“Fokuñwi I Kona Feela ku ba Pina”

● Bo Juliana ne li Bakreste ba basupali ba kwa Philippines be ne ba kalile ku kula butuku bwa kwa booko bo bu bizwa Alzheimer’s disease. Ne ba sa koni ku ziba nihaiba bana ba bona. Nihakulicwalo, ne ni potelanga bo Juliana nako kaufela fo ne ni belanga mwa silalanda se ne ba pila ku sona.

Bo Juliana ne ba kula hahulu kuli mane ne ba sa koni ku zwa fa mumbeta. Ne ba lubukelanga feela mwa lihaulo. Ne ni fumana taata ku tona ni bona kakuli ne se ba ni libezi. Ba ni lubukela, kono ne ba sa bonahali kuli ba ni zibile. Na ba buza kuli: “Kana mu sa hupulanga za Jehova?” Na ba taluseza taba ye ñwi ye ne ezahalile mwa musebezi wa ku kutaza ni ku ba buza lipuzo ze ñwi, kono ne ku sa bonahali kuli ba utwisisize. Cwale na kala ku opela pina ye ñwi, mi kwa ezahala taba ye tabisa!

Bo Juliana ba fetula toho ni ku ni talima, mi ba kala ku opela ni na! Hañihañi, na palelwa ku zwelapili ku opela bakeñisa kuli ne ni si ka peta pina yeo kaufela mwa puo ya Tagalog ya mwa sibaka seo. Kono bo Juliana ba zwelapili ku opela. Ne ba hupula manzwi a pina yeo kaufela. Kapili-pili, na kupa basali be ne ni inzi ni bona kuli ba ni kupele buka ya lipina ku Paki yo muñwi ya naa ina bukaufi. Ba tisa buka yeo ka bubebe. Ne ni sa zibi nombolo ya pina yeo, kono na apula luli fa likepe fo ne i fumaneha. Cwale lwa opela pina yeo kaufela hamoho! Ha ni buza bo Juliana nji ku na ni lipina ze ñwi ze ne ba sa hupula, ba kala ku opela pina ya kale ya kwa Philippines ye bulela za lilato.

Na li ku bona: “Batili bo Juliana, mu opele pina ya kwa Ndu ya Mubuso * isiñi ya fa wayalesi.” Cwale na kala ku opela pina ye ñwi mwa buka ya luna ya lipina, mi ni bona ba kala ku opela ni na. Ba bonahala ku taba fa meeto. Ba tuhela ku ni ndwandukela feela, mi ba menya ka lumenyo lo lutuna.

Ka nako yeo, batu ba ba pila bukaufi ne se ba zwile mwa mandu a bona kuli ba to bona kone ku zwelela manzwi a batu ba ba opela. Ba to yema kwa lihaulo inze ba lu buha ni ku teeleza ha lu nze lu opela. Ne ku tabisa ku bona bo Juliana ha ba fitiwa kwa pilu ki ku opela! Ku opela ne ku tahisize kuli ba hupule manzwi a pina ye ne ni kalisize ku opela.

Taba ye ne i ni lutile kuli, mutu haa koni ku ziba nto ye kona ku fita kwa lipilu za batu ba ba kula matuku a ba palelwisa ku utwisisa hande litaba kamba ku bulela maikuto a bona. Fokuñwi i kona feela ku ba pina.

Hasamulahonyana wa fo, bo Juliana ba timela. Ne ni hupuzi taba ye, ha ne ni teeleza kwa lipina ze nca ze tabisa ze ne ba zwisize Lipaki za Jehova mwa 2009. Mwa kona ku buza Lipaki za Jehova ba mwa sibaka se mu pila ku sona kuli ba mi taluseze mo mu kona ku fumanela lipina ze nde zeo, ze tabisa.

[Litaluso za kwatasi]