Ha mu Ikutwa Kuli Ki Hande ku Ipulaya Feela

SILIMO ni silimo batu ba bañata-ñata mwa naha ya America ba batanga ku ipulaya. Bibele i talusa libaka batu ba bañata ha ba zwafile hahulu cwalo. I talusa kuli lu pila mwa “linako ze taata, ze ziyeza.” Miinelo ye taata ya mwa bupilo se imeza hahulu batu. (2 Timotea 3:1; Muekelesia 7:7) Mutu ha imezwa hahulu ki lipilaelo za mwa bupilo, u kona ku nahana za ku ipulaya kuli a si ke a nyanda. Mu swanela ku ezañi haiba mu ikutwanga cwalo?

Haki Mina mu Nosi!

Nihaike kuli muinelo wa mina u kana wa bonahala ku ba o taata hahulu, mu hupule kuli haki mina mu nosi ni kuli ka bumai ibato ba kuli mutu kaufela kacenu u tiyela butata bo buñwi. Bibele i bulela kuli: “Ze bupilwe kaufela li zwelapili ku tonga hamoho ni ku utwa butuku  hamoho.” (Maroma 8:22) Nihaike kuli ka nako ya cwale mu kona ku ikutwa kuli butata bwa mina mwendi ha bu na ku fela, hañata miinelo ya banga hande hamulaho wa nako. Kono miinelo i si ka ba kale hande, ki lika mañi ze kona ku mi tusa?

Mu taluseze mulikanaa mina ya hulile ni ye mu sepile, maikuto a mina. Bibele i bulela kuli: “Mulikanaa mutu wa mu lata ka nako ni nako, u pepezwi kuli a be mwanahabo mwa liziyezi za hae.” (Liproverbia 17:17) Jobo muuna ya lukile, ya bulezwi mwa Bibele, naa taluselize ba bañwi maikuto a hae ka nako ya naa imezwi ki lipilaelo. Ha naa ikutwile kuli naa ‘tinilwe ki bupilo bwa hae,’ naa bulezi kuli: “Ni ka itilelela kwa batu ni si na maswabi; ni bulele ze utwisa pilu ya ka butuku.” (Jobo 10:1) Ha mu ka taluseza ba bañwi za butata bo mu na ni bona mu ka ikutwa ku imuluha, mi mwendi ku ka mi tusa ku cinca mo mu ngela butata bwa mina.

Mu taluseze Mulimu ze mwa pilu ya mina ka tapelo. Batu ba bañwi ba nga kuli tapelo i tusa feela batu ku ikutwa hande, kono Bibele ha i bonisi cwalo. Liñolo la Samu 65:2 li biza Jehova Mulimu kuli ki “Ya utwa milapelo,” mi la 1 Pitrosi 5:7 li bulela kuli: “[Mulimu] wa mi tokomela.” Bibele i kuta-kutezi ku koñomeka butokwa bwa ku itinga ku Mulimu. Ki ye mitala:

“U sepe Muñaa Bupilo ka pilu ya hao kaufela, mi u si ke wa tiyela fa butali bwa hao; u beye Muñaa Bupilo mwa milelo ya hao kaufela, mi Yena u ka lukisa linzila za hao.”—LIPROVERBIA 3:5, 6.

“[Jehova] u fa ba ba mu saba se si shukezwi ki bona, hape u utwa ni mihuwo ya bona, mi wa ba lamulela.”—SAMU 145:19.

“Ki bona buikolwiso bo lu na ni ku yena, kuli ha lu kupa nto ifi kamba ifi ka ku ya ka tato ya hae, wa lu utwa.”—1 JOANI 5:14.

“Muñaa Bupilo u kwahule ni ba ba maswe; kono u utwa litapelo za ba ba na ni niti.”—LIPROVERBIA 15:29.

Haiba mu taluseza Mulimu butata bwa mina, u ka mi tusa. Bibele i mi susueza ku ‘sepa Mulimu ka linako kaufela, ni ku sululela fapilaa hae pilu ya mina’—Samu 62:8.

 Ha ku Tokwahala Tuso ye Tuna

Lipatisiso ze ezizwe li bonisa kuli buñata bwa batu ba ba ipulayanga ki batu ba ne ba lembwalile ka nako ye telele. * Taba ye i bonisa kuli fokuñwi kwa swanela ku yo bata lituso kwa lipatela. Mualafi wa kona ku fa mulyani o swanela ku mutu ya lembwalile, kamba wa kona ku mu taluseza mufuta wa lico za swanela ku ca ni za sa swaneli ku ca. Fokuñwi mukuli ha nze a fiwa likalafo, hape ku kona ku tusa hahulu haiba a eza lipapali ze tiisa mubili. Batu ba bañata ba tusizwe hahulu ki likalafo za kwa lipatela. *

Bibele i na ni litaba ze ñata ze kona ku mi tiisa ni ku mi fa sepo. Ka mutala, kwa liñolo la Sinulo 21:4, Bibele i bulela kuli Jehova Mulimu, “u ka takula miyoko kaufela kwa meeto a bona, mi lifu ha li sa na ku ba teñi, nihaiba ku tahelwa ki maswabi kamba ku lila kamba ku utwa butuku. Za pili li felile.” Ye ki sepiso ye zwa ku Mulimu, mi ku nahanisisa sepiso ye kwa kona ku mi imulula.

Mwa lifasi kaufela Lipaki za Jehova ba sweli ku taluseza batu ba bañata-ñata za sepiso ya mwa Bibele yeo. Kamukwaocwalo, batu ba bañata ba sweli ku ba ni sepo ya luli mwa linako ze taata ze. Haiba mu bata ku ituta ze ñata, mu ambole ni Lipaki za Jehova ba mwa silalanda sa mina ka ku ya kwa Ndu ya Mubuso ye fumaneha mwa sibaka se mu pila ku sona, kamba mu ñolele ku ye ñwi ya likeyala ze bonisizwe fa likepe 5 la magazini ye. Mi hape mwa kona fumana litaba ze ñwi fa sibaka sa luna sa fa Intaneti sa www.watchtower.org.

[Litaluso za kwatasi]

[Mbokisi fa likepe 16]

TUSO YE ZWELELA MWA BIBELE

● “Mu si ke mwa bilaela ka se siñwi, kono mwa lika kaufela mu zibise Mulimu ze mu kupa ka tapelo ni ka kupo hamoho ni buitumelo; mi kozo ya Mulimu ye fita kutwisiso kaufela i ka sileleza lipilu za mina ni minahano ya mina ka Kreste Jesu.”—Mafilipi 4:6, 7.

● “Ni batile Muñaa Bupilo, mi u ni utwile; u ni lamulezi ku ze ne ni saba kaufela.”—Samu 34:4.

● “Muñaa Bupilo u fakaufi ni ba ba na ni pilu ye lobehile, mi u pilisa ba ba ikutwa ku swaba mwa moya wa bona.”—Samu 34:18.

● “Ba ba lobehile lipilu, wa ba folisa, u tama litombo za bona.”—Samu 147:3.

[Caption on page 17, 18]

HAIBA MU NAHANA ZA KU IPULAYA . . .

Mu taluseze mulikanaa mina ye mu sepile maikuto a mina

Mu taluseze Mulimu ze mwa pilu ya mina ka tapelo

Mu ye kwa sipatela kuli ba yo mi tusa

[Mbokisi/Siswaniso se si fa likepe 18]

KWA BALIKANI NI LUBASI

Hañata ba mwa lubasi lwa mutu ya imezwi ki lipilaelo ni balikani ba hae, ki bona ba ba banga ba pili ku lemuha kuli u nahana za ku ipulaya. Haiba ba nga muhato, ba kona ku mu pilisa! Mu bonise kutwelo-butuku ha mu teeleza ku za bulela. Mu bonise kuli mwa utwisisa kuli butata bwa li ku bona ki bwa luli. Bibele i bulela kuli: “Mu bulele ka nzila ye omba-omba ku ba ba lobehile lipilu.” (1 Matesalonika 5:14) Mu susueze mutu ya lembwalile yo ku kupa tuso, mi mu lukise kuli a fumane tuso yeo haiba mu tokwa ku eza cwalo.