‘Mu si ke Mwa Bilaela za Kamuso’

Bo Renée ne ba ikutwa kuli ha ba sa kona ku tiyela lipilaelo za bona. Ne se ku fitile lilimo ze fitelela ze talu bo muunaa bona bo Matthew inze ba si na hande musebezi. Ha ba hupula nako yeo, bo Renée ba li: “Ne ni bilaezwa hahulu ki taba yeo. Ku sa ziba ze ne ka ezahala ne ku ni zwafisa hahulu!” Bo Matthew ba lika ku omba-omba basali ba bona ka ku ba taluseza kuli lubasi lwa bona ne lu fumananga lika ze ne lu tokwa kamita. Bo Renée ba alaba kuli: “Kono esi ha mu si ka fumana kale musebezi! Lu tokwa masheleñi!”

KU ZWA musebezi ku tahisezanga mutu lipilaelo. Mutu ya zwile musebezi u kona ku ipuza kuli: ‘Ni ka fumana lili musebezi? Lu ka babalela cwañi lubasi lwa luna ka nako ye lu si ka fumana kale musebezi?’

Nihaike kuli ha ku si ka fosahala ku ba ni maikuto a cwalo, Jesu Kreste naa file kelezo ye nde ye kona ku tusa mutu ku fukuza kwa lipilaelo za hae. Naa ize: ‘Mu si ke mwa bilaela za kamuso. Lizazi le liñwi ni le liñwi li likanwa ki ziyezi ya lona.’—Mateu 6:34.

Mu Zibe Lika ze mu Ikalelwa

Jesu naa sa talusi kuli lu swanela ku itibaza matata a luna. Nihakulicwalo, ku bilaela ka za lika ze kana za ezahala kamuso ku ka ekeza feela kwa lipilaelo za mina za kacenu. Ki niti kuli ha lu na hahulu maata fahalimwaa lika ze kona ku lu ezahalela kamuso, ibe ze nde kamba ze maswe. Kono lwa kona ku nga mihato ye ka lu tusa ku talimana ni za kacenu.

Kana ku bunolo ku eza cwalo? Batili. Bo Rebekah, ili bao bakubona ne ba zwile musebezi  hasamulaho wa ku sebeza ka lilimo ze 12, ba li: “Mutu ha ziyelehile hahulu, ku taata ku nahana hande za swanela ku eza mwa muinelo wa li ku ona. Kono ne lu na ni ku eza cwalo. Kacwalo, na lika ku itiisa. Lika ze ne ni ikalelwanga hahulu ha ne li sa ezahalangi, na lemuha kuli ku bilaela ha ku tusi. Ka ku iseza feela pilu kwa matata e ne lu ipumana ku wona ka zazi ni zazi, ne lu ambukile lipilaelo kaufela ze imeza.”

Mu ipuze kuli: ‘Ki lika mañi ze ni ikalelwa hahulu? Kana lika zeo li ka ezahala luli? Ni sinyanga nako ye kuma kai inze ni bilaela ka za lika ze kona ku ezahala kamba kutokwa?’

Mu Kolwe ka ze mu na ni Zona

Mubonelo wa luna wa kona ku ama maikuto a luna. Kacwalo, Bibele i lu susueza ku ba ni mubonelo wo: “Ha lu na ni lico ni liapalo, lu kolwe ki zona.” (1 Timotea 6:8) Ku kolwa ka ze lu na ni zona ku talusa ku fukuza kwa lika ze lu bata ni ku ikutwa kuli ku likani ha lu fumana ze lu tokwa ka zazi ni zazi. Ku lakaza hahulu lika ze ñata ni ku tundamena ku li fumana ku ka lu tahiseza ku palelwa ku nolofaza mupilelo wa luna.—Mareka 4:19.

Bo Renée ne ba konile ku kolwa ka ze ne ba na ni zona hamulaho wa ku nyaka muinelo wa bona ka mo ne u inezi luli. Ba li: “Ha lu si ka pila kale lu si na malaiti kamba makundamo. Butata luli bo ne lu fumana ki bwa kuli ne lu si ka twaela ku pila lu si na hande masheleñi, mi takazo ya ka ya ku bata ku pila mo ne lu pilelanga kale ne i tahisize kuli ni be ni lipilaelo ze ñata hahulu.”

Hañihañi bo Renée ba lemuha kuli se ne si tahisize kuli lika li bonahale hahulu taata ne si miinelo ya bona kono ne li mubonelo wa bona. Ba li: “Ne ni na ni ku talimana ni muinelo wa luna ka mo ne u inezi luli isiñi ka mo ne ni u batela ku bela. Ha ne ni kalile ku kolwa ka lika za naa lu fa Mulimu ka zazi ni zazi, ne ni fumani tabo ye tuna.”

Mu ipuze kuli: ‘Kana ni fumani ze ne ni tokwa mwa lizazi la kacenu? Haiba ku cwalo, kana na kona ku iyakatwanga feela ze ni tokwa ka zazi, inze ni na ni buikolwiso bwa kuli za kamuso li ka fumaneha ni zona?’

Kuli mu kone ku pila mu si na hande masheleñi, pili mu tokwa ku ba ni mubonelo o munde. * Kono ki mihato mañi ye minde ye mu kona ku nga haiba ha mu fumani hande masheleñi bakeñisa kuli mu tokwile musebezi?

[Litaluso za kwatasi]

[Mbokisi fa likepe 5]

Ku Tundamena Kwa Kona ku mi Tusa ku Fumana Musebezi

Hasamulaho wa ku tanda lisunda inze ba palelwa ku fumana musebezi, bo Fred ba felelwa ki sepo. Ba bulela kuli: “Ne ku swana inge ku libelela mutu yo muñwi kuli a to mi nga kwa siteshini sa limbasi kono mutu yo ha bonahali.” Bo Fred ba ikatulela ku eza ze ne ba kona. Ba lumela liñolo le li bonisa lituto za bona ni misebezi ye ba ezize kwa likampani ze ñata nihaiba ze ne sa tokwi hahulu bucaziba bwa bona. Ne ba ile ko ne ba bizizwe kaufela mi ba itukiseza hande ku alaba lipuzo ze ne ba ka yo buziwa inze ba na ni buikolwiso bwa kuli “milelo ya mutu ya sebeza ka taata i mu atiseza lika.” (Liproverbia 21:5) Bo Fred ba li: “Kwa kampani ye ñwi ni kile naa tatubiwa habeli ka ku buziwa lipuzo ze ñata ki ba bahulu ba kampani.” Kono ku tundamena kwa bo Fred ne ku tusize. Ba li: “Ne ni kenyizwe musebezi!”

 [Mbokisi/Siswaniso se si fa likepe 6]

Nto ya Butokwa Hahulu ku Fita Masheleñi

Ki sifi sa butokwa hahulu mwahalaa muzamao wa mina ni masheleñi e mu fumana? Mu nyakisise mashitanguti a mabeli a mwa Bibele.

“Mubotana ya na ni mikwa ye minde, u na ni tuso ku fita mufumi ya na ni mikwa ye si ka luka.”—Liproverbia 28:6.

“Se si na ni tuso ki ku ca miloho feela mo ku na ni lilato; isi ku ca komu ye nunile mo ku na ni toyano.”—Liproverbia 15:17.

Kaniti, ku tokwa masheleñi ha ku nyinyafazi butokwa bwa mutu ni muzamao wa hae o munde. Kacwalo, bo muunaa bo Renée ha ne ba zwile musebezi, bo Renée ne ba bulelezi bana ba bona kuli: “Bo ndate-lubasi ba bañata ba yubekile mabasi a bona. Kono bo ndataa mina ba sa li ni mina. Mwa ziba mo ba mi latela ni mo ba mi tuselize mwa matata a mina kaufela. Ki bo ndate-lubasi ba bande hahulu!”