Ka ku ya ka Bibele

Kana Basali ba Swanela ku ba Likombwa Mwa Bulapeli?

MUSALI yo muñwi wa Mukatolika naa ñolezi cwana kwa mutende o bizwa USA Today: “Ni komokisizwe ni ku filikanywa ki taba ya kuli ha ku na nto ye cincize ku za basali, kwa neku la ku ketiwa sina ba bahulu mwa keleke.” Batu ba bañata ba na ni mubonelo o swana ni wa basali bao. Esi mane mwa bulapeli bo bu shutana-shutana basali ba sebeza sina likombwa, baprisita, mabishopu, ni baluti.

Batu ba mwa bulapeli bo bu hanisa basali ku ba likombwa ni ba mwa bulapeli bo bu lumeleza basali ku kutaza fapilaa keleke ba ipapata kuli ba latelela Mañolo. Niteñi, mibonelo ye mibeli yeo ha i yemelwi mwa Bibele. Ku taha cwañi cwalo? Kuli lu alabe puzo yeo, pili lu swanela ku nyakisisa ka mo Bibele i itusiseza linzwi la “sikombwa.”

Likombwa za Mwa Miteñi ya Baapositola

Mu utwisisa cwañi pulelo ya “sikombwa mwa bulapeli”? Batu ba bañata ha ba utwa pulelo yeo, kapili-pili ba nahananga za yo muhulu wa bulapeli, ili muuna kamba musali, ya etelela puteho mwa milapelo. Kono Bibele i itusisa linzwi leo ka linzila ze ñata. Mu nyakisise musali wa Sikreste ya bizwa Febe, ya taluswa ki muapositola Paulusi sina “kaizelaa luna, mutusi [“sikombwa,” NW] wa mwa Keleke ya Senkreya.”—Maroma 16:1.

Kana mu nga kuli Febe naa yemanga fapilaa puteho mwa Senkreya inze a zamaisa sebelezo? Ki bukombwa bufi luli bwa naa ezanga Febe? Mwa liñolo la naa ñolezi Mafilipi, Paulusi naa ñozi kuli basali ba bañwi “ba sebelize ni na mwa Evangeli.”—Mafilipi 4:2, 3.

Nzila ye ne ba itusisa hahulu Bakreste ba mwa miteñi ya baapositola ku hasanya taba ye nde, ne li ka ku kutaza “fande mwa mapatelo, ni ka ku pota mwa ndu ni ndu.” (Likezo 20:20) Be ne ba abana mwa musebezi wo ne ba li likombwa. Mi ne ba kopanyeleza likaizeli ba ba cwale ka Prisila. Kaizeli yo ni muunaa hae, ne ba taluselize Apolosi “Nzila ya Mulimu, ku fita mwa naa i zibela pili.” Apolosi ne li muuna ya naa saba Mulimu kono naa si ka kolobezwa kale sina Mukreste. (Likezo 18:25, 26) Ka ku swana ni Febe, ku bonahala kuli Prisila ne li sikombwa ya buanyu, sina mo ne ba inezi basali ba bañata.

Musebezi O Kutekeha

Kana musebezi wa ku kutaza ne li musebezi wa kwatasi, o si na hahulu tuso, ili o no fiwa kwa basali baana bona inze ba eza musebezi wa butokwa wa ku okamela puteho? Batili, mi lu bulela cwalo ka mabaka a mabeli. Libaka la pili ki la kuli, Bibele i bonisa hande fo ku sweu kuli Bakreste kaufela ku kopanyeleza cwalo ni baana ba ba na ni buikalabelo bo butuna mwa puteho ne ba na ni ku abana mwa musebezi wa ku kutaza. (Luka 9:1, 2) Libaka la bubeli ki la kuli, musebezi wa ku kutaza ne u li nzila ye tuna yeo ka yona  Bakreste ba ba kopanyeleza baana ni basali ne ba peta taelo ya Jesu ya ku “luta macaba kaufela” ni ku tahisa balutiwa, mi ki nzila ye ba sa itusisa hahulu Bakreste ba kacenu ku peta musebezi wo.—Mateu 28:19, 20.

Basali ba bañwi ba na ni musebezi o muñwi wa butokwa mwa puteho. Paulusi naa ñozi kuli: “Basali ba ba hulile . . . ba laye ze nde; kuli ba talifise likalibe, ba ba laye kuli ba late baana ba bona, ba late ni bana ba bona.” (Tite 2:3, 4) Kacwalo, basali ba ba hulile ili ba ba yeziseli mwa mupilelo wa Sikreste ba na ni musebezi wa ku tusa likalibe ze si na yeloseli ku fita fa ku hula. Wo ni ona ki musebezi o kutekeha, ili o mutuna.

Ku Luta Mwa Puteho

Niteñi, Bibele ha ku na fo i bonisa kuli basali ba swanela ku yema fapilaa puteho ni ku luta. Kono muapositola Paulusi naa ba laezi kuli “ba kuze mwa liputeho.” Kabakalañi? Libaka le liñwi la naa ñozi Paulusi ki la kuli “linto kaufela li ezwe ka swanelo, ni ka mulao.” (1 Makorinte 14:34, 40) Kuli lika li zamaye hande mwa puteho, Mulimu u file musebezi wa ku luta kwa sikwata si li siñwi. Kono mu lemuhe kuli mutu ha fiwi buikalabelo bwa ku okamela mwa puteho ka libaka feela la kuli ki muuna; buikalabelo boo bu fiwa feela kwa baana ba ba kwanisize ze tokwahala. *—1 Timotea 3:1-7; Tite 1:5-9.

Kana musebezi wa file basali Mulimu ki wa kwatasi? Batili. Mu hupule kuli Jehova Mulimu u ba file musebezi o butokwa hahulu—wona wa ku paka ka za hae. (Samu 68:11) Mwahalaa Lipaki za Jehova kacenu, ku na ni baana ni basali ba ba li likombwa za taba ye nde be se ba tusize batu ba bañata-ñata ku fita fa ku baka ni ku fumana puluso. (Likezo 2:21; 2 Pitrosi 3:9) Musebezi o ba petile wo ki o mutuna luli!

Ku fa baana ni basali misebezi ye shutana ku tahisa kozo mi hape ku bonisa likute ku bona kaufela. Ka mutala, mutu ya tula mukwakwa o patehile u tusiwa ki meeto ni lizebe za hae ze beleka ka swalisano. Ka ku swana, haiba baana ni basali ba peta tato ya Mulimu ka ku eza musebezi wa filwe mañi ni mañi wa bona, Mulimu u ka fuyaula puteho ka ku i fa kozo.—1 Makorinte 14:33; Mafilipi 4:9. *

[Litaluso za kwatasi]

KANA MU KILE MWA IPUZA KULI:

● Basali ba mwa puteho ya mwa miteñi ya baapositola ne ba lutanga cwañi?—Likezo 18:26.

● Ki bomañi ba ba ketiwanga kuli ba okamele puteho?—1 Timotea 3:1, 2.

● Mulimu u nga cwañi bukombwa bwa basali ba Sikreste kacenu?—Samu 68:11.

[Manzwi a fa likepe 15]

“Mulena a fa taelo, mi bana ba basizana ba ba tumisa litaba, ba eza mpi ye tuna.”—SAMU 68:11