Kiñi ha ne ni bulezi cwalo?
Ba banca Ba Buza Kuli
Kiñi ha ne ni bulezi cwalo?
Taba ye i ka mi tusa ku ziba
LIBAKA fokuñwi ha mu fosanga mwa lipulelo
ZE MU TOKWA ku eza ha mu fosa mwa lipulelo
MO MU KONA ku bela ni tokomelo mwa lipulelo
“Hañata naa banga ni tokomelo mwa lipulelo za ka, kono fokuñwi naa fosanga, mi ha se ni ezize cwalo ni ikutwanga inge ni ka pumbama feela!”
“Fokuñwi ni bulelanga litaba mwendi za nahana mañi ni mañi kono ili ze sa tokwi ku bulelwa ka ku tumusa . . . ”
LIBAKA HA KU BANGA CWALO
Liñolo le li na ni sisupo sa butokwa: “Mutu ya sa fosi ku za bulela, ki mutu ya petehile.” (Jakobo 3:2, Bibele ye Kenile, Hatiso ya 1951) Liñolo le li talusañi? Li talusa kuli ha ku na mutu ya sa fosi mwa lipulelo. Batu ba bañata ba kona ku utwisisa maikuto a kalibe ya bizwa Annette, * ya naa bulezi kuli, fokuñwi u ikutwanga kuli ha swaneli ku ambola fa taba ye ñwi kono ha yo kumbuluka ki kale a bulela ze ñata ka za teñi.
Taba ye ne ezahezi: Kalibe ya bizwa Corrine u bulela kuli: “Mulikanaa ka yo muñwi naa itakalelize ku ikungela kwa libyana ze ñwi ze ne ni yumba. Na matukela ku bulela kuli: ‘Ha ni sepi kuli li ka ku kwana.’ A ni alaba kuli: ‘U talusañi? U nahana kuli ni yo mukima nji?’”
Kuli mu utwisise libaka fokuñwi ha mu kona ku bulela lika ze mu si ka lela, mu like ku eza ze latelela.
● Mu lemuhe mifokolo ya mina.
․․․․․ Ni hanelelanga ku bulela ha ni nyemile
․․․․․ Ni hanelelanga ku bulela ni si ka nahana kale za ku bulela
․․․․․ Ni hanelelanga ku bulela ni si ka teeleza kale ku za bulela yo muñwi
․․․․․ Mifokolo ye miñwi
Mutala: Musali yo muñwi ya bizwa Alexis u bulela kuli: “Ni na ni butata bwa ku ezanga hahulu lishea, mi fokuñwi batu ba ngelanga mu sili ze ni bulela.”
● Mu lemuhe batu be mu kona ku foseza ka bunolo.
․․․․․ Bashemi ba mina
․․․․․ Muhulwanaa mina kamba munyanaa mina
․․․․․ Mulikanaa mina
․․․․․ Ba bañwi ․․․․․
Mutala: Kalibe wa lilimo ze 20 ya bizwa Christine, u bulela kuli: “Ki bumai kuli batu be ni lata hahulu ki bona be ni fosezanga hahulu ni si ka lela. Ni nahana kuli ku cwalo bakeñisa kuli ni ikutwanga ku lukuluha hahulu ha ni inzi ni bona kuli mane ha ni ikalelwangi za kuli na kona ku ba foseza.”
ZE MU TOKWA KU EZA HA MU FOSA MWA LIPULELO
Liñolo le li na ni sisupo sa butokwa: Mu ‘tundamene ze tahisa kozo.’ (Maroma 14:19) Nzila ye ñwi ye lu kona ku latelela se li bulela liñolo le ki ka ku kupanga swalelo.
Taba ye ne ezahezi: Musizana ya bizwa Karen, u bulela kuli: “Bo ma ne ba timezi inze ni na ni likweli ze lishumi mi ne ni si ka utiwa ki bo ndate, kamukwaocwalo, ni hulisizwe ki bo ma ba bahulu ni bakubona. Zazi le liñwi, ha ne ni na ni lilimo ze bato eza 10 kamba 11, ne ni ikutwa hahulu bulutu ni bunyemi kabakala kuli bo ma ne ba timezi, mi ne ni ikutwa kuli ne ni tokwa ku nyaza mutu yo muñwi kabakala lifu la bo ma. Kamukwaocwalo, bo ma ba bahulu ha ba to ni kupa kuli ni ba tuse ku eza musebezi o muñwi, naa kala ku ba yukaukela; mi mane na fita fa ku bulela kuli, ‘Ha ni mi lati’ ni kuli, ‘Haki mina bo ma ba ba ni pepa.’ Bo ma ba kakamala kabakala manzwi ao. Kiha ba ya kwa musiyo wa bona ni ku yo ikwalela kwateñi, mi naa ba utwa inze ba lila. Naa ikutwa hahulu bumaswe. Ne ba ni babalezi ni ku ni ezeza lika kaufela mwa bupilo, kono cwale ni to ba bulela maswe cwalo. Bo malume, bona bakubona, ba ikambota ni na ka ze ne ezahezi, mi ba ni bonisa mañolo a bulela za ku tokomela lipulelo za luna. Hamulaho, naa i kupela hahulu swalelo ku bo ma. Naa lemuha kuli ne ni fosize.”
Mu ñole kwatasi libaka li li liñwi ha ku kona ku mi bela taata ku kupa swalelo.
․․․․․
Ki kabakalañi ku kupa swalelo ha ku kona ku mi tusa ku ikutwa hande?
․․․․․
Taba: Ha mu nyakisise likuka ze fumaneha kwa liñolo la Liproverbia 11:2 ni la Mateu 5:23, 24.
Kono ki hande ku tibela muinelo o kona ku tahisa kuli mu fose mwa lipulelo za mina ilikuli mu si ke mwa tokwa ku kupa swalelo. Mu kona ku eza cwañi cwalo?
MO MU KONA KU BELA NI TOKOMELO MWA LIPULELO
Liñolo le li na ni sisupo sa butokwa: Mu be “ya teeleza kapili, ya sa akufi ku bulela, ya sa akufi ku halifa.” (Jakobo 1:19) Ki ze liakalezo ze ñwi ze ka mi tusa ku sebelisa kelezo yeo.
Mu bale mañolo a bonisizwe kwatasi, mi mwa kambokisi ka ka kwa liñolo ni liñolo mu ñole mwateñi nombolo ya akalezo ye lu lumelelana ni ze li bulela liñolo leo.
1 Kalibe ya bizwa Danette u bulela kuli: “Mu like ku sa ikunga kuli mu ba butokwa hahulu; ku eza cwalo ku ka mi tusa ku sa halifa kapili.”
2 Kalibe ya bizwa Brielle u bulela kuli: “Ni yanga kwa ku hata-hata. Ku eza cwalo, ku ni fanga kolo ya ku ba ni nosi hanyinyani mi ku ni tusanga ku nyemuluha.”
3 Kalibe ya bizwa Celia u bulela kuli: “Ha ne ni sa li mwanana, ne ni nahananga kuli ni tokwa ku kanana fa nto ni nto. Kono ni itutile kuli ki hande ku tuhelelanga feela lika ze ñwi.”
4 Kalibe ya bizwa Kerrin u bulela kuli: “Haiba mutu yo muñwi wa hanyauka mi ha mu mu alabi, mafelelezo mutu yo u ka nyikwa kabakala kuli ha mu si ka mu alaba. Mu be feela ni pilu-telele. Mu si kotezi mulilo.”
5 Mutangana ya bizwa Charles u bulela kuli: “Fokuñwi naa nyemelanga mutu yo muñwi. Mi ni batanga feela ku mu falela mwa koma. Kono ha ni fitisa nako, ni to lemuhanga kuli manzwi a ka naa si ke a tusa se siñwi. Se ni itutile kikuli, ha u nyemisizwe, u si ke wa matukela ku bulela se siñwi honafo feela.”
Mwa kona ku fumana litaba ze ñata ka za “Ba Banca ba Buza Kuli” fa sibaka sa luna sa fa Intaneti sa www.watchtower.org/ype
[Litaluso za kwatasi]
^ para. 10 Mwa taba ye, mabizo a mañwi a cincizwe.
[Mbokisi/Maswaniso a fa likepe 20]
Allie u bulela kuli: Pili ni si ka bulela kale nto ye ñwi, ni ipuzanga lipuzo ze cwale ka ze: ‘Kana taba ye ni ka bulela fa i ka tusa? Ze ni bulela li ka ama cwañi mutu ye ni ambola ni yena?’ Haiba mwa kakanya litaba ze mu bata ku bulela, mwendi ki hande ku sa li bulela.
Chase u bulela kuli: Ha ni bata ku bulela nto ye ñwi, ni likanga ku nahana mo i ka amela batu be ni inze ni bona. Ni ikutwa kuli ha ni nze ni hula, ni ba ni buikoneli bwa ku tokomela lipulelo za ka. Ku si na ku kakanya, lu ituta kwa lika ze lu fita ku zona.
[Mbokisi fa likepe 21]
MWA KONA KU BUZA BASHEMI BA MINA
Ha u bona ha ku na mutu ya petehile, sina feela mwa naa ñolezi Jakobo kuli, “kaufelaa luna lwa sitatalanga hañata,” mu ambole ni bashemi ba mina kuli ba mi taluseze za butata bo ne ba fumani kuli ba kone ku tokomela lipulelo za bona.—Jakobo 3:2.
[Siswaniso se si fa likepe 20]
Mutangana ya bizwa James u bulela kuli: “U sa hamula feela mulyani wa ku zukunyinsa meeno mo u inanga, ha u sa kona ku u kutiseza mwateñi. Ku cwalo ni kwa manzwi e lu bulela. Lu sa bulela feela manzwi a kona ku utwisa yo muñwi butuku, ha lu sa kona ku a kutisa.”
Chase
Allie
