Mwa Ku Fumanela Nako

“Nto ni nto i na ni nako ya yona.” —Muekelesia 3:1.

KULI mu fumane nako ya ku eza lika za butokwa mwa bupilo bwa mina, pili mu tokwa ku li ziba lika zeo. Ku ka ba bunolo haiba mu ziba lika ze butokwa mwa bupilo bwa mina, likonkwani za mina, ni lika luli ze mu swanela ku eza kuli mu pete likonkwani zeo.

Kacwalo, sa pili mu nyakisise lika ze mu nga ku ba za butokwa. Mwendi mwa kona ku ñola nto ni nto kaufela ya butokwa ye taha mwa pilu ya mina, inge cwalo lubasi, balikani, ku sebeza ka taata, tuto ya kwa sikolo, lika ze petilwe, ponahalo ye nde, masheleñi, tabo, linyalo, sishemo, buikangulo bo bunde, kamba bulapeli. Kihona mu ka ipuza kuli, ‘Kwa lika ze, ze ni nyakisisize, ki lifi ze butokwa hahulu ku na?’

Ha se mu ezize cwalo, mu nyakisise likonkwani kaufela ze mu lela ku peta mwa bupilo bwa mina. Lika za butokwa ku mina li shutana cwañi ni likonkwani za mina? Mwa taba ye, lu ka li, lika ze mu nga ku ba za butokwa ki lika ze inelela, kono likonkwani zona, ka nako ye ñwi, li ka petiwa mi li ka fela.

Ki likonkwani mañi ze mu kona ku itomela? Mwendi mu bata nako ya ku banga ni lubasi lwa mina. Mwendi mu bata ku fumana musebezi o mi swanela. Mwendi mu bata ku ekeza kwa zibo ya mina ya nto ye ñwi ye mu tabela. Mwendi mu bata ku eza nto ye ñwi ye mu tabela. Mwendi mu bata ku ituta kalemeno ka kañwi. Mwendi mu bata ku ya fa pumulo. Mwendi mu bata ku bala buka ye ñwi. Kamba mwendi mu bata ku ñola buka.

Ha se mu kolohanyize likonkwani ze mu lela ku peta, cwale mu kete fateñi za butokwa hahulu ku mina. Mu ikolwisise kuli likonkwani zeo za lumelelana ni lika ze mu nga ku ba za butokwa mwa bupilo bwa mina. Ka mutala, haiba mu itomela sikonkwani sa ku fuma hahulu, fo mu itomela ku sa ba ni tabo mwa bupilo bwa mina.

Cwale, kwa neku la likonkwani ze mu ketile, mu nyakisise lika ze mu kona ku eza kuli mu pete  sikonkwani ni sikonkwani se mu itomezi. Ka mutala, haiba se siñwi sa likonkwani za mina kikuli mu si ke mwa nuna hahulu, fohe ku ezanga lika ze cwale ka lipapali ze tiisa mubili ku ka mi tusa ku peta sikonkwani seo.

Ku Nyakisisa Lika ka Nzila ye ku Kona ku mi Tusa Cwañi?

Haiba likonkwani za mina za lumelelana ni lika ze mu nga ku ba za butokwa, mi haiba mu eza lika ze ka mi tusa ku peta likonkwani zeo, fohe bupilo bwa mina bu ka zamaya hande. Mu ka fumana kuli mu ka ba ni nako ya ku eza lika ze butokwa mwa bupilo bwa mina. Niteñi, fo ha ku talusi kuli ha mu swaneli ku isa pilu kwa lika ze ba tokwa ba bañwi kamba ze ba tabela. (Mafilipi 2:4) Kono ku talusa kuli mu ka kona ku lemuha lika ze si za butokwa ni ku li ambuka.

Nihakulicwalo ku ka banga lika li sili ze ka tokwa ku eziwa. Lika ze ñwi li kona ku bonahala ku sa ba za butokwa kono li tokwa ku eziwa. Lika zeo za kona ku sinya nako ya ku eza lika ze mu nga ku ba za butokwa. Kwa kona ku ba ni miinelo ya ka sipundumukela. Mi licinceho mwa bupilo bwa mina za kona ku lyanganisa lika ze ne mu lela ku eza. Kono ka ku nga mihato ye swanela ya ku peta lika za butokwa hahulu, mu ka banga ni nako ye ñata mi mu ka tabela ni bupilo bwa mina.

 [Mbokisi fa likepe 28]

KANA LIPANGALIKO ZA MITEÑI YE ZA TUSA BATU KULI BA SI KE BA SINYA NAKO?

Ba bañwi li ba tusa ku sa sinya nako kono ba bañwi li ba sinyeza nako. Ka mutala sipangaliko se si bizwa PDA (se si bonisizwe mwa siswaniso) si kona ku ba ni kalenda, mukoloko wa linombolo za mawaile ni likeyala, mikoloko ya lika za ku eza, kamera, litukiso ze tusa mutu ku ñola ni ku bala mashango, Intaneti, ni ze ñwi cwalo. Sipangaliko seo si kona fela ku mi tusa ku sa sinya nako haiba litaba ze ku sona li nepahezi ni ha si lwaliwa nako kaufela. Kono sa kona ku mi sinyeza nako haiba mu itusisa sona fa-ni-fa niha ku sa tokwahali, kamba haiba mu inela ku ituta likalulo kaufela za sona, kamba ku inela ku si cuna-cuna, kamba haiba sipangaliko seo si mi palelwisa ku ambola ni lubasi ni balikani ba mina, kamba ku mi palelwisa ku peta hande misebezi ya mina.

Temuso: Mu batisise pili mu si ka leka kale sipangaliko. Haiba sipangaliko se mu bata ku leka si shwa-shwa hahulu, si ka tokwa nako ya ku si lukisa. Mi hape, sipangaliko sifi kamba sifi si kona fela ku tusa haiba mu itusisa sona hande. Kacwalo haiba mu na ni sipangaliko se siñwi, mu bone teñi kuli sipangaliko seo sa mi tusa ku fita ku mi sinyeza nako.

[Siswaniso se si fa likepe 26, 27]

Kana mwa kona ku fumana nako ya ku eza lika za butokwa?