Ni Nyolezwi Hahulu ku to ba Bulelela Kuli, “Kaufela Luna lu Teñi!”

Taba ye kandekilwe ki bo Abigail Austin

Ne ni na ni lilimo ze 9 za ku pepwa. Zazi le liñwi, mwa kweli ya April ka 1995, na ni ba bañwi ba mwa puteho ya luna ya Lipaki za Jehova lwa lela ku yo tola kwa sibaka se siñwi se si kwahulenyana ni litolopo ze ñwi mwa England. Lwa kwela limota ka likwata-kwata ni ku funduka. Na ni muhulwanaa ka Sarah, hamohocwalo ni balikani ba luna bo Deborah, ne lu zamaya mwa mota i liñwi ni bo ndate ni bo ma. Ka sipundumukela, mota ye ñwi ye ne i matile hahulu ya kena kwa lineku la luna ni ku to natana ni ya luna. Ki na feela ya naa punyuhile.

NA YO zuhela mwa sipatela hasamulaho wa lisunda ze peli. Katendele ka ka, ne ka sinyehile hahulu kuli mane baalafi ne ba na ni ku ka ngungahanya ka lisipi. Kono na fola kapili. Kwa nalulelule, bahabo na ba ni taluseza ze ne ezahalile, kono na palelwa ku ba kolwa. Ne ni nze ni nahana kuli bashemi ba ka ni muhulwanaa ka Sarah ne ba tilo ni lekula inze ni lobezi, mi kona libaka ha ne ni si ka ba bona. Ha ne ni kutile kwa ndu, kona ha ne ni izo lemuha kuli ha ba sa li yo. Ne ni tomohile hahulu pilu.

Kiñi se ne si ni tusize ku tiyela butata bo?

Sebelezo ya Jehova ye ne ni Lutilwe ki Bashemi

Mwahalaa bana baketalizoho, ne li na mwanana ka ku fitisisa. Ka nako ye ne i ezahala kozi yeo, bo Sarah ne ba na ni lilimo ze 22, bo Shane ze 20, bo Jessica ze 17, mi bo Luke ne ba na ni lilimo ze 15. Ne lu na ni bashemi ba bande, be ne ba na ni pabalelo. Bo ndate bo Steve, ne ba li maeluda mwa puteho ya West Yorkshire ya Lipaki za Jehova, mwa sibaka sa Shipley mi ne ba latiwa ki mañi ni mañi bakeñisa kuli ne ba teelezanga ku ba bañwi ni ku ba tusa. Bo ma bo Carol, ni bona ne ba latiwa hahulu mi ne ba babalela basupali ba mwa puteho sina bashemi ba bona. Ne ba lukisezanga luna banana tukitinyana ni ku lu tusa ku fumana balikani ba bande. Mañi ni mañi naa amuhelwa mwa lapa la luna. Hape bashemi ba luna ne ba lu lutile ku bonisa sishemo ni ku iyakatwa batu be ne lu ina bukaufi ni bona.

Sunda ni sunda la Bulalu manzibwana, ne lu itutanga Bibele hamoho sina lubasi. Fokuñwi ne lu bapalanga lipapali ze tomile fa makande a mwa Bibele ni ku apala sina batu ba ba bulezwi mwa makande ao. Ku zwa kwa bwanana bwa luna, bo ma ni bo ndate ne ba lu lutile mwa ku itukiseza mikopano ya puteho ni mwa ku taluseza lushango lwa mwa Bibele kwa batu fa mandu a bona. Niha ne ba patehisizwe ki musebezi wa ku hulisa banana baketalizoho, bashemi ba luna ne ba fumananga nako ya ku ina ni luna ni ku lu tusa ku tiisa silikani sa luna ni Jehova.

Sina mo ne ba ezelize balikani ba luna bo Deborah, bahulwani ba ka bo Sarah, bo Shane, ni bo Jessica ha ne ba felize sikolo ni bona ba ba mapaina, ili likombwa za Sikreste za nako kaufela. Na ni bo Sarah ne lu utwana hahulu. Ne ni ba nga sina bo ma, mi sikolo ha si kwala ne lu yanga ni bona ku yo tusa batu ku ituta Bibele. Ne ni tabelanga hahulu mazazi ao. Ne ni bona kuli mapaina kaufela ne li ba ba tabile hahulu, mi ne ni tabela ku ba ni bona. Na itomela sikonkwani sa kuli ni eze bupaina hamoho ni bo Sarah ha ni ka feza sikolo.

Ka linako za pumulo, lubasi lwa luna hañata ne lu ezanga lika hamoho ni batu ba bañwi ba mwa puteho. Banana ni ba bahulu ba latana ni ku utwana hahulu. Ne ni sa zibi kuli balikani ba bande bao be ne ni fumani ne ba ka ni tusa ni ku ni omba-omba kwapili!

 Hasamulaho wa Kozi

Ni mano lukululwa mwa sipatela, na kutela kwa ndu ya luna. Bo Shane ni bo Jessica ne ba eza sebelezo ya nako kaufela, kono ka nako ye swana ne ba beleka ka taata kwa mibeleko ya bona ya kwa mubili kuli ba lu babalele kaufela luna.

Hape ne lu tusizwe ki Lipaki ba bañata ba mwa puteho ya luna. Ne ba lu tusize hahulu! Ne ba lu fanga lico, ku lu keniseza ndu, ku lu lekela ze ne lu tokwa, ni ku lu tapiseza liapalo ku fitela lu kona ku ipabalela. Ne lu itebuhile hahulu. Ne lu amuhezi limpo ze ñata ni makadi a ku lu tiisa a naa zwa kwa Lipaki ba bañata ba kwa libaka ze shutana-shutana, ili nto ye ne lu bonisize lilato le lituna le li mwa kopano ya Jehova.

Hasamulaho wa silimo si li siñwi, bahulwani ba ka kaufela ba bona kuli ne ni tokwa ku pila mwa lubasi lo ne lu ka ni tusa hande. Mabasi a sishemo a mwa puteho naa itakaleza ku lu tusa, kacwalo lubasi lwa ka lwa ina fafasi ku nyakisisa nzila ye ne ba ka nga bo ma ni bo ndate kuli ki yona ye ne i ka ni tusa mwa bupilo ni ku tiisa bulikani bwa ka ni Jehova. Kwa mabasi ao, ne ku na ni lubasi lo ne lu bonahala kuli ne lu ka tusa hande. Bo Billy, be ne ba li maeluda, ni basali ba bona bo Dawn, ne ba li balikani ba batuna ba lubasi lwa luna, mi ne ba na ni mwana wa musizana wa lilimo ze ketalizoho wa libizo la Lois. Ba ni amuhela mwa lapa la bona, mi ku zwelela fo, ba ni babalela hande sina mwana bona luli. Nihaike kuli bashemi ba Lois ne ba li sina bashemi ba ka cwale, Lois ha si ka bonisa lifufa, mi ni la kacenu le, sibeli sa luna lu utwana hahulu sina banabamba.

Mo ne ni Talimanezi ni Kozi Ye

Sapili ne ni ipuzanga libaka kozi ye maswe yeo ha ne i ezahalile mwa lubasi lwa luna, sihulu ka ku bona kuli bashemi ba ka, hamohocwalo ni bo Sarah ni bo Deborah, ne li batu be ne ba lata hahulu Jehova ni batu ba bañwi. Kono na hupula likande la mwa Bibele la Jobo ya naa zwezipili ku ba ni tumelo ku Mulimu niha naa shwezwi ki bana ba hae. (Jobo 1:19, 22) Na nahana kuli, ‘Kaniti, Satani ki yena ya tahisize manyando ni lifu mwa lifasi, mi u ka tabela haiba lu tuhela ku sebeleza Mulimu kabakala kozi ye.’ (Genese 3:1-6; Sinulo 12:9) Na hupula hape kuli Jehova u lu file sepo ye nde ya zuho ya bafu. (Joani 5:28, 29) Lu ka bonana hape ni lubasi lwa luna ni bo Deborah mwa paradaisi fa lifasi! Kaniti, lilato la ka ku Jehova ne li hulile.

Ha ni katananga batu ba bañwi ba ba ipumani mwa likozi, ni ikutwanga hahulu bumaswe haiba ha ba si ka utwa kale sepiso ye nde ya zuho ya bafu ye mwa Bibele. Ni banga ni takazo ya ku ba taluseza sepo ya luna, kakuli ni kolwa kuli ki kabakala Jehova ni kopano ya hae ha lu konile ku botoka mwa matata a luna, inze lu na ni sepo ya kuli lika li ka ba hande.

Mwendi mo lu talimanezi ni muinelo o ne lu ipumani ku ona ku tusize ka nzila ye ñwi hape, inge cwalo ka ku tusa bashemi ba bañwi ku ipuza kuli, ‘Kana lu lutile bana ba luna hande ka za Jehova kuli niha ku kona ku ezahala se siñwi ku luna bashemi, bana ba luna ba ka zwelapili ku sebeleza Jehova?’

Ni likile ku pila bupilo bwa ka sina mo ne ni ka bu pilela kambe bo ma ni bo ndate ba sa pila. Na ziba kuli bashemi ba ka ne ba ka tabela kuli ni eze ka taata musebezi wa ku tusa ba bañwi, sina mo ne ba ezezanga. Ni bile paina ku zwa feela fo ni feleza sikolo, mi ka nako ya cwale Lois sa sebeza ni na sina paina. Likaizeli za ka se ba nyezi mi bahulwani ba ka ba basali ni bona se ba nyezwi, mi kaufela ba sebeleza Jehova ka tabo mwa liputeho za bona.

Ni nyolezwi hahulu lifasi le linca la Mulimu ni zuho ya bafu! Ka nako yeo ha ku na ku ba ni lifu kamba ku utwa butuku. (Sinulo 21:3, 4) Ku ziba kuli kaufela luna lu ka kopana hape ku ni tusa ku zwelapili ku itiisa ku si na taba ni matata e ni talimana ni ona. Ni nyolezwi hahulu ku to kumbata bo ma, bo ndate, bo Sarah, ni bo Deborah ni ku ba bulelela kuli, “Kaufela luna lu teñi!”

[Siswaniso fa likepe 18]

Bo Abigail (ba bubeli ku zwa kwa nzohoto) kacenu, ni lubasi lwa bona lo lu ba añuzi