Bulutu Mwa Lifasi la Lipangaliko ze Ñata

LU PILA mwa nako ye ku na ni linzila ze ñata ze bunolo za ku ambola ka zona ze cwale ka ku itusisa mawaile a ku fumbata, ku ñolelana mashango a fa mawaile, mashango a fa Intaneti, ni ku eza liango ni lipuhisano fa Intaneti. Nihakulicwalo, batu ba bañata—banana ni ba bahulu ba shwa hahulu bulutu mwa lifasi le, le li na ni lipangaliko ze ñata za ku ambola ka zona. Kabakalañi?

Babatisisi bo John T. Cacioppo ni bo William Patrick ba nyakisisize taba ya bulutu mwa buka ya bona ye bizwa Loneliness—Human Nature and the Need for Social Connection. Ba ama kwa tuto ye bonisa kuli “ku itusisa hahulu Intaneti ku kona ku tahiseza batu ku ikauhanya hahulu ku ba bañwi ni ku ba lembwalisa haiba Intaneti i ba tuhelisa ku eza sango ka ku banga hamoho ni batu ba bañwi.”

Mipateho ya mwa bupilo ye tiswa ki zwelopili ya kacenu i tahiseza batu ku sa ba ni liango ze nde. Ka mutala, mutu ya ambola ka luwaile kamba ka lushango lwa fa kompyuta haa koni ku bona lumenyo ni lilato le li mwa pata ya mutu ya ambola ni yena.

Taba yeo ya ezahala mwa libaka za mibeleko, kono i ezahala hahulu mwa mabasi. Mwa malapa a mañata batu ba izwelanga fa lapa ni ku kuta ba sa ci lico hamoho kamba ku ambolisana. Bana ba se ba nonobokile ba na ni likompyuta za bona, mi hañata ba inanga ba nosi isiñi ni lubasi lwa bona. Se si komokisa kikuli, nihaike kuli banana bao ba na ni lipangaliko za malaiti za ku ambola ka zona, ba sa ikutwa bulutu.

Mazazi a, ni ba ba nyalani ba kona ku ba ni butata bwa ku ikutwa bulutu. Bakeñisa ku sa ikambotanga, batu ba ba nyalani ba kona ku pila hamoho kono inge ba sa swalisani hande. Ku ikutwa buinosi mwa linyalo ki mufuta o maswe hahulu wa bulutu.

Bashemi ba makwasha sihulu ba kana ba tokwa ku tiyela bulutu. Bakeñisa ku itusisa hahulu lipangaliko za ku ambola ka zona, bashemi ba makwasha ni bana ba bona ba kona ku talimana ni matata a mañata a cwale ka ku palelwa ku eza sango ka ku ba hamoho ku ambolisana, ili nto ye tahisa kuli ba ikutwe hahulu buinosi. Hape batu ba bañata ba ba li makwasha ba lakazanga ku ba ni mutu wa ku nyalana ni yena, kono ba sa ikutwanga ku sa boniswa lilato.

Bulutu se bu li butata bo butuna bo bu kona ku tahiseza batu ku ba macakolwa, ku ca hahulu, ku itusisa milyani ye kola, ku eza buhule, kamba mane ku ipulaya. Kacwalo, ki kwa butokwa ku ziba ze tahisezanga batu bulutu. Ku nga muhato wa pili wo kwa kona ku lu tusa ku tiyela butata bo.