Ki Kabakalañi ha ku na ni Manyando A Mañata Cwana?

BA BAHULU ba bulapeli ba ba ipapata kuli ba ziba kalabo ya puzo yeo ye kwa nzohoto hañata ba lutanga kuli manyando ki koto ye zwa ku Mulimu. Ka mutala, hamulaho wa zikinyeho ye ne ezahezi kwa Haiti, muprisita yo muñwi wa mwa muleneñi wa naha yeo naa bulelezi keleke ya hae kuli kozi yeo ne i li liñusa le ne li zwa ku Mulimu. Ba bañwi bona ba ikutwa kuli ha ba na hande liseli fa taba ya za se si tahisa manyando. Caziba yo muñwi wa za bulapeli wa kwa America u bulela kuli batu ba bañata ba bonahala ku ikutwa cwana ka za taba ye: “Ha lu zibi libaka Mulimu ha tahisanga likozi ze cwalo mi ha lu tokwi ku buza ka za teñi. Luna lu swanela feela ku ba ni tumelo.”

Kana luli Mulimu ki yena ya ‘tahisa’ manyando a batu? Bibele ha i bonisi cwalo ni hanyinyani! Manyando naa si yo mwa mulelo wa Jehova Mulimu kwa batu. Kono muuna ni musali ba pili ne ba kwenuhezi puso ya Mulimu, ili ku keta ku itomela likuka za bona ka za bunde ni bumaswe. Ne ba fulalezi Mulimu mi ku eza cwalo ne ku ba tahiselize manyando. Kacenu lu mwa butata bo bu tahisizwe ki keto ya bona ye maswe. Kono Mulimu ha si ka tahisa manyando a batu ni hanyinyani. Bibele i bulela kuli: “Mutu ha li mwa tiko, a si ke a bulela kuli: ‘Ni likiwa ki Mulimu.’ Kakuli Mulimu ha likiwi ka ze maswe mi ha liki mutu.” (Jakobo 1:13) Manyando a kona ku tahela mutu ufi kamba ufi—mane nihaiba batu ba ba shemubiwa ki Mulimu. Ha mu nyakisise mitala ye latelela:

● Mupolofita Elisha naa kulile butuku bo ne bu sa foli ili bo bu bulaya.—2 Malena 13:14.

● Muapositola Paulusi naa ñozi kuli naa zwezipili “ku shwa tala ni linyolwa ni ku sa apala ni ku ezwa maswe ni kutokwa maino.”—1 Makorinte 4:11.

● Mukreste wa libizo la Epafrodite naa kulile mi naa “lobehile pilu.”—Mafilipi 2:25, 26.

Ha ku na fo ku ñozwi fo ku bonisa kuli baana ba balaalu bao ne ba otiwa ki Mulimu kabakala libi za bona. Niteñi, Bibele ha i bonisi feela kuli Mulimu haki yena ya tahisa manyando. Kono hape i bonisa lika ze taalu ze tahisanga manyando hañata.

 Liketo za ka Butu

“Kaufela sa cala mutu, ki sona hape sa ka kutula.” (Magalata 6:7) Kaniti, mutu ya eza keto ya ku zuba kwai, ku zamaisa maswe mota, kamba ku sinya masheleñi a hae u ka ikalabela ka za manyando afi kamba afi a kona ku tahiswa ki liketo za hae.

Hape lu kona ku nyanda kabakala liketo za buitati za mutu yo muñwi. Kaniti, batu ba ezize lika ze maswe hahulu, ze cwale ka likezo ze situhu za ba Nazi ni ku eza maswe banana. Ka ku itusisa maswe tukuluho ya ku iketela, batu ba bañwi ba ezanga liketo ze tahisezanga ba bañwi manyando.

Likezahalo za ka Sipundumukela

Mwa lilimo za mwanda wa pili C.E., tawala ye ñwi ye tuna mwa Jerusalema ne i wile, mi ya bulaya batu ba 18. Jesu ha naa ama kwa batu ba ne ba bulailwe mwa kozi yeo, naa ize: “Kana mu hupula kuli bona ne ba na ni mulatu o mutuna ku fita batu ba bañwi kaufela ba ba yahile mwa Jerusalema? . . . kutokwa ni hanyinyani.” (Luka 13:4, 5) Jesu naa ziba kuli batu bao ba ne ba bulailwe ki tawala ne ba si ka otiwa ki Mulimu. Naa ziba kuli Linzwi la Mulimu ne li bulezi kale kuli: “Mutu ni mutu u tamwa ki linako za pila ka zona, ni ki bushiko kamba bumai bwa hae.” (Muekelesia 9:11) Likozi ze ñata li welanga batu kabakala kuli ba banga mwa sibaka se si sa swaneli ka nako ye maswe kamba kabakala mafosisa a batu. Ka mutala, lipiho li bonisa kuli ku banga hahulu ni manyando batu ha ba palelwa ku latelela litemuso ze ba fiwa ka za likozi ze kona ku ba wela kamba ha ba pila mwa libaka mo miyaho ha i si ka yahiwa ka ku tiya kuli i kone ku tiyela mañungwa a matuna kamba lizikinyeho. Mwa miinelo ye cwalo, likezahalo za ka sipundumukela li amanga batu ba bañata ili ku tahisa manyando a matuna.

“Mubusi wa Lifasi Le”

Bibele i bulela kuli: “Lifasi kamukana li mwa maata a ya maswe.” (Joani 12:31; 1 Joani 5:19) “Ya maswe” yo ki Satani Diabulosi, ya li sibupiwa sa moya se si maata, ili ya taluswa kuli ki “mubusi wa moya o zamaisa batu.” Satani u susueza “moya o sebeza cwale kwa bana ba ba sa utwi.” (Maefese 2:2) Bukebenga bo buñwi bo bu cwale ka ku bulaya batu ba mushobo o muñwi ni ku eza maswe banana, bu bile bo bu maswe hahulu kuli mane batu ba bañata ba fumana taata ku lumela kuli bukebenga bo bu cwalo bu tahiswa ki batu feela.

Kono kana taba yeo i talusa kuli Mulimu ha na taba ni manyando a luna? Kana wa kona ku felisa manyando, mi kana u ka nga muhato wa ku a felisa?