Mu si ke Mwa Nga Kuli ki Banana Hahulu

● Manzwi ao naa ñozwi ki me yo muñwi ya pila kwa California, mwa U.S.A., ka za taba ye nyakisisizwe mwa buka ye li Itute ku Muluti Yo Mutuna. Me yo naa talusize kuli: “Sunda ye felile mwanaa luna wa mushimani Javan ya na ni lilimo ze talu ha naa ilo bonana ni dokota wa hae, dokota naa buzize ka za haiba na ni bakuluna ne lu taluselize Javan ka za mwa ku tokomelela lilama za lupepo. Ne ni tabile hahulu ku bulelela dokota yo ka za buka ya Muluti, ye talusa kuli ku bapalisa lilama za lupepo za mutu yo muñwi ku fosahalile. Dokota yo naa tabile hahulu ku utwa kuli ne lu ambolisani taba yeo ni mwanaa luna.”

Me yo naa ekelize kuli: “Litaba ze li talusizwe ka mukwa o munde hahulu mwa buka ye.” Kauhanyo ya naa amile ku yona me yo ki ya toho ya taba ye li “Mwa Naa Silelelizwe Jesu.” Kauhanyo yeo i talusa mo Ndatahe Jesu wa kwa lihalimu naa silelelize Mwanaa hae kuli a si ke a ezwa maswe ki Mulena Heroda ya maswe ka nako yeo Jesu naa sa koni ku isileleza bakeñisa kuli naa sa li yo munyinyani hahulu. (Mateu 2:7-23) Buka ye hape i bonisa mo ba kona ku lutelwa banana ba banyinyani ku isileleza haiba mutu a lika ku ba shengula.

Mwa kona ku kupa buka ye ya makepe a 256, ili ye na ni maswaniso a mande ni makepe a likana ni a magazini ye kwa butuna. Se mu tokwa feela ku eza ki ku taleleza kalulo ye bonisizwe kwatasi ni ku i lumela kwa keyala ye swanela ye bonisizwe fa likepe 5 la magazini ye.

□ Ni kupa kuli mu ni lumele buka ye bonisizwe fa. Mu bonise puo.

□ Ni kupa kuli mutu yo muñwi a tahange fa ndu ya ka ku to ni luta Bibele.