Ku Shwelwa ki Mulatiwa ki Muinelo O Butuku Hahulu

Nicolle ne li musizana ya ikanguzi hande. Kono zazi le liñwi manzibwana a tonga toho, mi bashemi ba hae ba mu isa kwa sipatela. Manzibwana a lizazi le ne li tatami, ili ka nako ya naa sa talimwa ki baalafi, Nicolle a kula hahulu pilu. Baalafi ha ne ba zwezipili ku mu tatuba, ne ba fumani kuli naa na ni butuku bo bu si ka ata hahulu ili bo bu tahiswa ki maikolokuwawa, mi butuku bo ne bu mu fitile kwa maswafu, kwa lipiyo, ni kwa pilu. Ku si ka fita kale lihora ze 48, Nicolle a timela. Ka nako yeo, naa li wa lilimo ze talu feela.

KU SHWELWA ki mulatiwa ki o muñwi wa miinelo ye maswe hahulu ya kona ku talimana ni yona mutu. Fokuñwi mutu u kona ku ikutwa kuli ha koni ku tiyela muinelo wo. Bo Isabelle, bo mahe Nicolle, ba bulela kuli, “Ni tonda hahulu Nicolle. Ni sa hupulanga linako za naa ni kumbatanga, munko wa hae, ni lilato la hae. Ni tonda lipalisa za naa ni fanga zazi ni zazi. Ni nahananga Nicolle nako kaufela.”

Kana ni mina mu shwezwi ki mulatiwa wa mina—inge cwalo mwanaa mina, bakumina, muhulwani kamba munyanaa mina, mushemi wa mina, kamba mulikanaa mina yo mutuna? Haiba ku cwalo, mu kona ku tiyela cwañi masitapilu a mina?