“Lwa mi Lukulula”

BO Fred * ne ba biziwanga ki ba bahulu fa musebezi kuli ki babeleki ba ba ikonela. Miezezo ye minca ya lika ye ne ba tisize ne i tusize kampani ku ba ni masheleñi a mañata mwahalaa lilimo ze 6 ze ne ba belekile mwa kampani yeo. Kacwalo, ha ne ba bizizwe kwa ofisi ya yo muñwi wa bazamaisi, bo Fred ne ba hupula kuli mwendi kampani i bata ku ba ekeleza kwa tuwelo ya bona kamba ku ba hulisa fa musebezi. Kono ka sipundumukela, muzamaisi yo a ba zibisa kuli, “Lwa mi lukulula.”

Bo Fred ba kakamala. Ba li: “Ne ni na ni tuwelo ye nde mi ne ni ikola musebezi wa ka, kono ka sipundumukela lika kaufela za cinca.” Hasamulaho bo Fred ha ne ba bulelezi bo musalaa bona bo Adele ze ne ezahalile, bo Adele ni bona ba oma mati. Ha ba hupula taba yeo, bo Adele ba li: “Ne ni ikutwile inge kuli ne ni felelwa ki mali mwa mubili wa ka. Naa ipuza kuli, ‘Lu ka eza cwañi cwale?’”

Ze ne ba ipumani ku zona bo Fred se li ezahalezi batu ba bañata-ñata, sina mo li boniseza lipalo ze kwatasi. Niteñi, lipalo ka ili zona ha li bonisi masitapilu luli e ba ipumana ku wona batu ba ba si na misebezi. Mu nahane ze ne ezahalile ku bo Raúl be ne ba zwile kwa Peru ku yo belekela kwa New York City, ili be ne ba zwisizwe musebezi hamulaho wa ku beleka mwa hotela ye ñwi ye tuna ya mwa muleneñi wo ka lilimo ze 18. Bo Raúl ne ba bata-batile mubeleko, kono ne ba si ka u fumana. Ba li: “Ne ni babalezi lubasi lwa ka ka lilimo ze bato ba 30.” Mi ba zwelapili ku talusa kuli ha ne ba zwile musebezi ne ba “ikutwa ku ba muuna ya palezwi bupilo.”

Ze ne ba ipumani ku zona bo Raúl li bonisa buniti bwa taba ye izibelwa hande ki batu ba ba si na misebezi—ya kuli ku zwa musebezi ha ku tahisezi feela mutu butata bwa ku tokwa masheleñi. Hañata ku amanga hahulu maikuto a mutu. Bo Renée, ba ba nyezwi ki bo Matthew be ne ba zwile musebezi ni ku ina lilimo ze fitelela ze talu ba sa beleki, ba bulela kuli: “Ne ni kalile ku ikutwa kuli ha ni na tuso. Haiba ha ku na se u na ni sona, batu ha ba ku bali, mi hañihañi ni wena u kalisa ku ikutwa kuli ha u na tuso.”

Ku tokwa musebezi ha ku tahisezi feela mutu lipilaelo, kono hape mutu kaufela ya zwa musebezi u kopana ni butata bwa ku pila a si na hande masheleñi. Bo Fred ba li: “Ha ne lu na ni masheleñi ne lu sa hupulangi za ku fukuza kwa lika ze ne lu lekanga. Kono ha ne lu tokwanga ku leka lika zeo ka nako ye ne lu si na mubeleko, ne lu na ni ku fukuza kwa lisinyehelo za luna.”

Ha mu nze mu bata mubeleko, mu na ni ku tiyela minahano ni lipilaelo ze tiswa ki ku tokwa mubeleko. Hape mu kana mwa tokwa ku pila inze mu si na hande masheleñi. Pili ha lu nyakisiseñi mihato ye mibeli ye mu kona ku nga ilikuli mu tiyele lipilaelo.

[Litaluso za kwatasi]

[Grafu fa likepe 3]

(Kuli mu bone mo i hatiselizwe luli, mu bone hatiso)

Palo ya batu be ne ba si na mibeleko mwa 2008 mwa linaha feela ze talu

Japan 2,650,000

Spain 2,590,000

United States 8,924,000