” Bo Steve, ba ba beleka musebezi wa ku yaha lituwa za mandu mwa Australia, ne ba ezize licinceho mwa mubelekelo wa bona ilikuli ba ezange misebezi ya kwa moya hamoho ni lubasi lwa bona. Bo Maureen, bona basali ba bona, ba talusa kuli: “Cwale se ba na ni tabo ye tuna, mi ni luna lu tabile hahulu. Mi banana ba lata kuli lu tandange nako ye ñata hamoho. Ni na, na lata cwalo! Haiba mu nolofaza mupilelo wa mina, lubasi kaufela lu ka eza hande.”

 Niteñi, haiba mu zwile fa mubeleko mi mu tuha mu zwisiwa ni fa sibaka sa mina, mu ka tokwa ku ba ni tumelo ye tuna kuli mu latelele kelezo ya Jesu. Kono ka ku beya lika za kwa moya mwa sibaka sa pili ni ka ku sepa Mulimu, ni mina mwa kona ku pila bupilo bo bu bunolo, ili bo bu itikanelezi. Ku eza cwalo ku ka mi tusa ku fumana “bupilo bo bu sa feli” mwa lifasi le linca la Mulimu le li lukile, ili mo musebezi kaufela u ka ba o munde ni mo ku si ke kwa ba ni ku belekela mbango.—1 Timotea 6:17-19; Isaya 65:21-23.

Kana mwa tabela ku ituta ze ñata ka za “bupilo bo bu sa feli” bo i sepisa Bibele? Haiba mwa tabela, mu kupe tuso kwa Lipaki za Jehova ba ba pila bukaufi ni mina, kamba mu ñolele kwa keyala ye swanela ye bonisizwe fa likepe 5 la magazini ye.

[Manzwi a fa likepe 25]

Mwa lifasi le linca la Mulimu, misebezi kaufela ikaba ye minde ni ye tusa

[Mbokisi fa likepe 24]

KANA MWA KONA KU IPUMANELA MUSEBEZI KWANDE A SIBAKA SA MINA?

Ki ze liakalezo ze kona ku mi tusa mwa libaka ze ñwi za lifasi ha ku na ni butata bwa kutokwa mibeleko:

● Ku libelela ndu (batu ha ba tamile musipili wa lipisinisi kamba ha ba li fa pumulo mi ba bata kuli ndu ya bona i babalelwe)

● Ku kenisa: mabenkele; liofisi; mandu ni miyaho ha li fezwa ku yahiwa, hamulaho wa mulilo, batu ha ba tuta mwateñi; misebezi ya fa lapa (mwa mandu a batu ba sili); mahaulo (a miyaho ya lipisinisi ni a mandu fela)

● Bulukisi: linjinga; lipangaliko za mifuta kaufela (lifalana za libuka li na ni libuka ze luta ka nzila ye bunolo mwa ku lukiseza lika)

● Bumapangapanga: ku beta likabati, ku panga likwalo, ku lukisa malibela; ku penda; ku yaha makwakwa; ku lukisa lituwa kamba ku lulela

● Bulimi: ku cala licalo, ku yanga litolwana, ku kutula

● Ku lukisa hande sibaka ni ku babalela likota ilikuli ndao i bonahale hande: kwa liofisi, kwa lipanga, kwa mandamino ni malibela a miyaho, kwa mabenkele, ni mwa libaka ze ñwi za lihotela za miyaho ye lundatami

● Ku babalela miyaho: ku kenisa, ku babalela miyaho ye mituna (fokuñwi ku kopanyeleza mandu a malobalo a sa lifelwi)

● Ku yala kapeti ni ku panga bulilo bwa mabala a ku lamatiseza, ku kenisa

● Ku isezanga batu mitende (ba bahulu ni banana) ni ku isanga lika ze ñwi kwa libaka ko li tokwiwa: lifundotiso, mapampili a litaelo za litolopo

● Ku tutisa lika, ku buluka

● Ku babalela hande ndao, ku kokola likota, ku babalela lwanda, ku saha likota

● Ku ba ndilaiba wa mbasi ya bana ba sikolo

● Ku swanisa batu mapikica (mapikica a lifateho ni a likezahalo ze ñwi)

● Ku lekisa bulo kwa mandui

● Ku cincana misebezi: musebezi wa ku lukisa limota ni wa ku talima za malaiti, musebezi wa ku luka ni wa za mipaipi

Kuli mu fumane litaba ze ekezehile, mu bone Mu Zuhe! ya Sikuwa ya March 8, 1996, makepe 3-11.

Mbokisi/Siswaniso se si fa likepe 25]

Misebezi Ye Mu Kona Ku Eza Fa Lapa

Mu tokwa ku ziba misebezi ye tokwa ku petiwa mwa silalanda sa mina. Mu buze be mu yahile ni bona. Mu ikupulele za ku eza.

● Ku lela bana, ku babalela banana

● Ku lekisa miloho kamba lipalisa ze limwa kwa mandamino; ku lekisa lino ze pangilwe fa litolwana

● Ku luka litino, ni ku kutisa litino

● Ku beleka misebezi ya mikwazo mwa likampani ze panga lika

● Ku besa likwa kamba masikono ni ku lukisa lico

● Ku panga kubo ka ku shangela masila, ku luka lika ka ku itusisa ndonga, ku kinita; ku bupa lika fa lizupa; ni ku eza misebezi ye miñwi ya mazoho

● Ku lukela masila a manca mwa lipula

● Ku buluka pulukelo ya mali, ku taipa, ku lukisa likompyuta fa mandu

● Ku alabanga mawaile

● Ku kuta ni ku ota milili

● Ku telisa muzuzu

● Ku tusa bafundoti ka ku ñola ni ku lumela maingilopu a mañolo a ku fundotisa

● Ku tapisa ni ku kenisa limota (batu ba tisa limota fa ndu ya mina)

● Ku babalela limunanu

● Ku lukisa likulukulu ni ku panga linotolo (ku belekela fa lapa)

Temuso: Ka za misebezi ye miñata ye se bulezwi ye, mwa kona ku i fundota mwa mapampili kamba mwa limagazini ku si na tifo kamba ka ku lifa fela kapenenyana; mi mwa linaha ze ñwi, i kona ku zibahazwa ka ku paheka mapampili fo ku beiwanga lizibiso za nyangela kamba fo ku pahekiwanga litaba mwa libaka za mabenkele.